E faahohoˈa te taata taoˈa rahi e o Lazaro ia vai ma?

Te pahonoraa a te Bibilia

I roto i te hoê o ta ˈna mau faatiaraa, ua faahiti Iesu i te parau o te taata taoˈa rahi e o Lazaro. (Luka 16:19-31) I roto i teie aamu, e faahohoˈa na piti taata i to muri nei na pǔpǔ taata e piti: (1) te mau tia faaroo teoteo ati Iuda i te tau o Iesu e (2) te feia haehaa tei farii i te poroi a Iesu.

I roto i teie tumu parau

• Eaha ta Iesu i parau no nia i te taata taoˈa rahi e o Lazaro?

• Ua tupu mau anei teie aamu?

• Te turu ra anei teie aamu i te haapiiraa o te po auahi?

• Eaha te auraa o te aamu o te taata taoˈa rahi e o Lazaro?

Eaha ta Iesu i parau no nia i te taata taoˈa rahi e o Lazaro?

I roto i te Luka pene 16, te faataa ra Iesu i na piti taata tei taui roa to raua oraraa.

Teie mai te tahi haapotoraa o ta Iesu i faahiti: Mea fanaˈo roa te oraraa o te hoê taata taoˈa rahi. I vaiihohia na te hoê taata veve e te taparu o Lazaro te iˈoa, i te uputa o te fare o te taata taoˈa rahi. E hiaai ra o ˈna e amu i te huˈahuˈa maa i te amuraa maa a te taata taoˈa rahi. I muri aˈe, pohe atura Lazaro e hopoihia ˈtura oia e te mau melahi i pihai iho ia Aberahama. Pohe atoa ˈtura te taata taoˈa rahi e tanuhia ˈtura oia. I roto i te aamu, te ora noa ra na piti taata i muri aˈe i to raua poheraa. Te mauiui ra te taata taoˈa rahi i roto i te auahi ura e ani atura oia ia Aberahama ia tono ia Lazaro, ia tuu oia i to ˈna manimani rima i roto i te pape, a faatopatapata ˈtu ai i nia i to ˈna arero. Ua patoi râ Aberahama i ta ˈna aniraa. Ua parau atoa o ˈna e ua taui roa te tupuraa o na piti taata. Inaha, ua tuuhia hoê area rahi i rotopu ia raua, ia ore te tahi e haere i te tahi atu pae.

Ua tupu mau anei teie aamu?

Aita. E faahohoˈaraa teie na Iesu no te horoa i te hoê haapiiraa. Tera atoa te manaˈo o te tahi mau taata ite. Ei hiˈoraa, te parauhia ra i roto i te hoê nota o te Bibilia La Bible de Jérusalem: “E faahohoˈaraa noa teie, aita te mau taata faahitihia i roto i ora mau.”

Ua haapii anei Iesu e e ora noa te taata i muri aˈe i te pohe? Ua hinaaro anei o ˈna e parau e e mauiui vetahi taata i roto i te po auahi i muri aˈe i te pohe, area o Aberahama e o Lazaro tei te raˈi ïa raua? E rave rahi haapapuraa o te faaite ra e ere roa ˈtu te reira ta Iesu i hinaaro e parau.

Ei hiˈoraa:

• Mai te peu tei roto iho â te taata taoˈa rahi i te po auahi, e nehenehe anei te pape i nia i te manimani rima o Lazaro e vai noa mai?

• E noa ˈtu e nehenehe maa pape rii e vai noa mai, e navai anei te reira no te tamarû i te taata taoˈa rahi e mauiui ra i roto i te auahi?

• Mea nafea Aberahama i te oraraa i te raˈi, inaha hoi ua parau Iesu e aita hoê aˈe taata tei haere aˈenei i te raˈi?—Ioane 3:13.

Te turu ra anei teie aamu i te haapiiraa o te po auahi?

Aita. Noa ˈtu e aamu noa, e rave rahi taata te manaˈo ra e te faaite ra te reira e e haere te taata maitatai i te raˈi, area te feia ohipa ino e haamauiuihia ïa i roto i te po auahi.a

Mea tano anei râ tera manaˈo? E ere.

Aita te haapiiraa o te po auahi e tuati ra i ta te Bibilia e parau ra no nia i te feia pohe. Ei hiˈoraa, aita te Bibilia e parau ra e e haere te taata maitatai i te raˈi aore ra e haamauiuihia te feia ohipa ino i roto i te hoê po auahi. Inaha, te faataa maitai ra te Bibilia: “Ua ite . . . te feia ora e pohe ratou, aita râ te feia pohe i ite i te tahi mea.”—Koheleta 9:5.

Eaha te auraa o te aamu o te taata taoˈa rahi e o Lazaro?

Te faaite ra teie aamu e fatata roa te tupuraa o na piti pǔpǔ taata i te taui.

Te faahohoˈahia ra te taata taoˈa rahi i te mau tia faaroo ati Iuda “nounou moni.” (Luka 16:14) Ua faaroo ratou i ta Iesu poroi, aita râ ratou i farii i te reira. Ua haafaufaa ore teie mau tia faaroo i te huiraatira.—Ioane 7:49.

Te faahohoˈahia ra Lazaro i te feia tei farii i te poroi a Iesu e ta te mau tia faaroo ati Iuda i haafaufaa ore.

Ua taui taue noa te tupuraa o na piti pǔpǔ.

• Ua manaˈo te mau tia faaroo ati Iuda e te fanaˈo ra ratou i te farii maitai a te Atua. Tera râ, mai te huru ra e ua pohe ratou, inaha hoi ua patoi te Atua ia ratou e i ta ratou huru haamoriraa no te mea aita ratou i farii i te poroi a Iesu. Hau atu, ua mauiui ratou i te poroi ta Iesu e ta ta ˈna mau pǐpǐ i poro.—Mataio 23:29, 30; Ohipa 5:29-33.

• Ua haafaufaa ore te mau tia faaroo ati Iuda i te feia haehaa. I teie nei râ, te fanaˈo ra taua feia i te farii maitai a te Atua. E rave rahi o ratou tei farii i te poroi a Iesu e tei faufaahia i te reira. I muri mai, e nehenehe ïa ratou e fanaˈo i te farii maitai a te Atua e a muri noa ˈtu.—Ioane 17:3.