A haamau i teie nei i te fa e bapetizo ia oe

1. (1) Eaha te tahi mau haamaitairaa ta tatou e fanaˈo ia rave i te bapetizoraa? (2) Eaha ta tatou e hiˈo mai i roto i teie tumu parau?

UA PÛPÛ anei outou ia outou ia Iehova e ua faaite anei outou i te reira ma te rave i te bapetizoraa? Mai te peu e e, ua ani ïa outou i te Atua i te hoê manaˈo haava maitai. (Pet. 1, 3:21) Ua horoa outou ïa i te hiˈoraa maitai no te feia apî e no te feia o te apiti mai i te amuiraa. E faaotiraa maitai roa ïa ta outou i rave. Eaha râ mai te peu aita â outou i bapetizohia ˈtura? Eita e ore mea here na outou ia Iehova e te hinaaro ra outou e rave i to ˈna hinaaro. Ua taa ia outou mea faufaa roa te bapetizoraa e faaorehia ˈi ta outou mau hara, a riro atu ai ei hoa piri roa no Iehova. (Ohi. 2:38-40) Tera râ, te feaa noa ra paha te manaˈo. Eaha ïa te tauturu ia outou? I roto i teie tumu parau, e pahono mai tatou i teie mau uiraa: (1) No te aha vetahi e ore ai e bapetizo ia ratou? (2) No te aha mea faufaa ia haamanaˈo te piri mai ra te hopea o teie nei ao? (3) Eaha te mau haamaitairaa ta outou e fanaˈo ia haamau i teie nei i te fa e rave i te bapetizoraa?

NO TE AHA VETAHI E ORE AI E BAPETIZO IA RATOU?

2. No te aha vetahi e ore ai e bapetizo ia ratou?

² Eita vetahi e bapetizo ia ratou no te mǎtaˈu. Ei hiˈoraa, noa ˈtu te hinaaro ra ratou e tavini ia Iehova, te mǎtaˈu nei ratou eita roa ˈtu ta ratou e nehenehe e faaoaoa ia ˈna. Mai te peu tera to outou manaˈo, a taio ïa i te mau irava Bibilia o te haapapu ra eita Iehova e titau ia tavini tatou ia ˈna ma te tia roa. Te oaoa ra o ˈna ia horoa outou i te mea maitai roa ˈˈe no ˈna. (Sal. 103:13, 14; Kol. 3:23) Ia mǎtaˈu outou i te hamani-ino-raa, a ani ia Iehova ia horoa mai i te hoê â itoito e to te papai Salamo, tei parau: “Tei pihai iho Iehova ia ˈu, e ore au e mǎtaˈu. Eaha hoi ta te taata e nehenehe e rave i nia ia ˈu?”—Sal. 118:6.

3. Eaha te tapea ra i te tahi atu ia bapetizo ia ratou? (A hiˈo atoa i te hohoˈa.)

³ Area no te tahi atu, te manaˈo ra ïa ratou aita ratou i ite papu i te Bibilia. E titauhia anei râ ia ite outou pauroa tei papaihia i roto i te Bibilia? Eita. A feruri na i teie hiˈoraa Bibilia. I te hoê po, ua faatu⁠pu Iehova i te hoê aueueraa fenua ia matara mai Paulo raua Sila i te fare tapearaa, e ua poro raua i te tiai e i to ˈna utuafare no nia ia Iesu. Ua taa paha i teie tiai e to ˈna utuafare e o te Atua to muri mai i teie semeio. Ua apo atoa mai ratou i te tahi parau faufaa no nia ia Iehova e ia Iesu. I reira noa, “bapetizohia ihora” ratou. (Ohi. 16:25-33) No reira, mai te peu ua ite outou o vai Iehova, mea here roa na outou ia ˈna, ua taa ia outou te mau haapiiraa tumu o te Bibilia, ua tatarahapa outou i ta outou mau hara, e ua faaoti outou e haapao i ta ˈna mau ture aveia, ua ineine ïa outou no te bapetizoraa.—Mar. 12:30.

4. Eaha te tahi mau tumu e ore ai vetahi e bapetizo ia ratou? (A hiˈo atoa i te hohoˈa.)

⁴ Area vetahi, e hinaaro iho â ratou e faaoaoa i te Atua. Tera râ, e hiˈo noa ratou i te titauhia ia rave. Parau mau, hou a rave ai i te hoê faaotiraa, mea maitai ia feruri eaha te titauhia ia rave. (Luka 14:27-30) No te tahi atu râ, e haapeapea ïa ratou no te mau haapaeraa e tia ia rave no te tavini i te Atua. Tera ïa tei tupu no Candace, tei paari i roto i te parau mau. I to ˈna paariraa mai, ua haapii faahou o ˈna i te Bibilia. E te parau ra o ˈna: “Ua ite au eaha te titauhia ia rave no Iehova. Tera râ, mea au roa na ˈu to ˈu oraraa. E ere ïa mea ohie ia rave i te mau haapaeraa.” E no te tahi atu, te manaˈo ra ïa eita e haere ia ratou ia haapao i ta Iehova e titau ra i te feia tei bapetizohia. Aˈunei ratou e rave ai i te hara, a tuuhia ˈtu ai ratou i rapae i te amuiraa. Mai te peu tera atoa to outou manaˈo, eaha ïa ta outou e nehenehe e rave?

5. Ia feruri tatou i te aha mai te peu te uiui ra tatou e bapetizo anei ia tatou aore ra eita? (Mataio 13:44-46)

⁵ Ia hinaaro tatou e hoo mai i te tahi ohipa, eita tatou e hiˈo noa i te haamâuˈaraa, i to ˈna atoa râ faufaaraa. Mai te peu mea faufaa roa teie ohipa, eita tatou e taiâ i te hoo mai noa ˈtu mea moni roa. Hoê â huru no te bapetizoraa, eiaha tatou e hiˈo noa i te mau tauiraa e rave. E feruri atoa râ tatou i te faufaaraa rahi o te hoê auhoaraa piri e o Iehova. Ua faaohipa Iesu e piti faahohoˈaraa no te faataa i teie manaˈo. (A taio i te Mataio 13:​44-46.) I roto i na hiˈoraa, ua oaoa roa te hoê taata i te hoo pauroa ta ˈna faufaa no te hoo mai i te hoê taoˈa faufaa roa ta ˈna i ite mai. E taoˈa faufaa roa atoa ta outou i ite mai. O te parau mau ïa no nia i te Faatereraa arii. No reira, mai te peu te uiui ra outou mea hoona anei ia ora ia au i te parau mau, a feruri maitai ïa i teie na faahohoˈaraa. A ui: ‘Ua papu anei ia ˈu e mea faufaa roa te parau apî oaoa o te Faatereraa arii? Te poihere ra anei au i to ˈu auhoaraa e o Iehova, te tiaturiraa ta ˈna i horoa mai e te fetii taeae î i te here?’ Ia au i ta outou pahonoraa, e ite ïa outou eaha te rave no te haamau i te fa e rave i te bapetizoraa.

6. Eaha te tauturu mai ia faaohipa i ta tatou e haapii mai?

⁶ I roto i te faahohoˈaraa o te taata ueue huero, ua faataa Iesu i te huru aau o te tapea i te hoê taata ia haere i mua i te pae varua. Ua faaite atoa râ o ˈna e faaroo vetahi “ma te aau maitai roa” i te parau apî oaoa, a faaohipa ˈtu ai i ta ratou i haapii mai. (Luka 8:5-15) Mai te peu te feaa ra to outou aau, eiaha e haapeapea. E tauturu hoi Iehova ia “noaa ia outou te aau apî,” te hoê aau o te farii i ta ˈna mau aratairaa. A ani ïa ia ˈna ia tauturu ia outou ia here i ta outou e haapii ra e ia faaohipa i te reira.—Ezk. 18:31; 36:26.

7-8. Eaha te tumu e ore ai vetahi feia apî e bapetizo ia ratou? (A hiˈo atoa i te hohoˈa.)

⁷ Aita te tahi feia apî, mea here hoi ia Iehova, i tapae roa i te bapetizoraa. O vetahi ê hoi te tumu. Ei hiˈoraa, e haapii paha te tahi mau orometua i ta ratou mau piahi ia farii noa i te mau peu ta Iehova hoi e ore e au. E tâpû ati râ to muri mai. (Sal. 1:1, 2; Mas. 7:1-5) No reira, ia ore outou ia fifihia, a pee i te hiˈoraa o te papai Salamo, o tei parau ia Iehova: “Mea rahi aˈe to ˈu haroˈaroˈa i to to ˈu mau orometua haapii, te feruriruri ra hoi au i ta oe mau haamanaˈoraa.”—Sal. 119:99.

⁸ O vetahi mau metua Ite no Iehova atoa te tumu. No to ratou haapeapea rahi, e turai te mau metua i ta ratou mau tamarii ia haafaufaa i te haapiiraa e te imiraa i te ohipa maitai. Aore ra eita ratou e faaitoito i ta ratou mau tamarii ia haamau i te mau fa pae varua. Ia hiˈo outou, e nehenehe anei to outou na metua e tauturu ia outou ia rave i te bapetizoraa? Mai te peu e e, a paraparau ia raua. Inaha, noa ˈtu ehia matahiti to outou, e nehenehe outou e riro ei hoa piri no Iehova.—Mas. 20:11.

9. No te aha vetahi e faanuu ai i to ratou bapetizoraa?

⁹ Te vai ra ua ineine no te bapetizoraa. Tera râ, te tiai ra ratou i te hoê taata mea piri ia ratou ia rave atoa i tera taahiraa. E hoa rahi paha taua taata ra aore ra e fetii mea here na ratou. Parau mau, e nehenehe outou e bapetizohia e o ˈna i te hoê â taime. Teie râ, mea tano anei ia faanuu i to outou bapetizoraa no teie tumu? A haamanaˈo, na outou iho i pûpû ia outou ia Iehova. E ere ïa na vetahi ê e faaoti eaha te taime e rave ai outou i te bapetizoraa.—Roma 14:12.

NO TE AHA IA HAAMANAˈO TE PIRI MAI RA TE HOPEA?

10. No te aha vetahi e haamarirau ai i te nuu i mua i te pae varua?

¹⁰ E tumu ê atu â e haamarirau ai vetahi i te nuu i mua i te pae varua. I to ratou manaˈo, mea atea â te hopea. E manaˈo tano anei râ teie? A hiˈo na i ta Iesu i faaara i ta ˈna mau pǐpǐ: “Ia ineine noa ïa [outou], no te mea i te hora manaˈo-ore-hia e outou e haere mai ai te Tamaiti a te taata nei.”—Luka 12:40.

11. Ia au i te Salamo 119:60, eaha te tupu ia matau maitai tatou ia Iehova?

¹¹ Ia pûpû tatou i to tatou oraraa ia Iehova, no to tatou ïa here ia ˈna. Inaha, a matau maitai ai tatou ia ˈna, e here iho â tatou i ta ˈna mau faaueraa. Eita ïa tatou e haamarirau i te haapao i te reira. (A taio i te Salamo 119:60.) Ua faahiti te pǐpǐ Iakobo i te tahi atu tumu faufaa e ru ai tatou i te pee i ta Iehova mau faaueraa. Aita hoê aˈe i ite eaha te tupu ananahi. Mea tano ïa ia rave tatou i “te mea maitai,” oia hoi ta Iehova e titau mai ra, i te mau mahana atoa o to tatou oraraa.—Iak. 4:13-17.

12. Eaha te haapiiraa e huti mai i ta Iesu faahohoˈaraa o te faaapu vine?

¹² A feruri na i ta Iesu faahohoˈaraa o te faaapu vine. Ua faataa Iesu e rave vetahi i te ohipa hoê noa hora, e hoê â moni tei aufauhia na ratou e na te feia tei rohi mai te poipoi e ahiahi noa ˈtu. A tapao na râ no te aha tei rohi hoê noa hora i ore ai i haamata oioi. Teie ta ratou i parau: “No te mea aita e taata i tihepu ia matou.” E ere ratou mea faatau. Ua hinaaro iho â ratou e rave i te ohipa. Inaha, i to ratou iho â tihepu-raa-hia, reva ˈtura ratou i te faaapu vine. (Mat. 20:1-16) I teie mahana, te titau mai ra Iesu ia tatou ia riro ei pǐpǐ na ˈna e ia apiti mai i te ohipa pororaa. Eiaha ïa tatou e haamarirau i te na reira.

13. Eaha te haapiiraa e huti mai i te aamu o te vahine a Lota?

¹³ E tiai â vetahi i te taui no te tavini ia Iehova ma te manaˈo e haere ia ratou ia na reira hou rii te hopea e tae mai ai. Teie râ, rahi atu â outou i te tiai, mea fifi roa ˈtu â ïa ia rave i tera mau tauiraa. Ua ite Iesu i te reira, no reira o ˈna i faaara ˈi i ta ˈna mau pǐpǐ: “A haamanaˈo i te vahine a Lota.” (Luka 17:31-35) Ua ite te vahine a Lota fatata roa Iehova i te haamou ia Sodoma e Gomora. Teie râ, aita â o ˈna i ineine atura i te vaiiho i ta ˈna mau faufaa. (Gen. 19:23-26) Te haamanaˈo atoa mai ra teie aamu eita te uputa o te ora e matara noa. Ia tae i te taime ta Iehova i faataa, e tapiri e e ponao o ˈna i tera uputa.—Luka 13:24, 25.

14. No te aha mea faufaa ia haapao i te mau parau tohu e tupu nei?

¹⁴ Ta te Bibilia i tohu no nia i te hopea o teie nei ao, te tupu nei ïa ati aˈe te ao nei. Aita paha te tahi mau mea tei tohuhia e tupu ra i to outou fenua. Noa ˈtu râ, i te mea te tupu ra i tera e tera fenua, eiaha ïa e haamarirau i te rave i te mau tauiraa no te bapetizoraa. A hiˈo na i ta Petero i papai i te tahi mau Kerisetiano: “Ua fatata . . . te hopea o te mau mea atoa. . . . A ara.” (Pet. 1, 4:7) Tera “hopea” e parauhia ra, e au ra o te taime ïa e haamouhia ˈi Ierusalema e te hiero. E te mau Kerisetiano ta Petero i papai, aita ratou i faaruru i tera ati. Aita hoi ratou e faaea ra i Ierusalema. (Pet. 1, 1:1) Noa ˈtu râ, i to ratou iho â faarooraa ua tupu tei tohuhia, ua papu atu â ia ratou e tupu pauroa ta Iehova i fafau. Hoê â huru no outou. Mea faufaa roa ia haapao maite outou i te mau parau tohu e tupu nei. Tapao faaite ïa fatata roa te hopea. Eiaha ïa e tiai faahou no te rave i te mau tauiraa no te bapetizoraa.

15. Eaha te rave no te vai ineine no to Iehova mahana? (Petero 2, 3:10-13)

¹⁵ I roto i te piti o ta ˈna rata, ua faataa Petero e nafea ia vai ineine ia tae mai to Iehova mahana. I to ˈna faahitiraa i tera parau, mea atea roa ïa taua mahana ra. Ua faaue râ o ˈna i te mau Kerisetiano ta ˈna i papai atu ia “haamanaˈo noa,” aore ra ia “hinaaro rahi,” i te mahana o Iehova. (A taio i te Petero 2, 3:10-13; nota) E haamanaˈo noa atoa ïa tatou i tera mahana ma te vai ineine e ma te tiai ru i te reira. E rave ïa tatou i “te mau ohipa tei au i te haamoriraa i te Atua anaˈe.” Ia na reira outou, e oaoa roa ïa Iehova. E rahi atu â to ˈna oaoa ia pûpû outou i to outou oraraa ia ˈna, a bapetizohia ˈtu ai.

EAHA TE MAU HAAMAITAIRAA IA ORE IA TIAI FAAHOU?

16. Eaha te taime tano no te faaoti e rave i te bapetizoraa? (Korinetia 2, 6:1, 2) (A hiˈo atoa i te hohoˈa.)

¹⁶ Teie te taime tano no te rave i te faaotiraa e bapetizo ia outou. (A taio i te Korinetia 2, 6:1, 2.) A hiˈo na i te taata tiaraa teitei no Etiopia ta Philipa i farerei. Ua taa ia ˈna eiaha o ˈna e haamarirau i te bapetizo ia ˈna. Inaha, ua taa ia ˈna te parau apî oaoa, e ite atura o ˈna i te hoê vahi pape no te bapetizoraa. Aita o ˈna i na ô: ‘Hinaaro vau e faahohonu atu â i tera parau apî oaoa. Aita e peapea, e vahi pape to ǒ roa ˈtu â.’ Teie râ ta ˈna i parau ia Philipa: “Eaha te tapea ra ia ˈu ia bapetizohia?” (Ohi. 8:26, 27, 35-39) E hiˈoraa maitai roa teie! I muri iho i to ˈna bapetizoraahia, “tamau noa ˈtura . . . oia i to ˈna tere ma te oaoa.”

17. E nafea Iehova e tauturu ai ia outou?

¹⁷ Aita â paha outou i bapetizohia ˈtura. Noa ˈtu eaha te tumu, a haamanaˈo e hinaaro iho â Iehova e tauturu ia outou ia riro ei hoa piri no ˈna. (Roma 2:4) E nehenehe o ˈna e tamǎrû i to outou mǎtaˈu e haapeapea. Na ˈna e tauturu ia outou noa ˈtu aita vetahi ê e turu ra ia outou. Ia noaa mai ia outou te hoê manaˈo haava maitai maoti to outou bapetizoraa, eita outou e tâuˈa faahou i “to muri.” (Phil. 3:8, 13) E tiai ru râ outou i “to mua,” oia hoi te mau mea ta Iehova i fafau i te feia tei pûpû i to ratou ora ia ˈna, a bapetizohia ˈtu ai.—Ohi. 3:19.