Eaha ta te Bibilia e parau ra no nia i te faaneheneheraa i te hohoˈa mata e te taoˈa faaunauna?

Te pahonoraa a te Bibilia

Aita te Bibilia e opani ra ia faanehenehe ia tatou iho aore ra ia tamau i te mau taoˈa faaunauna. Tera ra, te haafaufaa ra te Bibilia i “te faaneheneheraa mou ore o te hau e te mǎrû,” eiaha te faaneheneheraa rapaeau noa.—Petero 1, 3:3, 4.

Aita e opanihia ia faanehenehe ia tatou iho

• Te faahiti ra te Bibilia i te mau vahine taiva ore o tei faanehenehe ia ratou. Te vai ra Rebeka, tei faaipoipo ia Isaaka te tamaiti a Aberahama. E tapea ihu e e fifi rima to ˈna, oia atoa te tahi mau taoˈa moni rahi ta to ˈna metua hoovai tane i horoa na ˈna. (Genese 24:22, 30, 53) Oia atoa Esetera, ua faanahohia no ˈna e te tahi atu mau vahine apî i “te mau monoˈi taurumi ia haviti atu â” ratou ia riro te hoê o ratou ei arii vahine no Peresia. (Esetera 2:7, 9, 12) I roto i teie mau faanahoraa te vai ra te mau ravea huru rau no te faanehenehe i te hohoˈa mata.

• Faahohoˈaraa Bibilia e faaohipa ra i te mau taoˈa faaunauna. Ei hiˈoraa, te faaauhia ra te hoê taata o te aˈo ma te paari mai “te tahi tapea tariˈa auro . . . no te tariˈa faaroo.” (Maseli 25:12) Oia atoa, ua faaau te Atua ia ˈna iho mai te hoê tane faaipoipo no te nunaa Iseraela o te faanehenehe ra i ta ˈna vahine faaipoipo i te fifi rima, te fifi arapoa e te tapea tariˈa. Ua riro mai ïa te nunaa Iseraela mai te hoê vahine “hope te haviti.”—Ezekiela 16:11-13.

Te mau manaˈo hape no nia i te faaneheneheraa i te hohoˈa mata e te taoˈa faaunauna

Manaˈo hape: No te mea ua parai te arii vahine ino o Iezebela i “to ˈna mata i te peni ereere,” tapao faaite ïa e mea ino ia faanehenehe i te hohoˈa mata.—Te mau arii 2, 9:30.

Tupuraa mau: Ua faautuahia Iezebela no te mau ohipa ino ta ˈna i rave oia hoi te peu tahutahu e te taparahi taata, e ere râ no to ˈna faaneheneheraa rapaeau.—Te mau arii 2, 9:7, 22, 36, 37.