2023, hoê matahiti ahoaho mau: Eaha ta te Bibilia e parau ra?

I te matahiti 2023, ua haapapu te mau tupuraa na te ao nei e te ora ra tatou “i te mau mahana hopea.” (Timoteo 2, 3:1) A tapao na e nafea te mau tupuraa i teie mahana e tuati ai e ta te Bibilia i tohu no teie tau.

Te Bibilia e te mau tupuraa na te ao

“Te tamaˈi e te parau o te tamaˈi.”—Mataio 24:6.

• “Ua rahi roa te ohipa aroraa ino mau na te ao nei.”a

“Te aueueraa fenua i tera e tera vahi.”—Mareko 13:8.

• “Mai te omuaraa o te matahiti 2023 mai â, ua tupu 13 aueueraa fenua puai mau na te ao, tera te mea ino roa ˈtu â aita i itehia aˈenei.”b

“Te mau mea riaria.”—Luka 21:11.

• “Ua hope te tau veavea, mea ino roa ˈtu râ to muri mai.”—António Guterres, tia mana o te Hau amui.c

“Te oˈe.”—Mataio 24:7.

•  “2023: Te tahi atu matahiti fifi mau no te feia o te imi ra i te ravea no faatamaa i to ratou utuafare.”d

“E tau ino mau . . . e te fifi.”—Timoteo 2, 3:1.

• “Hoê taata i nia e vaˈu na te ao nei o te fifi ra i te pae feruriraa.”e

Eaha ta tatou e tiai nei no te matahiti 2024?

Aita ta te taata e nehenehe e parau ma te papu eaha te tupu i te matahiti 2024. Tera râ, te faataa ra te mau tupuraa na te ao nei fatata te Faatereraa arii a te Atua aore ra te faatereraa i te raˈi, i te mono i te mau faatereraa a te taata e i te faaore i te ahoaho e te mauiui taatoa.—Daniela 2:44; Apokalupo 21:4.

A tiai noa ˈi, ia ahoaho noa ˈtu tatou, e nehenehe tatou e ani i te Atua i ta ˈna tauturu. Te na ô ra te Bibilia:

“Ia mǎtaˈu vau, e tuu vau i to ˈu tiaturiraa ia oe ra.”—Salamo 56:3.

Nafea tatou e faaite ai i to tatou tiaturi i te Atua? Te titau-manihini nei matou ia oe ia haapii hau atu â no nia i ta te Bibilia i tohu no te hoê a muri aˈe aita e mauiui. A tamata i ta matou faanahoraa haapiiraa Bibilia tamoni ore no te ite e nafea oe e to oe utuafare e faufaahia ˈi i te mau parau tohu Bibilia.