No te aha ia pure i te Atua na roto i te iˈoa o Iesu?
Te pahonoraa a te Bibilia
No te faafatata ˈtu i te Atua, e titauhia ia pure ia ˈna na roto i te iˈoa o Iesu. Ua parau Iesu: “O vau te eˈa e te parau mau e te ora. Aita roa e taata e tae i te Metua ra, na roto noa râ ia ˈu.” (Ioane 14:6) Ua parau atoa Iesu i ta ˈna mau aposetolo: “E parau mau ta ˈu e parau atu: Ia ani outou i te tahi mea i te Metua ma to ˈu iˈoa, e horoa ˈtu oia.”—Ioane 16:23.
Te tahi atu tumu no te pure na roto i te iˈoa o Iesu
Te faahanahana ra tatou ia Iesu e i to ˈna Metua, te Atua ra o Iehova.—Philipi 2:9-11.
Te haafaufaa ra tatou i te pohe o Iesu o tei horoa i to ˈna ora ei hoo no te taata e rave rahi.—Mataio 20:28; Ohipa 4:12.
Te farii ra tatou e o Iesu anaˈe te arai i rotopu i te Atua e te taata.—Hebera 7:25.
Te faatura ra tatou i te tiaraa o Iesu ei tahuˈa rahi ia arohahia mai tatou e te Atua.—Hebera 4:14-16.