Mai te aha te huru te oroa faaipoiporaa a te mau Ite no Iehova?

E oroa haihai e te tura noa te mau faaipoiporaa a te mau Ite no Iehova i reira e faaroo-atoa-hia ˈi te hoê oreroraa parau poto niuhia i nia i te Bibilia. I muri iho, e putuputu ratou peneiaˈe no te tamaa.a Ua haere Iesu i tera huru oroa i te oire o Kana i te omuaraa o ta ˈna taviniraa.—Ioane 2:1-11.

• Mai te aha te huru te oroa faaipoiporaa a te mau Ite no Iehova?

• Ihea e faatupuhia ˈi te faaipoiporaa a te mau Ite no Iehova?

• O vai te nehenehe e haere atu?

• Eaha te ahu e oomo?

• E nehenehe anei e horoa i te ô?

• E afaihia anei te hapaina i nia a paraparau atu ai?

• E tauehia anei te raiti aore ra te tahi atu mea i nia i na hoa faaipoipo?

• E tamaa e e inu anei ratou i tera oroa?

• E faataˈihia anei te upaupa? E oriraa anei?

• E faatupu anei te mau Ite no Iehova i te oroa matahiti o to ratou faaipoiporaa?

Mai te aha te huru te oroa faaipoiporaa a te mau Ite no Iehova?

Te tuhaa faufaa roa, o te oreroraa parau ïa no te faaipoiporaa vauvauhia e te hoê taeae Ite no Iehova e 30 minuti i te maoro. E oreroraa parau mahanahana teie e te faaitoito o te faataa e nafea te Bibilia e tauturu ai i na hoa faaipoipo ia fanaˈo i te hoê faaipoiporaa oaoa, î i te here e o te mau papu.—Ephesia 5:33.

I te fenua e rave rahi, e faatia te faatereraa i te mau Ite no Iehova ia haamana i te mau faaipoiporaa. I roto i tera tupuraa, ia oti te oreroraa parau, e euhe na hoa faaipoipo i te tahi e te tahi. E nehenehe atoa raua e horoa i to te tahi e te tahi tapea rima. I reira te Ite no Iehova tei faatiahia ia faaipoipo ia raua e nehenehe e parau e tane e e vahine faaipoipo raua.

I te tahi atu mau fenua, e titau te ture ia faaipoipo na taata i te hoê piha ohipa a te hau. E na reira raua na mua noa ˈˈe i te oreroraa parau no te faaipoiporaa. Ia ore na hoa faaipoipo e euhe i mua i mua i te tia a te hau, e nehenehe raua e na reira ia oti te oreroraa parau. E mai te peu ua euhe aˈena raua i mua i te tia a te hau, e nehenehe raua e na reira faahou ia hope te oreroraa parau ma te paraparau i te tau ahemo. E faaotihia te oreroraa parau na roto i te hoê pure no te ani i te Atua ia haamaitai i na hoa faaipoipo.

Ihea e faatupuhia ˈi te faaipoiporaa a te mau Ite no Iehova?

Mea rahi te Ite no Iehova te maiti i te faatupu i to ratou oroa faaipoiporaa i te hoê Piha a te Basileia.b E e maiti ratou i te tahi atu vahi no te tamaaraa, mai te peu e faatupuhia te hoê tamaaraa.

O vai te nehenehe e haere atu?

Ia faatupuhia te faaipoiporaa i te hoê Piha a te Basileia, o te taata atoa ïa te nehenehe e haere atu, oia hoi te Ite no Iehova tae noa ˈtu te feia e ere i te Ite no Iehova. No te tamaaraa râ, e maiti na hoa faaipoipo o vai ta raua e titau manihini.

Eaha te ahu e oomo?

Aita e faatureraa no nia i te ahu e titauhia ia oomo ia tupu te faaipoiporaa i te Piha a te Basileia. Te tutava nei râ te mau Ite no Iehova i te pee i te mau aratairaa Bibilia, oia hoi ia ahu mai ratou ma te tano e te tura. E oaoa ratou ia na reira atoa vetahi ê. (Timoteo 1, 2:9) E ia maiti na hoa faaipoipo i te faatupu i te hoê tamaaraa? E tano atoa ïa teie mau aratairaa Bibilia no te tamaaraa.

E nehenehe anei e horoa i te ô?

Te faaitoito nei te Bibilia ia faaite i te aau horoa noa. (Salamo 37:21) Te oaoa nei te mau Ite no Iehova i te horoa e i te fanaˈo i te ô no te oroa faaipoiporaa. (Luka 6:38) Eita râ te mau Ite no Iehova e titau e e ani i te mau ô taa maitai aore ra e faaite i mua i te taatoaraa na vai i horoa i tera e tera ô. (Mataio 6:3, 4; Korinetia 2, 9:7; Petero 1, 3:8) Te patoi ra ïa te reira i ta te Bibilia e parau ra e e huru ê atoa te taata.

E afaihia anei te hapaina i nia a paraparau atu ai?

Aita te Bibilia e opani ra ia afai i te hapaina i nia, e nehenehe râ na hoa faaipoipo e ani i ta raua mau manihini eiaha e afai i te hapaina i nia ia ore vetahi ê ia huru ê.—Roma 14:21.

E tauehia anei te raiti aore ra te tahi atu mea i nia i na hoa faaipoipo?

Eita roa ˈtu. I te tahi mau vahi, e taue te taata i te raiti aore ra te tahi atu mea i nia i na hoa faaipoipo. I to ratou manaˈo, maoti te reira e oaoa ˈi na hoa faaipoipo e e mau papu ai to raua faaipoiporaa. Eita râ te mau Ite no Iehova e rave i te mau peu niuhia i nia i te peu tahutahu. Eita ratou e parau atu “Ia manuïa orua!” no te mea te patoi ra te reira i ta te Bibilia e parau ra.—Isaia 65:11.

E tamaa e e inu anei ratou i tera oroa?

Aita e tamaaraa e e inuraa i te oroa faaipoiporaa tei te Piha a te Basileia anaˈe te reira. E maiti vetahi mau hoa faaipoipo i te faatupu i te hoê tamaaraa i muri iho. (Koheleta 9:7) Ia faaoti na hoa faaipoipo i te rave atoa mai i te ava, e haapao maitai raua ia tanotano noa te reira e ia horoahia i te feia noa ua tia to ratou matahiti.—Luka 21:34; Roma 13:1, 13.

E faataˈihia anei te upaupa? E oriraa anei?

Ia faatupu na hoa faaipoipo i te hoê tamaaraa, e maiti paha raua i te faanaho i te upaupa e te ori. (Koheleta 3:4) E maiti raua i te upaupa ta raua e au e tei fariihia ia au i to raua taˈere. Tera râ, e maiti iho â raua i te upaupa maitai o te ore e faaturori ia vetahi ê. Ia faatupuhia te oroa faaipoiporaa i te Piha a te Basileia, e faataˈihia te upaupa ua niuhia te manaˈo tumu i nia i te Bibilia.

E faatupu anei te mau Ite no Iehova i te oroa matahiti o to ratou faaipoiporaa?

I te mea aita e faaueraa tumu Bibilia o te farii aore ra o te opani ia faatupu i te oroa matahiti o te faaipoiporaa, na te mau hoa faaipoipo Ite no Iehova tataitahi e faaoti. Ia hinaaro ratou e faatupu i tera oroa matahiti, e na reira ratou e to ratou hoa faaipoipo aore ra to ratou mau hoa e utuafare.