E nafea te mau Ite no Iehova e faaohipa ˈi i te mau ô?
Te faaohipa nei matou i te mau ô no te turu i te mau ohipa i te pae o te faaroo a ta matou faanahonahoraa e no te tauturu i te taata. E tuhaa te reira o ta matou hopoia matamua, oia hoi ia tauturu i te taata ia riro ei pǐpǐ na Iesu Mesia.—Mataio 28:19, 20.
Aita roa ˈtu matou e faaohipa i te mau ô ia taoˈahia mai te tahi taata. Aita matou e aufau i te mau matahiapo aore ra te tahi noa ˈˈe tavini. Aita atoa te mau Ite no Iehova e aufauhia no te poro i tera e tera fare. Ua riro te feia e tavini ra i te Betela e i ta matou pu rahi, oia atoa to te Tino aratai, ei mero o ta matou faanahonahoraa faaroo.
Hiˈoraa o ta matou mau ohipa
Piaraa: E huri, nenei, hapono e horoa matou e mirioni Bibilia e te tahi atu mau papai Kerisetiano i te matahiti tataitahi ma te tamoni ore. Hau atu, maoti ta matou reni natirara jw.org e te ravea roro uira JW Library, e nehenehe e rave mai i ta matou i pia. Aita e anihia ia aufauhia te reira e aita matou e faaohipa nei i te mau poroi faatianianiraa ia aufauhia matou.
Paturaa e atuaturaa: Te patu e te atuatu nei matou i te mau vahi haamoriraa haihai na te ao nei ia nehenehe ta matou mau amuiraa e fanaˈo i te vahi tano no te putuputu e no te arue i te Atua. Hoê â huru no te mau piha ohipa e piha huriraa. Te rahiraa o te ohipa, na te mau rima tauturu e rave nei. Mea mâmâ aˈe ïa te mau haamâuˈaraa.
Tereraa ohipa: E tere te ohipa i ta matou pu rahi, Betela e piha huriraa, oia atoa ta te feia e tavini ra ei ratere, maoti te mau ô horoahia no ta matou taviniraa na te ao nei.
Pororaa: Aita te mau Ite no Iehova e aufauhia no te pororaa i te parau apî oaoa aore ra no te haapiiraa ˈtu ia vetahi ê “i te parau a te Atua.” (Korinetia 2, 2:17) Tera râ, mai ta te mau Kerisetiano i rave i te senekele matamua, e horoahia i te mau tavini maitihia e faaineinehia o te rave i te rahiraa o to ratou taime no te poro i te hoê tino moni haihai no te mau haamâuˈaraa i te pae o te nohoraa e no te mau mea faufaa o te oraraa.—Philipi 4:16, 17; Timoteo 1, 5:17, 18
Haapiiraa: E turuhia ta matou mau tairururaa maoti te mau ô horoa noa. Hau atu, te pia nei matou i te mau haruharuraa e porotarama video niuhia i nia i te Bibilia. Te faatere atoa nei matou i te mau haapiiraa o te faaineine i te mau matahiapo e te mau tavini taime taatoa ia aravihi atu â ratou i roto i ta ratou taviniraa.
Tauturu i mua i te ati: E horoa matou i te maa, te pape e te nohoraa i te feia tei roohia i te ati natura e i te mau fifi mai te tamaˈi, te ohipa totoaraa e te vai ra ˈtu â. E ere noa te “mau taeae e tuahine i roto i te faaroo” te fanaˈo i taua mau tauturu ra, oia atoa te feia e ere i te Ite no Iehova.—Galatia 6:10.