E ore anei te ohipa iino faatupuhia e te au-ore-raa ia vetahi ê? Eaha ta te Bibilia e parau ra?

Mea peapea roa, te rahi noa ˈtura te ohipa iino ravehia na te taata no te au-ore-raa ia vetahi ê. E haa te taata mai te reira no te iri anei, te haapaoraa, te taˈere, e tane anei aore ra e vahine aore ra te tahi atu mau tumu. E haaparare tera huru ohipa i te mǎtaˈu i rotopu i te mau taata, e haamauiui te reira ia ratou i te pae tino e aau. Te hopearaa, e pohe atoa te taata no te ohipa iino.

Ua tohu te Bibilia i te roaraa o to tatou tau e rave rahi taata o te ‘iria, au ore i te maitai, au ore te tahi i te tahi.’ (Timoteo 2, 3:1-5) E ore anei ïa te ohipa iino? Eaha ta te Bibilia e parau ra?

E nafea te ohipa iino e ore ai?

Te haapapu mai ra te Bibilia e nehenehe ta te Atua e faaore i te ino mau e e na reira oia.

• “E haamouhia . . . te feia ohipa ino, . . . E fatu râ te feia mǎrû i te fenua, e e au roa ratou i te rahi o te hau.” (Salamo 37:9-11) Eita te Atua e vaiiho i te taata ino ia haamauiui noa i te tahi atu.

• “E tamǎrô [te Atua] i te mau roimata atoa o to ratou mata. E ore roa te pohe, e ore atoa te oto e te auê e te mauiui.” (Apokalupo 21:4) E faaore te Atua i te mauiui i te pae tino, feruriraa e aau ta te taata i faaruru.

• “E tia-faahou-raa.” (Ohipa 24:15) E faahoˈi mai te Atua e mirioni taata i te ora, te vai atoa ra te feia tei pohe no te ohipa iino.

Faaruru i te au-ore-raa ia vetahi ê i teie mahana

Hau atu i te horoaraa mai i te tiaturiraa no a muri aˈe, te haapii atoa mai ra te Bibilia e nafea ia faaruru i te au-ore-raa ia vetahi ê i teie mahana. Te titau nei matou ia outou ia hiˈopoa i te pahonoraa a te Bibilia no nia i teie mau uiraa faufaa:

• Eaha ta tatou e nehenehe e rave no te faaea i te riri o te aratai i te ohipa iino? A hiˈo i ta te Bibilia e haapii ra i roto i Te Pare Tiairaa “A haapae roa i te riri.”

• No te aha te Atua e vaiiho noa ˈi te mauiui? A mataitai i te faataaraa niuhia i nia i te Bibilia i roto i te video No te aha te Atua e vaiiho noa ˈi te mauiui?