E Porotetani anei te mau Ite no Iehova?
Aita. E Kerisetiano te mau Ite no Iehova. E ere roa ˈtu matou i te Porotetani. No te aha?
Ua faataahia te haapaoraa Porotetani ei “pǔpǔ faaroo o te patoi ra i te Ekalesia Katolika.” Aita iho â te mau Ite no Iehova e farii ra i te mau haapiiraa a te Ekalesia Katolika. E ere râ matou i te Porotetani no to muri nei mau tumu:
E rave rahi tiaturiraa ta te Porotetani o te ore e tuati i ta te Bibilia e haapii mau ra. Ei hiˈoraa, te haapii ra te Bibilia e e “hoê hoi Atua,” e ere râ i te Toru tahi. (Timoteo 1, 2:5; Ioane 14:28) Te faaite atoa ra te Bibilia e e faautua te Atua i te feia ino ma te haamou ia ratou, eiaha râ ma te haamauiui atu i roto i te po auahi.—Salamo 37:9; Tesalonia 2, 1:9.
Aita matou e patoi aore ra e tamata ra i te taui i te Ekalesia Katolika e te tahi atu mau pǔpǔ faaroo. Te poro noa nei râ matou i te Parau apî maitai o te Basileia o te Atua a tutava ˈi i te tauturu ia vetahi ê ia tiaturi i te reira. (Mataio 24:14; 28:19, 20) Te haapii nei matou i te parau mau no nia i te Atua e ta ˈna Parau i te mau taata haavare ore. Aita râ matou e hinaaro e taui i te tahi atu mau pǔpǔ faaroo.—Kolosa 1:9, 10; Timoteo 2, 2:24, 25.