Nafea vau e haamaitai ai i ta ˈu huru paraparau?

I roto i teie tumu parau

• No te aha e paraparau ai i te hoê taata mata e mata?

• E nafea ia omua i te hoê aparauraa?

• To ratou manaˈo

No te aha e paraparau ai i te hoê taata mata e mata?

No vetahi, mea fifi roa ia paraparau i te hoê taata mata e mata, ia faaau anaˈe ratou i te mau poroi ta ratou e hapono.

“Mea riaria atoa ia paraparau i te hoê taata mata e mata, no te mea eita ta oe e nehenehe e taui aore ra e faaore te mea ta oe i parau.”—Anna.

“E au te haponoraa i te hoê poroi, i te hoê porotarama tei haruharu-aˈena-hia, area ia paraparau oe i te hoê taata, e paraparau tia ˈtu ïa oe i tera taata i tera iho â taime. Te mea noa ta ˈu e manaˈo ia paraparau vau: ‘Eiaha ia hape ta ˈu parau!’”—Jean.

Tera râ, e titauhia ia oe i muri aˈe, te aravihi no te paraparau i te hoê taata. Ei hiˈoraa, e titauhia ia oe tera aravihi ia hinaaro oe e faahoa ia vetahi ê, ia noaa e ia tapea mai i te hoê ohipa aore ra ia haamatau e te tahi taata ia ineine oe.

Te mea papu, te paraparauraa mata e mata e ere tena te fifi. E nehenehe oe e imi i te ravea no te faaau atu, noa ˈtu mea mamahu roa oe.

“I te tahi taime, e parau paha oe i te mau parau tano ore a haama roa ˈtu ai oe. A ata i nia i to oe mau hape, mea au aˈe.”—Neal.

E nafea ia omua i te hoê aparauraa?

• A tuu i te mau uiraa. A haamanaˈo i te hoê tumu parau o te anaanatae i te taata, e i muri iho, a faaohipa i te reira ei aparauraa. Ei hiˈoraa:

  “I te tau faafaaearaa haapiiraa, ua ratere anei oe na te ara?”

  “Mea au roa teie reni natiraa. Ua haere aˈena anei oe i nia iho?”

  “Ua faaroo aˈena anei oe no nia . . . ?”

  Ia papu atu â ia oe, a haamanaˈo i ta oe i matau i te rave e te tahi atu taata. Ei hiˈoraa, hoê â anei ta orua fare haapiiraa aore ra hoê â anei ohipa ta orua? A faaohipa i ta orua i matau i te rave i roto i ta oe mau uiraa.

  

  “A feruri i te mau uiraa mea au na oe, e hinaaro atoa ˈi oe e ite i te pahonoraa a vetahi.”—Maritza.

  A ara: E ere oe i te mutoi i te uiui-maere-raa ma te hue noa i te mau uiraa. Eiaha atoa e tamata i te faaô i to oe ihu i roto i to ˈna oraraa. Ma teie mau uiraa: “Eaha te mea ta oe e mǎtaˈu rahi roa?” aore ra “No te aha mea au roa na oe te û ninamu? E nehenehe te piti o te uiraa e manaˈohia e te faaooo ra oe ia ˈna!

  Eiaha atoa e riro mai mai te hoê mutoi ma te uiui ia ˈna mai te peu i muri aˈe i te tuuraa i te mau uiraa, horoa atoa ˈtu oe i to oe iho manaˈo. E aparauraa noa teie e ere i te uiuiraa manaˈo.

  

  Aratairaa Bibilia: “E au te manaˈo o te taata i te pape hohonu, na te taata haroˈaroˈa râ e huti mai i te reira.”—Maseli 20:5.

• A faaroo maitai. E manuïa ta orua aparauraa, ia faaroo maite oe i te paraparau-noa-raa.

  “Ua haamau vau ei fa e haapii hau atu â ohipa apî no nia i te tahi taata o ta ˈu e paraparau atu. I muri aˈe, e haamanaˈo vau i ta teie taata i parau mai a nehenehe atu ai au e tuu i te hoê uiraa no te tahi atu aparauraa.”—Tamara.

  A ara: Eiaha e haapeapea i ta oe e parau i muri aˈe. Ia faaroo maite oe, e taa ia oe eaha te parau i te tahi atu taata.

  Aratairaa Bibilia: “Ia ineine . . . i te faaroo e tia ˈi, eiaha e ru i te paraparau.”—Iakobo 1:19.

• A faaite i te anaanatae mau. E anaanatae rahi aˈe oe i te hoê aparauraa ia haapeapea oe no nia i te tahi taata ta oe e paraparau ra.

  

  “Ia faaite oe i te tahi taata e te haapeapea ra oe i ta ˈna e parau ra, e au te aparauraa, noa ˈtu hoa ïa te vai rii ra te haama.”—Marie.

  A ara: Eiaha e faaô roa i to oe ihu i roto i to ˈna oraraa. Ma te parau e: “Mea nehenehe to oe pereue. Ehia moni te hooraahia mai e oe?” ua rahi roa ïa tena!

  Aratairaa Bibilia: “A imi atoa ˈi i to vetahi ê maitai, eiaha noa râ i to outou iho.”—Philipi 2:4.

Nafea ia faaoti i te hoê aparauraa? Ua parau te hoê taurearea o Jordan te iˈoa: “A faaoti i nia i te hoê manaˈo maitai.” “Mai teie: ‘Ua au roa vau i ta taua aparauraa’ aore ra ‘maitai teie mahana,’ e ohie ïa te aparauraa ia farerei atu oe i tera taata i muri iho.”