Te vai ra anei te hoê faatereraa o te nehenehe e faatere i nia i te fenua? Eaha ta te Bibilia e parau ra?

Ua arepurepu te mau faatereraa na te ao nei. I roto i te mau fenua te manaˈohia ra mea papu te faatereraa, mea rahi roa râ te mau ohipa tano ore i roto i te mau faatereraa, aita te mau maitiraa i manuïa, te amahamaharaa i roto i te ohipa poritita e te mau patoiraa uˈana a te taata.

Ua faaite te Bibilia te vai ra te hoê faatereraa mea papu. Ua faaroo aˈena paha outou no nia i taua faatereraa ra. Ua faahiti Iesu i te reira i roto i te pure a te Fatu.

“E na ô ïa outou ia pure: ‘To matou Metua i te raˈi, ia moˈa to oe iˈoa. Ia tae mai ta oe Faatereraa arii. Ia tupu to oe hinaaro i te fenua nei, mai i te raˈi atoa na.’”—Mataio 6:9, 10.

Eaha ta te Bibilia e parau ra no nia i teie Faatereraa arii?

Te Faatereraa arii, hoê faatereraa papu

Te faatere ra te Faatereraa arii mai te raˈi mai.

Ua pii Iesu i teie faatereraa “te Faatereraa arii o te raˈi.” (Mataio 4:17; 5:3, 10, 19, 20) No reira oia i parau ai: “E ere ta ˈu Faatereraa arii no teie nei ao.”—Ioane 18:36.

E mono te Faatereraa arii i te mau faatereraa taata.

Te na ô ra te Bibilia: “E faahuˈahuˈa e e haamou [te Faatereraa arii] i tera mau faatereraa arii [taata] atoa, e o ˈna anaˈe te vai mai e a muri noa ˈtu.”—Daniela 2:44.

Iesu Mesia ei arii, eita roa te Faatereraa arii e haamouhia.

Te na ô ra te Bibilia: “E mana faatere mure ore to ˈna, o te ore roa e hope e e ore roa ta ˈna faatereraa arii e haamouhia.”—Daniela 7:13, 14.

E hopoi mai te Faatereraa arii i te hau e te ati ore i nia i te fenua.

Te na ô ra te Bibilia: “E parahi ratou tataitahi i raro aˈe i ta ratou tumu vine e ta ratou tumu suke, e eita hoê e faariaria ia ratou.”—Mika 4:4.

Haapii atu â no nia i te Faatereraa arii

I to Iesu haereraa mai i nia i te fenua, ua faaohipa oia i to ˈna taime no te ‘poro i te parau apî oaoa o te Faatereraa arii.’ (Mataio 9:35) Te na ô ra oia:

“E porohia te parau apî oaoa o te Faatereraa arii e ati aˈe te fenua ia ite te mau nunaa atoa, i reira ïa te hopea e tae mai ai.”—Mataio 24:14.

I teie mahana, e porohia te parau apî oaoa o te Faatereraa arii i roto hau atu 240 fenua. Te titau manihini nei matou ia oe ia haapii hau atu â i nia i teie faatereraa e e nafea oe e faufaahia i te reira.

A mataitai i te video Eaha te Basileia o te Atua?