No te aha i rahi ai te riri? Eaha ta te Bibilia e parau ra?

I roto i te mau parau apî, ua î roa te mau faataaraa no nia i te mau taata o te faahiti ra i te mau parau ino mau aore ra te ohipa ino no te mau manaˈo oti noa no nia i te mau taata o tei hamani ino i te feia no te tahi atu nunaa e no nia i te tamaˈi.

“Ua rahi atu â te mau parau ino mau i nia i te reni faahoaraa no te aroraa i tupu i rotopu ia Iseraela e Gaza, e no te feia o te faatupu ra i te haavîraa uˈana e te riri.”—The New York Times, 15 no Novema 2023.
“Mai te 7 no Atopa, ua maraa roa te riri, te parau ino mau e te ohipa ino.”—Dennis Francis, peretiteni o te apooraa rahi a te Nunaa Amui, 3 no Novema 2023.

E ere no teie nei te mau parau ino, te haavîraa uˈana e te tamaˈi. No reira, te faataa ra te Bibilia no te feia i tahito ra, “te taora ra ratou i te parau haamauiui mai te teˈa” e te faatupu ra ratou i te tamaˈi e te haavîraa uˈana. (Salamo 64:3; 120:7; 140:1) Tera râ, te faataa ra te Bibilia e e auraa faufaa mau to te riri i teie mahana.

Te riri: Hoê tapao o to tatou tau

Te faataa ra te Bibilia e piti tumu e itehia ˈi te riri i teie mahana.

1. Te tohuhia ra i te hoê tau “e iti roa mai te here o te rahiraa.” (Mataio 24:12) Te faaite nei te rahiraa o te taata i te riri, eiaha râ te here.—Timoteo 2, 3:1-5.
2. O Satani te tumu i rahi ai te riri na te ao nei i teie mahana. Te parau ra te Bibilia e “te vai nei . . . to te ao atoa i raro aˈe i te mana o te varua ino.”—Ioane 1, 5:19; Apokalupo 12:9, 12.

Tera râ, te faaite atoa ra te Bibilia, e fatata te Atua i te faaore i te riri. Hau atu â, e faaore roa oia i te mauiui ta te riri i faatupu. Te fafau ra te Bibilia:

“E tamǎrô [te Atua] i te mau roimata atoa o to ratou mata. E ore roa te pohe, e ore atoa te oto e te auê e te mauiui. Ua mou hoi te mau mea tahito.”—Apokalupo 21:4.