A tauturu i ta oe piahi ia faaoti e tavini ia Iehova

1-2. (1) No te aha te tahi mau piahi e taiâ ˈi i te faaoti e tavini ia Iehova? (2) Eaha ta tatou e hiˈopoa i roto i teie tumu parau?

UA FEAA anei oe i te riro mai ei Ite no Iehova? Peneiaˈe no to oe mǎtaˈu ia huri tua to oe mau hoa ohipa, hoa, aore ra fetii ia oe. Ua manaˈo atoa paha oe eita e haere ia oe ia pee i te mau ture aveia a te Atua. Mai te peu tera iho â, e taa ïa ia oe no te aha te taiâ ra te tahi mau piahi i te tavini ia Iehova.

² Ua ite Iesu e nehenehe teie mau manaˈo taiâ e tapea i te hoê taata ia nuu i mua i te pae varua. (Mat. 13:20-22) Teie râ, ua tamau o ˈna i te tauturu i te feia tei mǎtaˈu i te pee ia ˈna. Inaha, ua haapii o ˈna i ta ˈna mau pǐpǐ ia tauturu i taua mau taata ra. A tahi, ia ite ratou eaha te haafifi ra ia ratou ia nuu i mua i te pae varua. A piti, ia here atu â ratou ia Iehova. A toru, ia tuu ia Iehova na mua roa i roto i to ratou oraraa. A maha, ia ite ratou eaha te rave i mua i te mau fifi. A faatere ai tatou i te haapiiraa i nia i te buka Ia ora oe e a muri noa ˈtu!, e pee anaˈe i ta Iesu huru haapiiraa no te tauturu i ta tatou piahi ia faaoti e tavini ia Iehova.

A TAUTURU I TA OE PIAHI IA ITE EAHA TE HAAFIFI RA IA ˈNA

3. No te aha Nikodemo i taiâ ˈi i te riro mai ei pǐpǐ na Iesu?

³ I taiâ na Nikodemo, te hoê raatira ati Iuda, i te riro mai ei pǐpǐ na Iesu. E ono noa avaˈe i muri aˈe i to Iesu haamataraa i ta ˈna taviniraa, ua taa ia Nikodemo e na te Atua i tono mai ia Iesu. (Ioa. 3:1, 2) No to ˈna râ “mǎtaˈu i te ati Iuda,” ua haere atu Nikodemo ia Iesu ra i te po. (Ioa. 7:13; 12:42) Ua manaˈo paha o ˈna e tatarahia to ˈna tiaraa raatira ia riro mai oia ei pǐpǐ na Iesu.a

4. Mea nafea to Iesu tautururaa ia Nikodemo ia taa eaha ta Iehova e hinaaro ra ia rave o ˈna?

⁴ Ua matau Nikodemo i te Ture a Mose. Aita râ i taa ia ˈna eaha ta Iehova e titau mai ra ia ˈna. Ua tauturu râ Iesu ia ˈna ma te rave i te taime no te paraparau ia Nikodemo noa ˈtu e po. Ua faataa Iesu eaha te titauhia ia riro mai o ˈna ei pǐpǐ. Te auraa ia tatarahapa o ˈna i ta ˈna mau hara, ia bapetizohia o ˈna i te pape, e ia faatupu i te faaroo i te Tamaiti a te Atua.—Ioa. 3:5, 14-21.

5. E nafea ia tauturu i ta tatou piahi ia ite eaha te haafifi ra ia ˈna ia nuu i mua i te pae varua?

⁵ Ua taa maitai paha i ta tatou piahi te mau haapiiraa Bibilia. Tera râ, e hinaaro paha o ˈna i te tauturu no te ite eaha te haafifi ra ia ˈna ia nuu i mua i te pae varua, ta ˈna ohipa anei aore ra te patoiraa a te fetii. No reira, a faataa i te taime no ta oe piahi. E nehenehe oe e titau ia ˈna no te tamaa aore ra no te hahaere. I tera taime, e faatia mai paha o ˈna i to ˈna tupuraa, a ite ai oe i te mau fifi ta ˈna e faaruru ra. I reira ïa oe e tauturu ai ia ˈna ia rave i te mau tauiraa titauhia no te faaoaoa ia Iehova.

6. E nafea ia tauturu i te hoê piahi ia noaa ia ˈna te itoito no te faaohipa i ta ˈna i haapii mai? (Korinetia 1, 16:13)

⁶ Ua papu anaˈe i ta tatou piahi e tauturu Iehova ia ˈna ia rave i te mea maitai, e itoitohia o ˈna no te faaohipa i ta ˈna i haapii. (A taio i te Korinetia 1, 16:13.) E nehenehe ta tatou hopoia e faaauhia i ta te hoê orometua haapii. Te haamanaˈo ra paha tatou i te hoê orometua ta tatou i au roa i te haapiiraa. No te aha? Aita hoi o ˈna i horoa noa mai i te haapiiraa, ua tauturu atoa mai râ ia tiaturi papu e maraa iho â ia tatou. Hoê â huru ia faatere tatou i te haapiiraa Bibilia. E ere noa no te haapii i te piahi eaha ta Iehova e titau mai ra. Ia papu atoa râ ia ˈna e maoti Iehova, e haere ia ˈna ia rave i te mau tauiraa i roto i to ˈna oraraa. E nafea ïa tatou?

A TAUTURU I TA OE PIAHI IA HERE ATU Â IA IEHOVA

7. Mea nafea to Iesu tautururaa i te feia e faaroo ra ia ˈna ia here roa ˈtu â ia Iehova?

⁷ Ua ite Iesu e ua here anaˈe ta ˈna mau pǐpǐ ia Iehova, e faaohipa ratou i ta ratou i haapii mai. Pinepine hoi Iesu i te haapii ia ratou i te mau mea e here roa ˈtu ai ratou ia Iehova. Ei hiˈoraa, ua faaau Iesu ia Iehova i te hoê metua o te horoa i te mea maitai na ta ˈna mau tamarii. (Mat. 7:9-11) Aita paha vetahi o te faaroo ra ia Iesu i paari i pihai iho i te hoê papa î i te here. Eita e ore, ua putapû roa ratou i te aamu o te hoê papa aumihi ta Iesu i faatia. Inaha, ua farii maitai taua papa ra i ta ˈna tamaiti tei hoˈi mai na ta ˈna ohipa haapaoraa ore. Ua tauturu Iesu ia ratou ia taa e mea here na Iehova ia ratou.—Luka 15:20-24.

8. E nafea ia tauturu i ta oe piahi ia here atu â ia Iehova?

⁸ E nehenehe atoa oe e tauturu i ta oe piahi ia here atu â ia Iehova. E nafea? Ma te faahiti pinepine i te mau huru maitatai o Iehova i roto ta ˈna haapiiraa. E ite ïa o ˈna i te haapapuraa o to Iehova here i roto i ta ˈna e apo mai ra. Ia faataa oe i te parau o te hoo, a tauturu i ta oe piahi ia taa e ua horoa mai Iehova i taua ô ra, eiaha noa no te huitaata, no to ˈna atoa râ here ia ˈna. (Roma 5:8; Ioa. 1, 4:10) Ia taa i ta oe piahi mea here na Iehova ia ˈna, e rahi roa ˈtu ïa to ˈna here no Iehova.—Gal. 2:20.

9. Eaha tei tauturu ia Michael ia taui i to ˈna huru oraraa?

⁹ E hiˈo mai tatou i te tupuraa o Michael, no Initonetia. Ua paari o ˈna i roto i te parau mau, aita râ o ˈna i bapetizohia. I te 18raa o to ˈna matahiti, ua reva o ˈna i te ara no te rave i te ohipa ei faahoro pereoo. I muri mai, ua hoˈi o ˈna i to ˈna fenua no te faaipoipo. Tera râ, ua reva faahou o ˈna no ta ˈna ohipa, a vaiiho mai ai i ta ˈna vahine e ta raua tamahine. I tera taime, te haapii ra ta ˈna vahine e ta raua tamahine i te Bibilia, e ua faaohipa i ta raua i apo mai. I te poheraa to ˈna mama i hoˈi mai ai Michael no te haapao i to ˈna papa. Farii atura o ˈna e haapii i te Bibilia. Ua putapû roa o ˈna i te tuhaa “A faahohonu atu â” o te haapiiraa 27 o te buka Ia ora oe e a muri noa ˈtu! Ua taˈi Michael a feruri ai i te mauiui rahi o Iehova i te haapoheraahia ta ˈna Tamaiti. Taa ˈtura ia ˈna e mea here iho â na Iehova e na Iesu ia ˈna. No to ˈna mauruuru rahi, ua rave o ˈna i te mau tauiraa i roto i to ˈna oraraa e ua bapetizohia o ˈna.

A TAUTURU I TA OE PIAHI IA TUU IA IEHOVA NA MUA ROA

10. Mea nafea to Iesu tautururaa i ta ˈna mau pǐpǐ matamua ia tavini atu â ia Iehova? (Luka 5:5-11) (A hiˈo atoa i te hohoˈa.)

¹⁰ Ua taa oioi i te mau pǐpǐ matamua o Iesu te Mesia fafauhia. Teie râ, ua hinaaro ratou i te tauturu no te tuu i te taviniraa na mua roa i roto i to ratou oraraa. Ua riro ê na Petero raua Anederea ei pǐpǐ, inaha i titau na Iesu ia raua ia pee mai ia ˈna ma te taime taatoa. (Mat. 4:18, 19) E ravaai raua na mua ˈˈe, mai ia Iakobo raua Ioane. E au ra ua ohipa amui ratou, e mea tere maitai ta ratou imiraa. (Mar. 1:16-20) I to Petero raua Anederea ‘vaiihoraa i ta raua upeˈa,’ ua manaˈo paha raua i te tahi mau ravea no te aupuru i to raua utuafare a pee noa ˈi ia Iesu. Na te aha i turai ia raua ia vaiiho i ta raua ohipa? Ia au i te Evanelia a Luka, maoti ïa te hoê semeio ta Iesu i faatupu i papu roa ˈtu â ˈi ia raua e aupuru Iehova ia raua.—A taio i te Luka 5:5-11.

11. Eaha ta oe e nehenehe e faatia i ta oe piahi ia puai to ˈna faaroo ia Iehova?

¹¹ Aita e mana to tatou no te faatupu i te semeio mai ia Iesu. Teie râ, e nehenehe tatou e faatia i ta tatou piahi i ta Iehova e rave ra no te feia e tuu ra ia ˈna na mua roa. Te haamanaˈo ra paha oe i to Iehova tautururaa ia oe ia haere i te mau putuputuraa. Ua faataa paha oe i ta oe paoti ohipa eita oe e rave faahou i te hora hau, no te mea eita oe e hinaaro e mairi i te putuputuraa. E nehenehe ïa oe e faatia i to oe tupuraa i ta oe piahi. E faataa ïa oe ia ˈna e ua puai roa to oe faaroo i to oe iteraa e te turu ra Iehova i ta oe faaotiraa e tuu ia ˈna na mua roa i roto i to oe oraraa.

12. (1) No te aha mea maitai ia ani i te mau taeae e tuahine ia apiti mai i ta tatou haapiiraa Bibilia? (2) Eaha ˈtu â ta tatou e faaohipa no te tauturu i ta tatou piahi? A horoa i te tahi hiˈoraa.

¹² Mea maitai atoa ia faaroo ta tatou piahi i te faatiaraa a te tahi atu mau taeae e tuahine. Na ratou ïa e faatia mai mea nafea to ratou tuuraa ia Iehova na mua roa i roto i to ratou oraraa. Mea tano ïa ia titau ia ratou ia apiti mai i ta tatou haapiiraa Bibilia. A ani ia ratou ia faatia mai mea nafea to ratou iteraa i te parau mau, e eaha ta ratou i rave no te tavini atu â ia Iehova. A mataitai atoa e ta oe piahi i te mau video i roto i te tuhaa “A faahohonu atu â” aore ra “Hiˈopoa” o te buka Ia ora oe e a muri noa ˈtu! Ei hiˈoraa, i muri iho i te mataitairaa i te video E haapao Iehova i to tatou mau hinaaro o te haapiiraa 37, a haamatara mai i te mau manaˈo faufaa o te video. Te fa, ia taa i ta oe piahi e tauturu Iehova ia ˈna ia tuu o ˈna ia Iehova na mua roa.

A TAUTURU I TA OE PIAHI IA ITE EAHA TE RAVE I MUA I TE FIFI

13. Mea nafea to Iesu faaineineraa i ta ˈna mau pǐpǐ ia faaruru i te patoiraa?

¹³ Ua parau Iesu i ta ˈna mau pǐpǐ e faaruru ratou i te patoiraa a vetahi ê e te fetii. (Mat. 5:11; 10:22, 36) Hou Iesu a pohe ai, ua faaara o ˈna i ta ˈna mau pǐpǐ e nehenehe ratou e haapohehia, no te mea te haamori ra ratou ia Iehova. (Mat. 24:9; Ioa. 15:20; 16:2) No reira o ˈna i aˈo ai ia ratou ia haapao maitai a poro ai ratou. Ei hiˈoraa, eiaha ratou e mǎrô i te feia e faahapa i ta ratou mau tiaturiraa. Ia nehenehe ratou e tamau i te poro mea maitai ia haapao ratou i ta ratou e parau e ta ratou e rave.

14. E nafea ia faaineine i ta tatou piahi ia faaruru i te patoiraa? (Timoteo 2, 3:12)

¹⁴ Mai ia Iesu, e faaineine atoa tatou i ta tatou piahi ia faaruru i te patoiraa. E faataa tatou ia ˈna eaha ta to ˈna mau hoa ohipa, hoa e fetii e parau aore ra e rave, no te mea te haapii ra o ˈna i te Bibilia. (A taio i te Timoteo 2, 3:12.) E faaooo mai paha te tahi mau hoa ohipa ia ˈna no te mau tauiraa ta ˈna e rave ra. Area te tahi atu, tae noa ˈtu te fetii, e faahapa mai ïa no ta ˈna e haapii ra i roto i te Bibilia. Mea faufaa ia faaineine oioi tatou i ta tatou piahi. Te mahana e tupu mai ai te patoiraa, ua ite ïa o ˈna eaha ta ˈna e parau e eaha ta ˈna e rave.

15. Eaha te nehenehe e tauturu i te hoê piahi ia faaruru i te patoiraa a te fetii?

¹⁵ Ia faaruru ta oe piahi i te patoiraa a te fetii, a faaitoito ia ˈna ia feruri eaha te tumu e riri ai ratou ia ˈna. Te manaˈo ra paha ratou e haavare ta te mau Ite no Iehova e haapii ra, aore ra mea ino ratou. Aita atoa vetahi fetii o Iesu i mauruuru ia ˈna, ua parau roa hoi ratou e ua maamaahia o ˈna. (Mar. 3:21; Ioa. 7:5) No reira, a haapii i ta oe piahi ia faaoromai e ia hamani maitai noa i to ˈna fetii e ia vetahi ê.

16. Eaha te tauturu i te piahi ia faaite i ta ˈna e haapii ra ma te ohie?

¹⁶ Ia uiui te fetii ia ˈna eaha ta ˈna e haapii ra, mea tano ia ore te piahi e tatara pauroa ˈtu i ta ˈna i apo mai i tera noa taime. Aita anaˈe, e painu roa ïa to ˈna fetii a mau roa ˈtu ai te aparauraa. A faaitoito ïa i ta oe piahi ia faataa ohie ia ratou ia matara noa te aparauraa a muri aˈe. (Kol. 4:6) E nehenehe atoa o ˈna e parau ia ratou ia haere i nia i te jw.org ia ite atu â ratou o vai te mau Ite no Iehova. Na ratou ïa e maiti i te taime e hiˈo ai ratou i ta tatou reni natirara e te mau tumu parau ta ratou e hinaaro e taio.

17. E nafea ia faaineine i te piahi ia pahono i te mau uiraa no nia i te mau Ite no Iehova? (A hiˈo atoa i te hohoˈa.)

¹⁷ Te vai ra te anairaa “Uiraa a te taata” i nia i te jw.org o te tauturu i ta oe piahi ia faaineine i ta ˈna mau pahonoraa poto noa i te mau uiraa a te fetii aore ra hoa ohipa. (Tim. 2, 2:24, 25) Eiaha atoa e haamoˈe i te tuhaa “Te manaˈo o vetahi” i te pae hopea o te haapiiraa tataitahi o te buka Ia ora oe e a muri noa ˈtu! A haamatau i ta oe piahi ia pahono mai na roto i ta ˈna mau parau. Eiaha e taiâ i te horoa ˈtu i te tahi mau manaˈo tauturu ia maitai atu â ta ˈna mau pahonoraa. Ia rave orua i te tahi mau faahiˈoraa no te pororaa, e ineine atu â ïa o ˈna i te faataa ia vetahi ê i ta ˈna e haapii ra.

18. E nafea ia faaitoito i ta oe piahi ia poro na muri i te amuiraa? (Mataio 10:27)

¹⁸ Ua faaue Iesu i ta ˈna mau pǐpǐ ia poro i te parau apî oaoa i te taata. (A taio i te Mataio 10:27.) Ia faaite oioi ta oe piahi i ta ˈna e haapii ra ia vetahi ê, oioi atoa o ˈna i te turui i nia ia Iehova. E nehenehe oe e tauturu ia ˈna ia haamau i tera fa. E nafea ïa? Ei hiˈoraa, ia faaarahia te amuiraa e pororaa taa ê to tera avaˈe, a faaitoito i ta oe piahi ia feruri eaha te titauhia ia rave o ˈna no te poro na muri i te amuiraa. A faataa ia ˈna e raea ia ˈna tera fa ia apiti o ˈna i tera pororaa taa ê. Te tahi atu fa no ˈna, te feruriraa ïa e horoa i te mau vauvauraa i te mau putuputuraa o te hebedoma. Ia na reira o ˈna, e aravihi atu â ïa o ˈna.

A FAAITE I TA OE PIAHI E TE TIATURI RA OE IA ˈNA

19. Mea nafea to Iesu faaiteraa i to ˈna tiaturi i ta ˈna mau pǐpǐ, e e nafea tatou e pee ai i to ˈna hiˈoraa?

¹⁹ Hou Iesu a haere ai i nia i te raˈi, ua parau o ˈna i ta ˈna mau pǐpǐ e farerei faahou ratou. Aita râ i taa ia ratou eaha ta ˈna e parau ra. Noa ˈtu râ, ua papu ia Iesu e tamau iho â ta ˈna mau pǐpǐ i te pee ia ˈna. (Ioa. 14:1-5, 8) Ua ite o ˈna e titauhia te taime e taa ˈi ia ratou te tahi mau haapiiraa, mai te tiaturiraa e ora i te raˈi. (Ioa. 16:12) Mai ia Iesu, e faaite atoa tatou i ta tatou piahi e ua papu ia tatou e te hinaaro ra o ˈna e faaoaoa ia Iehova.

20. Mea nafea to te hoê tuahine no Malawi faaiteraa i to ˈna tiaturi i ta ˈna piahi?

²⁰ A tiaturi e te hinaaro ra iho â ta oe piahi e rave i te mea maitai. Teie te hiˈoraa o tuahine Chifundo no Malawi. Te haapii ra o ˈna i te Bibilia i nia i te buka Ia ora oe e a muri noa ˈtu! e o Alinafe. E Katolika teie vahine apî. Te otiraa te haapiiraa 14, ua ani tuahine i ta ˈna piahi i to ˈna manaˈo no nia i te faaohiparaa i te hohoˈa no te haamori i te Atua. Aita roa ˈtu Alinafe i au i tera uiraa, parau atura o ˈna: “Ohipa vau ïa, na ˈu e faaoti!” Manaˈo ihora tuahine e mau paha te haapiiraa. Aita râ, ua tamau o ˈna i te faatere i ta ˈna haapiiraa. Ua papu hoi ia ˈna e taa ia Alinafe eita e tano ia faaohipa i te hohoˈa. Tau avaˈe i muri mai, i te haapiiraa 34, ua ani Chifundo ia Alinafe mea nafea ta ˈna haapiiraa Bibilia no nia i te Atua mau ra o Iehova, i te tautururaa ia ˈna tae roa mai i teie mahana. Mea rahi te haapiiraa faahiahia ta Alinafe i faahiti. Oia atoa, eita te mau Ite no Iehova e rave i te mau peu ta te Bibilia e faahapa ra. I muri noa mai, faaea ˈtura o Alinafe i te faaohipa i te mau hohoˈa no te haamori i te Atua e bapetizohia ˈtura oia.

21. E nafea tatou e tauturu ai i ta tatou piahi ia faaoti e tavini ia Iehova?

²¹ Noa ˈtu e na Iehova e “faatupu,” e hopoia atoa ta tatou e tauturu i ta tatou piahi ia nuu i mua i te pae varua. (Kor. 1, 3:7) Eita e navai ia haapii tatou ia ˈna eaha ta Iehova e titau mai ra. E tauturu atoa râ tatou ia ˈna ia here atu â ia Iehova. E faaitoito tatou ia ˈna ia tuu ia Iehova na mua roa i roto i to ˈna oraraa. E haapii atoa tatou ia ˈna ia turui i nia ia Iehova ia û o ˈna i te fifi. Ia faaite tatou i to tatou tiaturi ia ˈna, e noaa ïa ia ˈna te itoito no te pee i te mau ture aveia a Iehova, a faaoti atu ai e tavini ia ˈna.