No te aha te poritita e faaamahamaha roa ˈi? Eaha ta te Bibilia e parau ra?

E rave rahi nunaa na te ao nei tei amahamaha i te pae poritita. Ia au i tei itehia e te pu maimiraa Pew i 2022, “65% o te mau taata no na 19 fenua o tei parau e te vai ra te mau umeumeraa i to ratou fenua i rotopu i te mau taata o te turu ra i te mau pǔpǔ poritita o te uˈana noa ˈtu ra.”

Te ite atoa ra anei outou e te faaamahamaha ra te poritita i te mau taata i to outou vahi? No te aha? Te vai ra anei te ravea? A hiˈo ïa i ta te Bibilia e parau ra.

Te mau haerea o te amahamaha

Ua tohu te Bibilia e i to tatou tau, o tei faaauhia i “te mau mahana hopea,” e rave rahi taata o te faaite i te hoê haerea o te haafifi i te hoêraa.

• “Ia tae i te mau mahana hopea, e tau ino mau ïa e te fifi ia faaruru. E haapao noa te taata ia ratou iho, . . . e etaeta.”—Timoteo 2, 3:1-3.

Noa ˈtu te tutava noa ra e rave rahi taata, aita te mau faatereraa a te taata i manuïa noa ˈˈe. No te taata e ere hoê â manaˈo e to vetahi e mea fifi roa e eita atoa e haere ia ohipa amui no te imi i te ravea. Te haapapu ra te reira i ta te Bibilia i parau.

• “I faatere ai te taata i te taata no to ˈna iho ati.”—Koheleta 8:9.

E ravea râ ta te Bibilia: Hoê faatereraa o te nehenehe e faaore i te mau fifi o teie nei ao.

Hoê aratai o te tâuˈa ra

Te faaite ra te Bibilia o vai te aratai o te horoa mai i te ravea: O Iesu Mesia. E puai, e mana e e hinaaro to Iesu e aratai i te huitaata atoa i te hoêraa e te hau.

• “E tupu ruperupe mai te feia parau-tia i to ˈna mau mahana. E rahi roa te hau.”—Salamo 72:7.

• “E tavini te mau nunaa atoa ia ˈna.”—Salamo 72:11.

E aratai papu Iesu no te mea te tâuˈa e te hinaaro mau ra oia e tauturu i te taata, te mau taata iho â ra o tei faaruru i te parau-tia ore.

• “E faaora . . . oia i te taata veve o te hinaaro ra i te tauturu, oia atoa i te taata haihai e te taata aita e tauturu. E aroha oia i te taata haihai e te veve, e e faaora oia i te feia veve. E faaora oia ia ratou i te haavîraa e te hamani-ino-raa.”—Salamo 72:12-14.

No te ite atu â no nia i te Faatereraa arii a te Atua i te raˈi ta Iesu e aratai ra, a hiˈo e nafea outou e faufaahia ˈi e e turu ai i te reira.

• A mataitai i te video Eaha te Basileia o te Atua?

• A taio i te tumu parau “Te Basileia o te Atua: Hoê faatereraa aita e ohipa petaraa.”