Te vai ra anei te Bibilia a te mau Ite no Iehova?
Ua faaohipa te mau Ite no Iehova e rave rahi huriraa a haapii ai i te Bibilia. E rave râ matou i Te Bibilia, Huriraa o te ao apî i roto i te mau reo te vai ra tera huriraa. Mea au roa na matou tera huriraa no te mea ua faaohipahia te iˈoa o te Atua, mea tano e mea maramarama atoa.
Ua faaohipahia te iˈoa o te Atua. Aita te tahi mau taata tei pia i te Bibilia i faahanahana i te Atua. Ei hiˈoraa, i roto i te hoê huriraa Bibilia, ua tapaohia te iˈoa o na 70 taata tei apiti i te faaineineraa o te reira. Aita roa ˈtu tera huriraa e faaohipa ra i to te Atua iˈoa, Iehova!
Area râ te Huriraa o te ao apî, ua faahoˈihia mai te iˈoa o te Atua i te mau tausani vahi e vai ra tera iˈoa i roto i te mau papai tumu o te Bibilia. Aita atoa te mau taata tei ohipa i nia i tera huriraa i faaite i to ratou iˈoa.
E mea tano. Aita te mau huriraa atoa e tuati maite i te papai tumu o te Bibilia. Ei hiˈoraa, i roto i te tahi Bibilia, ua hurihia te Hebera 12:2 mai tera: “Ma te tiatonu maite to tatou mata ia Iesu, . . . o tei faaoromai i te satauro.” I roto i te papai tumu o te Bibilia, ua papaihia “pou haamauiuiraa”, eiaha râ “satauro.” Peneiaˈe ua tiaturi te mau taata huri e ua pohe Iesu i nia i te satauro, oia hoi e piti raau hoê mea tarava i raro rii mai i te tahi. Aita râ te Bibilia e haapii i te reira. I roto i te Huriraa o te ao apî, ua hurihia ïa tera irava mai tera: “A tiatonu ai ia Iesu, . . . i faaoromai ai oia i te pou haamauiuiraa.”
E mea maramarama. E mea tano te hoê huriraa maitai. Mea faufaa atoa ia maramarama te reira e te ohie ia taa. Ei hiˈoraa, i roto i te Roma 12:11, ua faaohipa te aposetolo Paulo i te hoê parau o “pihaa te varua” te auraa. I te mea e aita e auraa na roto i te reo Beretane e paraparauhia i teie mahana, ua hurihia teie irava i roto i te Huriraa o te ao apî “ia faaitoitohia outou e te varua moˈa.” E mea ohie aˈe ia taa.
Mea taa ê te Huriraa o te ao apî no te mea ua faaohipahia to te Atua iˈoa, e mea tano e mea maramarama atoa. Hau atu, ua operehia te reira ma te tamoni ore. E mirioni ïa taata te nehenehe e taio i te Bibilia na roto i to ratou iho reo, oia atoa te feia o te ore e nehenehe e hoo mai i te tahi Bibilia.