E ite anei tatou i te a muri aˈe a fatata ai i te pohe?

Te pahonoraa a te Bibilia

Mea rahi te taata te faatia nei e i te fatataraa ratou i te pohe, ua faataa-ê-hia ratou i to ratou iho tino aore ra ua ite ratou i te hoê mori aore ra te hoê vahi nehenehe mau. Te na ô ra te hoê buka (Recollections of Death) no nia i te pohe e te manaˈo nei vetahi e ua ite ratou eaha te tupu i muri aˈe i te pohe. Noa ˈtu aita te Bibilia e faahiti ra i tera mau huru tupuraa, te faataa ra te Parau a te Atua i te hoê parau mau faufaa roa o te faaite ra e ere roa ˈtu te reira.

Aita te feia pohe i ite i te tahi aˈe mea.

Te parau ra te Bibilia e aita “te feia pohe i ite i te tahi mea.” (Koheleta 9:5) A pohe ai, eita tatou e raea i te tahi atu faito o te oraraa aore ra huru feruriraa. Aita faahou tatou. E varua pohe ore anei to tatou? E ere teie haapiiraa no roto mai i te Bibilia. (Ezekiela 18:4) E ere ïa te mau mea itehia a fatata ai i te pohe i te hohoˈa o te raˈi, o te po auahi aore ra o te oraraa e tiai ra ia outou a pohe ai.

Eaha ta Lazaro i parau no nia i te oraraa i muri aˈe i te pohe?

Te faatia ra te Bibilia i te aamu o Lazaro tei ite i te pohe: Ua faahoˈi mai Iesu ia ˈna i te ora e maha mahana i muri aˈe i to ˈna poheraa. (Ioane 11:38-44) Mai te peu te ora noa ra o ˈna i muri aˈe i to ˈna poheraa, mea ino ïa Iesu i te faahoˈiraa mai ia ˈna i te ora i nia i te fenua. Tera râ, aita te Bibilia e faahiti ra hoê noa ˈˈe parau a Lazaro no nia i ta ˈna i ora i muri aˈe i to ˈna poheraa. Ahani, e faatia mai Lazaro i te reira. Ma te taa maitai, ua faataa Iesu i te pohe o Lazaro mai te taoto te huru. Tapao faaite ïa e a pohe ai Lazaro, aita o ˈna i ite faahou hoê aˈe mea.—Ioane 11:11-14.