E nehenehe anei te Bibilia e tauturu mai ia roohia tatou i te fifi i te pae moni e te tarahu?

Te pahonoraa a te Bibilia

E. E nehenehe na aˈoraa Bibilia e maha i muri nei e tauturu ia tatou i mua i te fifi moni e te tarahu.

1. A faanaho i ta oe haamâuˈaraa. Eiaha e ru i te hoo mai i te hoê taoˈa no te mea noa te hoo-mâmâ-hia ra te reira. Te na ô ra te Maseli 21:5: “E manuïa iho â te mau opuaraa a te taata itoito, e vevehia râ te taata atoa e ru noa.” No reira, a feruri maite eaha ta oe e hinaaro mau e ehia moni te vai mau ra ia oe e a faaohipa noa i tera faito moni.

2. Eiaha e tarahu faufaa ore noa. Te na ô ra te Maseli 22:7: “E faatere te taata taoˈa rahi i te taata veve, e e tavini tei tipee mai [aore ra tei tarahu] i tei horoa ˈtu.” Mai te peu e tarahu ê na ta oe e eita e haere faahou ia oe ia aufau, a tamata i te ani i te tahi faanahoraa apî no te aufau i ta oe tarahu. Eiaha e haaparuparu oioi. A pee i te aˈoraa Bibilia o te horoahia i teie taata o tei tarahu ma te feruri ore e tei teimaha ˈtura i ta ˈna tarahu: “A haere a hiˈo i to oe taata tupu, a faahaehaa ia oe e a onoono i te taparuparu ia ˈna. Eiaha e vaiiho i to oe mata ia taoto e i to oe tapoˈi mata ia topatopa.” (Maseli 6:1-5) E noa ˈtu eita e farii-oioi-hia ta oe aniraa, a tamau i te ani i te hôe faanahoraa apî no te aufau i ta oe tarahu.

3. A vaiiho i te moni i to ˈna vairaa. Te na ô ra te Maseli 28:22: “Te taata mata nounou taoˈa ra, te ru ra ïa ia rahi te taoˈa; aita râ oia i ite, e roohia mai oia e te veve.” (Te Bibilia Moˈa ra) E nehenehe te hoê taata e vevehia e e atea ê i te Atua no to ˈna nounou e to ˈna mau hinaaro tia ore.

4. A mauruuru noa. “Te vai ra ta tatou maa e te ahu, e mauruuru tatou i te reira.” (Timoteo 1, 6:8) Eita te moni e nehenehe e hopoi mai i te oaoa aore ra i te mauruuru. I rotopu i te feia oaoa roa ˈˈe i te ao nei, te vai ra aita i rahi ta ratou moni. E utuafare î i te here râ to ratou, e hoa e e auhoaraa piri e te Atua.—Maseli 15:17; Petero 1, 5:6, 7.