No te aha mea faufaa roa te hoo?

1-2. E hinaaro tatou ia faatiamâhia tatou i te aha, e no te aha? (Roma 7:22-24) (A hiˈo atoa i te hohoˈa.)

A FERURI na i te hoê fare tei parari. Tera noa râ, e taata to roto ua mau roa i raro aˈe i te mau patu tima. Eita hoi ta ˈna e nehenehe e hautiuti. Ta ˈna noa e nehenehe e rave, te tuôraa ïa i te taata ia faaora ia ˈna.

² Mai tera atoa to tatou tupuraa. Inaha, i to Adamu orure-hau-raa i to ˈna Atua poiete, ua riro mai o ˈna ei taata hara. I muri mai, ua raeahia pauroa ta ˈna mau tamarii i to ˈna huru taata hara. Te auraa ïa, ua peehia te huitaata taatoa i te hara no ǒ mai ia Adamu ra e te mau faahopearaa ino o te reira. Aita râ e ravea ta tatou. I roto i ta ˈna rata i to Roma, ua parau Paulo e ‘tîtî’ tatou pauroa no te hara. (A taio i te Roma 7:22-24.) Ua taparu hoi o ˈna ia faaorahia o ˈna “i te tino e aratai ra ia ˈ[na] i teie huru pohe.” Ua peehia Paulo i te hara e o te pohe te faahopearaa. (Roma 6:23) To roto atoa tatou i tera tupuraa. E hinaaro atoa tatou ia faatiamâhia tatou i te hara e te pohe.

3. Eaha ta tatou e fanaˈo maoti te hoo?

³ Te horoa atoa mai ra râ Paulo i te tahi tiaturiraa. I to ˈna uiraa: “O vai te faaora mai ia ˈu,?” teie ta ˈna i pahono: “Ia haamauruuruhia te Atua na roto ia Iesu Mesia to tatou Fatu!” (Roma 7:25) O te hoo ta Paulo e faahiti ra.a Maoti te hoo (1) e faaorehia ˈi ta tatou mau hara, (2) e nehenehe ai tatou e tiaturi e riro mai ei taata tia roa, e (3) faahau atoa ˈi e to tatou Atua poiete. E hiˈopoa mai tatou i teie mau manaˈo. A na reira ˈi, e here atu â tatou ia Iehova, “no ǒ mai hoi ia ˈna te tiairaa i te mea maitai.” (Roma 15:13) Oia atoa, e mauruuru atu â tatou ia Iesu, “na roto ia ˈna i tiamâ ˈi tatou maoti te hoo.”—Kol. 1:14.

MAOTI TE HOO E FAAOREHIA ˈI TE HARA

4-5. No te aha mea faufaa roa te hoo? (Koheleta 7:20)

⁴ Mea faufaa roa te hoo. Maoti hoi te reira e faaore ai Iehova i ta tatou mau hara. E hara pauroa te taata tia ore, i te parau anei aore ra te ohipa. (A taio i te Koheleta 7:20.) Te vai ra te hara rahi. Ei hiˈoraa, ia faaturi te hoê ati Iseraela aore ra ia haapohe o ˈna i te tahi taata, e haapohehia o ˈna ia au i te Ture a Mose. (Lev. 20:10; Num. 35:30, 31) Te vai atoa ra te hara e ere mea ino roa. Noa ˈtu râ, e hara anaˈe te reira. Teie hoi ta Davida i parau: “E haapao vau i to ˈu taahiraa avae ia ore au ia hara i to ˈu arero.” (Sal. 39:1) Te auraa ïa, e nehenehe atoa tatou e hara i to tatou vaha.—Iak. 3:2.

⁵ Ua parau aore ra ua rave aˈena anei oe i te tahi mea ta oe i tatarahapa i muri iho? Eita e ore. Te na ô ra hoi te Bibilia: “Ia parau tatou: ‘Aita ta tatou e hara,’ te haavare nei ïa tatou ia tatou iho e aita te parau mau i roto i to tatou aau.”—Ioa. 1, 1:8.

6-7. Maoti te aha e faaore ai Iehova i ta tatou mau hara? (A hiˈo atoa i te hohoˈa.)

⁶ Auaˈe ïa te hoo e nehenehe ai Iehova e faaore i ta tatou mau hara. (Eph. 1:7) E ere râ te auraa, aita o ˈna e tâuˈa mai ra ia hara tatou. Inaha, eita o ˈna e hinaaro ia rave tatou i te hara. (Isa. 59:2) No te mea râ e Atua parau-tia o ˈna, ua faanaho o ˈna i te hoê ravea e faaore ai o ˈna i ta tatou mau hara.

⁷ I titau na te Ture a Mose ia pûpû te ati Iseraela i te tusia animara ia faaorehia ta ratou mau hara. (Lev. 4:27-31; 17:11) Te faahohoˈa ra taua mau tusia ra i te hoê tusia maitai aˈe. To Iesu ïa tusia o te hopoi mai i te haamaitairaa rahi. O to ˈna tusia te ravea e faaore ai Iehova i ta tatou mau hara. Ua taa maitai ia Paulo eaha taua mau haamaitairaa ra ia ˈna i papai i te mau Kerisetiano no Korinetia. I muri iho i te faahitiraa i te mau peu ta ratou i rave na, teie ta ˈna i parau atu: “Ua tamâ-roa-hia râ outou, e ua haamoˈahia, e ua parauhia outou e taata parau-tia i te iˈoa o te Fatu ra o Iesu Mesia e na roto i te varua o to tatou Atua.”—Kor. 1, 6:9-11.

8. Mea maitai ia feruriruri i te aha i te mau hebedoma hou te Oroa haamanaˈoraa?

⁸ I te mau hebedoma hou te Oroa haamanaˈoraa o teie matahiti, a feruriruri i te mau haamaitairaa ta oe i fanaˈo auaˈe Iehova i faaore i ta oe mau hara. Ei hiˈoraa, aita e faufaa ia faahapa noa oe ia oe no ta oe mau hara i rave na, inaha ua tatarahapa oe. Mea fifi anei râ no oe ia farii i te reira? Ua puta mai paha teie manaˈo: ‘Ua ite au e faaore Iehova i te hara. O vau noa râ te fifi.’ A haamanaˈo ïa: Na Iehova e faaore i te hara. Ua horoa o ˈna i te mana e haava i ta ˈna Tamaiti. E ere ïa na tatou e faaoti ta vai hara ta Iehova e faaore aore ra eita, na Iehova râ. Te na ô ra te Bibilia: “Mai te peu . . . te haere nei tatou na te maramarama, no te mea to roto te Atua i te maramarama, . . . e tamâ te toto o Iesu ta ˈna Tamaiti ia tatou i te mau hara atoa.” (Ioa. 1, 1:6, 7) E haapiiraa papu teie mai te tahi atu mau haapiiraa i roto i te Bibilia. Maoti te hoo e faaore ai Iehova i ta tatou mau hara, e “ua ineine” o ˈna i te na reira.—Sal. 86:5.

MAOTI TE HOO E RIRO AI TATOU EI TAATA TIA ROA

9. Eaha atoa te hara? (Salamo 51:5)

⁹ Te “hara” i roto i te Bibilia, e ere noa te raveraa i te hoê ohipa ino, oia atoa râ te huru taata tia ore mai to tatou iho â fanauraahia mai. (A taio i te Salamo 51:5.) No te mea ua peehia tatou i te hara, e puta mai iho â te manaˈo ino i te tahi taime, e rave atoa tatou i te mea ino. To tatou tino atoa râ tei inohia. No reira tatou e maˈihia ˈi, e ruau ai e e pohe ai. Te taa ra ia tatou no te aha te mau aiû, aita â hoi i rave atura i te tahi hara, e maˈihia ˈi, e pohe atoa ˈi. Oia atoa no te aha te taata ino e te taata maitai e mauiui ai e e pohe ai. Inaha, o tatou pauroa te huaai tia ore o Adamu tei raeahia i te hara.

10. Eaha te faahopearaa o te hara i nia ia Adamu raua Eva?

¹⁰ A feruri na i te faahopearaa o te hara i nia ia Adamu raua Eva. Ua ino roa raua. I muri iho i to raua orure-hau-raa, oioi to raua manaˈo haava i te hautiraa, ua ofati hoi raua i te ture a te Atua, tei “papaihia . . . i roto i to [raua] aau.” (Roma 2:15) Ua taa oioi roa ia raua e fifi te tupu ra. Inaha, ua tapoˈi raua i to raua tino e vai tahaa noa ra, e ua tapuni raua i te aro o to raua Atua poiete. (Gen. 3:7, 8) A tahi ra ïa Adamu raua Eva a faahapa ˈi ia raua, a hepohepo ai e a haama ˈi. Ua vai noa tera mau huru aau i roto ia raua tae roa i to raua poheraa.—Gen. 3:16-19.

11. Eaha te faahopearaa o to tatou huru taata tia ore i nia ia tatou?

¹¹ Tera atoa te faahopearaa i nia ia tatou no to tatou huru tia ore. I te tahi taime, e tupu mai iho â te manaˈo faahapa, te hepohepo e te haama. Pau ta tatou imiraa i te faaafaro i to tatou oraraa, eita iho â e haere. No te mea e “oraraa faufaa ore” to tatou mai ta te Bibilia e parau ra. (Roma 8:20) E ere teie parau no tatou tataitahi noa, no te huitaata atoa râ. Ei hiˈoraa, pau ta te taata tutavaraa no te aupuru i te fenua e no te faaore i te ohipa ino, te veve e te tamaˈi, eita e haere. Auaˈe râ te hoo, e tiaturiraa papu ïa to tatou. Eaha ïa?

12. Eaha te tiaturiraa e vai ra maoti te hoo?

¹² O te tiaturiraa ïa e “faaorahia te mau mea i poietehia i te faatîtîraa o te hara e te pohe.” Maoti ïa te hoo. (Roma 8:21) Te auraa, ua riro mai anaˈe tatou ei taata tia roa i roto i te paradaiso, eita ïa tatou e roo-faahou-hia i te maˈi aore ra i te hepohepo. Eita atoa e tupu faahou mai te manaˈo faahapa e te haama. E ta tatou mau tutavaraa no te aupuru i te fenua, a ora ˈtu ai ma te hau, e tupu ïa i te roaraa o te faatereraa a te “Huiarii o te hau” ra o Iesu, o tei aufau i te hoo no tatou.—Isa. 9:6, 7.

13. Mea maitai ia feruriruri atoa i te aha i te mau hebedoma hou te Oroa haamanaˈoraa?

¹³ A feruri na mai te aha te oraraa ia riro mai tatou ei taata tia roa. Ia ara mai oe pauroa te poipoi, mea maitai roa oe. E pauroa te mahana, eita oe e haapeapea faahou aˈunei oe aore ra to fetii here e pohe ai i te poia, e maˈihia ˈi, aore ra e pohe ai. I teie nei â, e topa te hau “ia tapea maite [oe] i te tiaturiraa . . . mai te hoê ïa tutau no to tatou ora, mea papu e te aueue ore atoa.” (Heb. 6:18, 19) Eita te hoê poti e painu ia taorahia te tutau. Eita atoa ïa oe e painu i te pae varua maoti to oe tiaturiraa. E haere atoa ia oe ia faaoromai tamau i te mau fifi atoa. Mea papu, e riro Iehova ei “Atua o te haamaitai i te feia e imi maite nei ia ˈna.” (Heb. 11:6) No reira, auaˈe te hoo e fanaˈo ai oe i te tamahanahanaraa i teie nei â, e te tiaturiraa o te hoê ananahi maitai aˈe.

MAOTI TE HOO E FAAHAU AI TATOU E TE ATUA

14. Eaha te faahopearaa o te hara i nia i to tatou auhoaraa e o Iehova, e no te aha?

¹⁴ Mai to Adamu raua Eva hararaa, ua atea ê roa aore ra ua taa ê roa te taata i te Atua. Ia au i te Bibilia, ua mutu te taamuraa i rotopu i te huitaata e te Atua poiete. (Roma 8:7, 8; Kol. 1:21) No te aha? No te mea e Atua tia roa o Iehova, eita ïa ta ˈna e nehenehe e farii i te hara. Te na ô ra te Bibilia no Iehova: “Mea viivii ore roa hoi to mata no te hiˈo i te mea ino, e eita ta oe e nehenehe e farii i te ino.” (Hab. 1:13) Mai te huru ra e tiapai apoo to rotopu i te Atua e te taata no te hara. Maoti noa te hoê eˈaturu, ei auraa parau, e nehenehe ai tatou e faahau e Iehova. O te hoo ïa te ravea.

15. Eaha ta tatou e fanaˈo maoti te tusia faahau o Iesu?

¹⁵ Te parau ra te Bibilia “e tusia faahau hoi [Iesu] no ta tatou mau hara.” (Ioa. 1, 2:2) Te auraa, auaˈe te tusia o Iesu e nehenehe ai te taata e riro faahou ei hoa no Iehova. Inaha, maoti hoi te hoo e nehenehe ai Iehova e faahau e te taata. (Roma 3:23-26) Ua “hiˈo” atoa o ˈna i ta ˈna mau tavini taiva ore tei ora na hou te Mesia a pohe ai, “ei taata parau-tia.” (Gen. 15:1, 6) Mea nafea ïa? Auaˈe ïa te hoo ta Iesu e aufau i muri aˈe. Ua papu roa ia Iehova e na reira iho â ta ˈna Tamaiti. (Isa. 46:10) No reira, maoti te hoo i nehenehe ai te taata e faahau e te Atua.

16. Mea maitai ia feruri atoa i te aha i te mau hebedoma hou te Oroa haamanaˈoraa? (A hiˈo atoa i te hohoˈa.)

¹⁶ A feruri na mai te aha to oe oraraa i teie nei e auhoaraa piri roa to oe e o Iehova. Ei hiˈoraa, e nehenehe oe e pii ia ˈna to oe “Metua,” mai ta Iesu i haapii. (Mat. 6:9) E pii atoa oe ia ˈna i te tahi taime to oe “Hoa.” Ma te faatura iho â ïa e te haehaa e pii ai tatou ia Iehova mai tera. No te mea maoti noa te hoo e fanaˈo ai tatou i tera haamaitairaa. Na roto ia Iesu, ua “faahau ïa [Iehova] i te mau mea atoa ia ˈna ra . . . ma te faatupu i te hau na roto i te toto o te Mesia i niniihia i nia i te pou haamauiuiraa.” (Kol. 1:19, 20) No reira tatou e fanaˈo ai i te auhoaraa piri roa e o Iehova i teie nei â noa ˈtu e taata hara tatou.

E TAPAO TE HOO O TO IEHOVA AROHA HAMANI MAITAI

17. E nafea te hoo e haapapu ai e Atua aroha hamani maitai o Iehova? (Ephesia 2:4, 5)

¹⁷ Te haapapu mai ra te hoo e Atua “aroha hamani maitai rahi” o Iehova. Inaha, “ua faaora oia ia tatou . . . pohe noa ˈi tatou i ta tatou mau hapa.” (A taio i te Ephesia 2:4, 5.) Mai tera taata tei mau i raro aˈe i te mau patu tima, ua taa i te feia “aau farii i te ora mure ore” ua mau atoa ratou i roto i te faatîtîraa o te hara. Te taparu nei ratou ia faaorahia ratou. (Ohi. 13:48) Te pahono ra Iehova ia ratou na roto i te poroi o te Faatereraa arii. E ite ïa ratou o vai o ˈna e o Iesu ta ˈna Tamaiti. (Ioa. 17:3) Ua hape roa ïa Satani i te manaˈoraa ua mau ta te Atua opuaraa i to Adamu raua Eva hararaa.

18. Eiaha tatou e haamoˈe i te aha a feruri ai tatou i te hoo?

¹⁸ A feruri ai tatou i te mau haamaitairaa o te tusia o Iesu, eiaha tatou e haamoˈe i te tumu faufaa roa ˈˈe i horoa mai ai Iehova i te hoo. E ere noa no te faaora ia tatou. E ravea atoa râ te reira e pahono ai Iehova i te mau pariraa ta Satani i faahiti i te ô i Edene. (Gen. 3:1-5, 15) Oia mau, maoti te hoo e haamoˈa ˈi Iehova i to ˈna iˈoa, e faatiamâ atoa ˈi ia tatou i te hara e te pohe. Tera hoi te tapao o to ˈna here rahi. E no to ˈna hamani maitai rahi, te vaiiho nei o ˈna ia tatou te taata hara ia haapapu e haavare ta Satani i parau no nia ia Iehova. (Mas. 27:11) No reira, e nafea oe e faaite ai i to oe mauruuru no te hoo? E pahono tatou i tera uiraa i to muri nei tumu parau.