Ihea te Diabolo e ora ˈi?

Te pahonoraa a te Bibilia

Ei varua, te ora nei te Diabolo i roto i te hoê ao eita e ite-mata-hia. E ere râ te hoê po auahi ihea e haamauiui ai oia i te taata ino, mai tei faaitehia i nia i te hohoˈa o teie tumu parau.

“Te tamaˈi i nia i te raˈi”

No te hoê area taime, ua faatiahia Satani te Diabolo ia hahaere i roto i te ao varua. Ua nehenehe atoa oia e tia i mua i te Atua mai te mau melahi taiva ore. (Ioba 1:6) Tera râ, ua tohu te Bibilia e e tupu te hoê “tamaˈi i nia i te raˈi.” Eaha te faahopearaa o tera tamaˈi? E tiahihia Satani mai te raˈi mai e e ‘hurihia mai oia i raro i te fenua.’ (Apokalupo 12:7-9) Te haapapu ra te tuatapaparaa tau a te Bibilia e te mau tupuraa na te ao nei e ua tupu aˈena teie tamaˈi i nia i te raˈi. No reira ïa i teie nei, mea taotiahia ta te Diabolo mau tereraa i nia noa i te fenua.

Te auraa anei ïa e te ora nei te Diabolo i te hoê vahi taa maitai i nia i te fenua? Te parau ra te Bibilia e tei te oire tahito ra o Peregamo “te terono o Satani” e “te vahi ta Satani e parahi ra.” (Apokalupo 2:13) Eaha râ te auraa? Ua faaohipahia tera mau parau no te faaite e e rave rahi taata tei haamori ia Satani i roto i tera oire. Te parau atoa ra te Bibilia e te faatere nei te Diabolo i “te mau faatereraa arii atoa o te ao nei.” Te auraa ïa e, aita oia e ora ra i roto i te hoê vahi taa maitai i nia i te fenua, mea taotiahia râ ta ˈna mau tereraa i nia noa i te fenua.—Luka 4:5, 6.