Nafea te mau metua e haapii ai i ta ratou tamarii no nia i te taatiraa i te pae tino?

Te pahonoraa a te Bibilia

Na vai e haapii i te mau tamarii no nia i te taatiraa i te pae tino? Te parau ra te Bibilia, na te mau metua teie hopoia. E rave rahi metua tei faufaahia i to muri nei mau manaˈo tauturu:

• Eiaha e haama. Aita te Bibilia e haama ra i te faahiti i te taatiraa i te pae tino e i te mau mero taatiraa. Ua parau atoa te Atua i te nunaa Iseraela ia haapiihia te reira i te mau “tamarii.” (Deuteronomi 31:12; Levitiko 15:2, 16-19) A faaohipa i te mau taˈo mea tura, ia ore ia faarirohia te taatiraa i te pae tino e te mau mero taatiraa ei mea haama.

• A haapii atu ia au i to ratou faito matahiti. Eiaha e tiai ia fatata te taurearearaa no te aparau atu no nia i te taatiraa i te pae tino i ta outou tamarii. A faataa mǎrû râ i te reira ia au i to ratou faito matahiti.—Korinetia 1, 13:11.

• A haapii atu eaha te mea maitai e te mea ino. E horoa paha te mau fare haapiiraa i te mau haapiiraa no nia i te taatiraa i te pae tino. Tera râ, te faaitoito ra te Bibilia i te mau metua ia haapii i ta ratou tamarii no nia i te mau mero taatiraa. Oia atoa i te manaˈo tano e te haerea tia no nia i te taatiraa pae tino.—Maseli 5:1-23.

• A faaroo i ta outou tamarii. Eiaha e haapeapea aore ra e haava oioi i ta outou mau tamarii mai te peu e uiui mai ratou no nia i te taatiraa pae tino. Tera râ, “ia ru i te faaroo, ia haere maine i te parau.”—Iakobo 1:19, Te Bibilia Moˈa ra.

Nafea ia paruru i ta outou tamarii i te feia hamani ino i te tamarii i te pae taatiraa?

• A haapii ia outou iho. Ia maramarama outou e nafea te hoê taata rave ino i te tamarii e ohipa ai.—Maseli 18:15; a hiˈo i te pene 32 o te buka Les jeunes s’interrogent. Réponses pratiques, buka 1.

• A anaanatae i te oraraa o ta outou tamarii. Eiaha e vaiiho noa i ta outou tamarii i te hoê taata ma te ore e ite e taata papu anei. Eiaha e ‘faarue noa’ i ta outou tamarii.—Maseli 29:15, Te Bibilia Moˈa ra.

• A haapii atu eiaha e faaroo i te mau taata atoa. E titauhia ia haapii te mau tamarii i te faaroo i to ratou na metua. (Kolosa 3:20) Teie nei râ, ia parau outou ia ratou e titauhia ia faaroo i te mau taata paari atoa, e nehenehe ratou e vare hanoa i te hoê taata o te hinaaro e hamani ino ia ratou. E te mau metua Kerisetiano, a parau i ta outou tamarii: “Ia parau te hoê taata ia outou ia rave i te tahi mea ta te Atua e parau e mea ino, eiaha roa ˈtu e rave.”—Ohipa 5:29.

• Te mau ravea paruru. A tauturu i ta outou tamarii ia ite eaha te rave ia tamata te hoê taata i te rave ino ia ratou aita anaˈe outou i pihai iho ia ratou. A hauti i te mau tupuraa poto ia nehenehe ta outou tamarii e parau ma te itoito “A faaea! E faaite vau!” e e horo vitiviti. A haamanaˈo i te “faahiti noa” i teie mau parau i ta oe mau tamarii no te mea e nehenehe te reira e moˈehia ia ratou.—Deuteronomi 6:7, nota.