Te vai mau ra anei te Atua?

Te pahonoraa a te Bibilia

E. Mea rahi te haapapuraa a te Bibilia e te vai mau ra te Atua. E faaitoito mai te Bibilia ia faatupu i te faaroo i te Atua, eiaha ma te tiaturi hanoa i ta te mau haapaoraa e haapii ra, ma te “feruriraa atoa” râ e te “ite i te feruri.” (Roma 12:1; Ioane 1, 5:20, nota) Teie te tahi mau manaˈo no roto mai i te Bibilia:

• Te haapapu ra te huru nahonaho o te ao nui e te vai ra te hoê Atua poiete. Te na ô ra te Bibilia: “E mea hamanihia hoi te fare atoa e te taata, o tei hamani râ i te mau mea atoa, o te Atua ïa.” (Hebera 3:4) Noa ˈtu e mea papu te reira, e rave rahi taata maramarama tei putapû i teie parau.a

• E hinaaro mau te taata e ite i te tumu o te oraraa, mai te huru ra te hiaai ra oia i te tahi maa noa ˈtu ua paia oia. Tera ïa ta te Bibilia e parau ra te “hiaai . . . i te mau mea pae varua,” tei roto atoa te hinaaro e ite e e haamori i te Atua. (Mataio 5:3; Apokalupo 4:11) Te haapapu ra te hiaairaa i te mau mea pae varua e te vai mau ra te Atua e e Atua poiete î i te here atoa râ oia o te hinaaro ra ia haamâha tatou i taua hiaai ra.—Mataio 4:4.

• Mea rahi te parau tohu faataa-maitai-hia i roto i te Bibilia tei tohuhia tau hanere matahiti hou te reira a tupu ai mai tei tohuhia iho â. No te tano hoi o teie mau parau tohu faataa-maitai-hia i papu ai ia tatou e no ǒ mai te reira i te hoê puai tei hau ê i to te taata.—Petero 2, 1:21.

• 

  Ua hau aˈe te maramarama o te feia papai Bibilia i te pae ihi i to te taata o to ratou tau. Ei hiˈoraa, e rave rahi nunaa tei tiaturi na e mea amohia te fenua e te hoê animara, mai te elephani, te puaa oviri e te puaatoro oni. Area te Bibilia, te parau ra e “ua faauta” te Atua “i te fenua i nia i te aore.” (Ioba 26:7) Oia atoa, ua tano te Bibilia i te parau e mea menemene te fenua. (Isaia 40:22) E rave rahi taata te manaˈo ra e no ǒ mai teie maramarama to te feia papai Bibilia i te Atua ra.

• Mea rahi te mau uiraa fifi ta te Bibilia e pahono, te mau uiraa iho â ra aita anaˈe e tano ra te pahonoraa, e faaea ïa te taata i te tiaturi e te vai mau ra te Atua. Ei hiˈoraa: Mai te peu e mea here te Atua e te mana hope, no te aha ïa te vai ra te mauiui e te ino i roto i teie nei ao? No te aha te mau haapaoraa e faaitoito ai i te ohipa ino, eiaha râ te ohipa maitai?—Tito 1:16.