Ia au i te mau aivanaa ua ora iho â anei Iesu?

E tiaturiraa papu ta te mau aivanaa no nia i te vai-mau-raa o Iesu. Ia au i ta te feia tuatapapa o na senekele matamua e te piti i papai no nia ia Iesu e te mau Kerisetiano matamua, te na ô ra te hoê buka ite rahi: “Te faaite ra teie mau faatiaraa, i tahito ra aita roa ˈtu te feia patoi i te Kerisetianoraa i feaa i te vai-mau-raa o Iesu. Ua haamata ra te reira i te hopea o te senekele 18, i te roaraa o te senekele 19, e i te omuaraa o te senekele 20 no te tahi mau tumu tano ore.”—Encyclopædia Britannica, neneiraa 2002.

I 2006, te na ô ra te hoê buka: “Aita hoê aˈe aivanaa faaturahia i teie mahana i patoi e ua ora mai te hoê ati Iuda, o Iesu te iˈoa, e tamaiti na Iosepha. E parau ratou, e ite hau atu â tatou no nia ia ˈna maoti ta ˈna ohipa i rave e ta ˈna mau haapiiraa.”—Jesus and Archaeology.

Ia au i te Bibilia, ua ora mau o Iesu e ua horoa-atoa-hia te mau iˈoa o to ˈna mau tupuna e fetii piri. (Mataio 1:1; 13:55) Oia atoa te mau iˈoa o te mau taata i faatere i te tau o Iesu. (Luka 3:1, 2) Na teie mau tuatapaparaa i tauturu i te mau taata maimi ia haapapu e mea mau te aamu Bibilia.