Ua faataahia anei te taime e pohe ai tatou?

Te pahonoraa a te Bibilia

Aita to tatou taime poheraa i faataa-ê-na-hia. Te parau ra hoi te Bibilia, pinepine te hoê taata e pohe ai no te mau “tupuraa manaˈo-ore-hia.”—Koheleta 9:11.

Aita anei te Bibilia e parau ra “e taime no te pohe”?

E, te parau ra te Koheleta 3:2: “E taime no te fanau e e taime no te pohe. E taime no te tanu e e taime no te iriti tumu.” Teie râ, te faaite ra te mau irava tapiri eaha te huru o te oraraa a te taata nei. (Koheleta 3:1-8) Aita te Atua i faataa te taime e pohe ai tatou mai ta ˈna i ore e faahepo i te taata faaapu ia tanu i te maa i te hoê taime faataa-maitai-hia. No reira, eiaha e vaiiho i te mau haapeapearaa o te oraraa ia haamoe i to tatou Atua poiete.—Koheleta 3:11; 12:1, 13.

E nehenehe tatou e ora maoro

Noa ˈtu te mau tupuraa manaˈo-ore-hia, e nehenehe tatou e ora maoro ia rave tatou i te mau faaotiraa paari. Te na ô ra te Bibilia: “E puna ora te haapiiraa a te taata feruriraa paari no te faaatea ê mai i te mau marei o te pohe.” (Maseli 13:14) Ua parau atoa Mose i te mau Iseraela e “ora maoro” ratou ia auraro anaˈe ratou i te mau faaueraa a te Atua. (Deuteronomi 6:2) Oia atoa, e nehenehe tatou e haapoto i to tatou ora ia rave tatou i te mau faaotiraa ino e te maamaa.—Koheleta 7:17.

Noa ˈtu e rave tatou i te mau faaotiraa paari aore ra e haapao maitai tatou, e pohe iho â tatou paatoa. (Roma 5:12) Tera râ, e taui teie tupuraa. Te fafau mai ra te Bibilia “e ore roa te pohe.”—Apokalupo 21:4.