E nafea oe e faaite ai i to oe mauruuru no te hoo?

1-2. Te faahepo nei te tusia o Iesu ia tatou ia aha, e no te aha? (Korinetia 2, 5:14, 15) (A hiˈo atoa i te hohoˈa.)

A FERURI na ua mau oe i raro aˈe i te mau patu tima, e taata râ tei faaora mai ia oe. Mai te aha ïa to oe huru i tera taime? Papu roa, mauruuru iti rahi to oe ia ˈna. E hinaaro iho â ïa oe e faaite roa ˈtu ia ˈna i te reira. Eita ïa oe e haafaufaa ore i ta ˈna i rave no oe.

² I te tumu parau na mua ˈtu, ua ite mai tatou eita e haere ia tatou ia faaora ia tatou i te hara e te pohe. Auaˈe râ te tusia taraehara o Iesu, e (1) faaorehia ïa ta tatou mau hara, (2) e nehenehe tatou e tiaturi e riro mai ei taata tia roa, (3) e faahau atoa e o Iehova. E nehenehe ïa tatou e tiaturi e ora e a muri noa ˈtu i roto i te ao apî. Mea here iho â na Iesu i te taata mai te tau mai â. Na te hoo e haapapu i te reira. (Mas. 8:30, 31) Ua papai te aposetolo Paulo “te faahepo nei . . . te here o te Mesia ia tatou.” (A taio i te Korinetia 2, 5:14, 15.) Te auraa ïa, eiaha roa e haafaufaa ore i to ˈna tusia taraehara, e faaite râ i to tatou mauruuru.

3. E nafea oe e faaite ai i te mauruuru no te hoo?

³ E nafea ïa oe e faaite ai i te mauruuru no te hoo? Tei te huru ïa o to oe tupuraa. Teie te tahi hiˈoraa: A feruri na e toru taata te haere ra i te hoê â vahi. E ere râ hoê â oire to ratou. No te tapae i tera vahi, mea ê ïa te purumu ta ratou tataitahi e rave. Mai tera atoa no oe. Ta oe fa, o te faaiteraa ïa i to oe mauruuru no te hoo. E nahea râ oe? Tei te huru ïa, mai te peu e (1) e piahi oe, (2) ua bapetizohia oe, aore ra (3) ua atea ê oe i te amuiraa.

E PIAHI OE

4. Eaha to Iehova manaˈo i te mau piahi?

⁴ Mai te peu te haapii ra oe i te Bibilia, te hinaaro ra ïa oe e ite atu â no nia ia Iehova e ta ˈna mau haapiiraa. Te auraa ïa, te faafatata mai ra Iehova ia oe ia ˈna ra, a riro atu ai oe ei hoa no ˈna. (Ioa. 6:44; Ohi. 13:48) I te mea “e hiˈopoa [Iehova] i te aau,” te ite ra ïa o ˈna i ta oe mau tutavaraa. Te oaoa atoa ra o ˈna ia ite i te mau tauiraa ta oe e rave nei no te haapao i ta ˈna mau ture aveia. (Mas. 17:3; 27:11) Auaˈe noa râ te hoo e piri roa ˈi oe ia Iehova. (Roma 5:10, 11) No reira, eiaha roa e haafaufaa ore i te hoo.

5. E nafea te mau piahi e faaohipa ˈi i te Philipi 3:16?

⁵ E nafea oe o te haapii ra i te Bibilia e faaite ai i to oe mauruuru no te hoo? Ma te pee ïa i ta Paulo aˈoraa i to Philipi: “I te mea e ua nuu ê na tatou i mua, e haere maite noa anaˈe ïa ma te tapea i taua aveia ra.” (Phil. 3:16) Aore ra ia au i te tahi atu huriraa Bibilia: “Ia tamau tatou i te haere na tera noa â aveia e tia ˈi.” Te auraa, eiaha oe e faarue i te eˈa e tae ai oe i te ora no te tahi noa ˈˈe mea aore ra taata.—Mat. 7:14; Luka 9:62.

6. E nahea te mau piahi ia fifi rii ratou i roto i ta ratou haapiiraa? (Deuteronomi 30:11-14) (A hiˈo atoa i te hohoˈa.)

⁶ Mea fifi anei no oe ia farii i te tahi haapiiraa Bibilia ta oe i apo mai nei? Mai te peu e e, a rave ïa i te mau maimiraa no nia i tera haapiiraa. A pure atoa ia Iehova ia tauturu ia oe ia taa maitai aˈe i te reira. (Sal. 86:11) E mai te peu aita iho â, eiaha oe e haapeapea. A tamau noa râ i ta oe haapiiraa. A muri aˈe paha e taa ˈi ia oe. Mea fifi atoa anei no oe ia haapae i te hoê peu eita Iehova e au? Mai te peu e e, a haamanaˈo ïa e nehenehe ta oe e pee i ta ˈna mau ture aveia. Inaha, eita roa ˈtu Iehova e ani i te mau taata hara i te tahi mea eita e maraa ia ratou. (A taio i te Deuteronomi 30:11-14.) Na Iehova e tauturu ia oe, ta ˈna ïa i parau. (Isa. 41:10, 13; Kor. 1, 10:13) No reira, a faaitoito. A tiatonu i to oe mauruuru no ta Iehova mau haamaitairaa, te tusia iho â râ o Iesu. Eita ïa oe e manaˈonaˈo noa i te mau mea e haafifi ra ia oe. Inaha, a rahi ai to oe here no Iehova, e papu roa ia oe “e ere ta ˈna mau faaueraa i te mea teimaha.”—Ioa. 1, 5:3.a

7. Ia feruriruri te feia apî ua paari i roto i te parau mau i te aha?

⁷ E outou ïa te feia apî e Ite no Iehova to outou metua? E piahi atoa outou. Inaha, outou te mau piahi faufaa roa ˈˈe a to outou na metua. Te na ô ra te Bibilia: “A faafatata ˈtu i te Atua, e e faafatata mai oia ia outou.” (Iak. 4:8; Par. 1, 28:9) No oe atoa tera irava. O te taata tataitahi ta ˈna e faafatata mai ia ˈna ra, tae noa ˈtu ia oe ua paari i roto i te parau mau. Maoti hoi te hoo e nehenehe ai oe e faatupu i te auhoaraa piri roa e o Iehova. Eiaha ïa e haafaufaa ore i te reira. (Roma 5:1, 2) No reira, hou te Oroa haamanaˈoraa, a feruriruri i ta Iehova raua Iesu i rave no oe. Ia turai hoi te reira ia oe ia feruri i te mau fa ta oe e nehenehe e haamau no te haamauruuru ia raua no te hoo.b

UA BAPETIZOHIA OE

8. Mea nafea outou tei bapetizohia i faaite ai i te mauruuru no te hoo?

⁸ Mai te peu ua bapetizohia oe, ua faaite ê na ïa oe i to oe mauruuru no te hoo. Ua rave hoi oe i te mau tauiraa no te pee i ta Iehova mau ture aveia e no te riro ei hoa no ˈna. Ua faariro atoa oe i te taata ei pǐpǐ ma te haapii ia ratou i ta oe i ite no nia ia Iehova e ia Iesu, mai ta Iesu i faaue mai. Ua pûpû oe ia oe ia Iehova, a bapetizohia ˈtu ai. Ua faaruru atoa paha oe i te hamani-ino-raa no te mea te tavini ra oe ia Iehova. (Tim. 2, 3:12) Noa ˈtu râ, ua faaoromai tamau oe tae roa mai i teie mahana. Inaha, mea here na oe ia Iehova e ua mauruuru roa oe ia ˈna no te tusia o ta ˈna Tamaiti.—Heb. 12:2, 3.

9. Ia vai ara te mau mero bapetizohia i te aha?

⁹ Mai te peu mea maoro tatou i te bapetizoraahia, e vai ara anaˈe i teie fifi: Te haafaufaa-ore-raa i te hoo. Tera hoi tei tupu i nia i te mau Kerisetiano no Ephesia. Parau mau, mea faaoromai tamau ratou e ua haapopou Iesu ia ratou no te reira. Tera râ, ua parau o ˈna: “Teie . . . ta ˈu faahaparaa ia oe, ua ere oe i to oe here matamua.” (Apo. 2:3, 4) Te taa ra ïa ia tatou e nehenehe te here o te hoê taeae aore ra tuahine no Iehova e iti mai. Te pure noa ra paha o ˈna e te haere noa ra i te mau putuputuraa e te pororaa. Mea faatia ture noa râ. E ere atura ïa na te here e turai ra ia ˈna. Eaha ïa ta oe e nehenehe e rave ia ite oe e mai tera atoa to oe tupuraa?

10. E nafea oe ia faaohipa i ta Paulo aˈoraa ia Timoteo? (Timoteo 1, 4:13, 15)

¹⁰ Ua aˈo Paulo ia Timoteo ia “feruri maite e [ia] manaˈo noa” i ta ˈna haamoriraa ia Iehova. (A taio i te Timoteo 1, 4:13, 15.) No oe atoa teie aˈoraa. A feruri ïa i ta oe e nehenehe e rave ia puai noa tera itoito to oe i roto i ta oe haamoriraa ia Iehova. (Roma 12:11) Ei hiˈoraa, e nehenehe oe e faaineine maitai atu â i te mau tumu parau e hiˈopoahia i te mau putuputuraa. Eita ïa to oe feruriraa e nevaneva hanoa. Ia tuatapapa atoa oe i te Bibilia, a haere ïa i te hoê vahi aita e maniania e aita e taata. E nehenehe ïa oe e feruri maite i ta oe i apo mai. Ia tamau noa oe i te rave i teie mau mea, e vai noa ïa tera mauruuru to oe no te mau faanahoraa atoa ta Iehova i rave, tae noa ˈtu te hoo. Inaha, e ama noa te auahi mai te peu e tuu noa ˈtu oe i te vahie. Oia atoa, i te mau hebedoma hou te Oroa haamanaˈoraa, a feruriruri i ta tatou mau haamaitairaa e fanaˈo nei ei Ite no Iehova. Papu roa, e rahi atu â to oe mauruuru no te hoo, maoti hoi te hoo e piri roa ˈi oe ia Iehova.

11-12. Aita anaˈe oe e anaanatae faahou ra i te tavini ia Iehova, te auraa anei ua ere oe i to ˈna varua? A faataa na. (A hiˈo atoa i te hohoˈa.)

¹¹ Mai te peu aita oe e anaanatae faahou ra i te tavini ia Iehova, eiaha oe e manaˈo e ua ere oe i to ˈna varua moˈa. A haamanaˈo râ i ta Paulo i parau i to Korinetia no nia i ta ˈna taviniraa: “Ia faaite noa ˈtu vau i te reira, aita râ to ˈu aau i tae, e hopoia noa iho â tera tei horoahia mai ia ˈu.” (Kor. 1, 9:17) Eaha ta Paulo i hinaaro e parau?

¹² Aita Paulo i anaanatae roa i te poro i te tahi taime. Noa ˈtu râ, ua faaoti papu o ˈna e tamau i te poro. E nehenehe atoa oe e rave i tera faaotiraa. Oia hoi e rave i te mea maitai noa ˈtu aita oe e anaanatae roa ra. No reira, a pure ia Iehova ia horoa mai i “te hinaaro e te puai no te rave i te mau mea atoa ta ˈna e au.” (Phil. 2:13) A tamau noa i te rave i te mau ohipa e piri noa ˈi oe ia Iehova. Papu roa, e puai atu â to oe here e to oe itoito rahi no Iehova.

13. E nafea ia tamau i te hiˈopoa ia tatou ‘to roto anei tatou i te faaroo’?

¹³ Mea maitai ia feruri i to tatou huru oraraa. Te faaitoitoraa ïa a te Korinetia 2, 13:5, e na ô ra: “A tamau i te hiˈopoa ia outou tei roto anei outou i te faaroo, e i te tamata ia outou teihea huru taata outou.” Teie te tahi mau uiraa mea tano ia ui: ‘Te tuu ra anei au i te Faatereraa arii a te Atua i te parahiraa matamua?’ (Mat. 6:33) ‘Te faaite ra anei ta ˈu mau faaanaanataeraa mea hae na ˈu te mea ino?’ (Sal. 97:10) ‘Te paturu ra anei au i te hau e te auhoêraa i roto i te amuiraa?’ (Eph. 4:2, 3) Tano maitai ïa ia feruri i teie mau uiraa i te Oroa haamanaˈoraa. I reira hoi tatou e feruriruri ai i ta Iehova raua Iesu i rave no tatou, a hinaaro atu ai tatou e faaite i to tatou mauruuru, e te ora nei iho â tatou no te Mesia, eiaha râ no tatou.c

UA ATEA Ê OE I TE AMUIRAA

14. No te aha te tahi mau taeae e tuahine i atea ê ai i te amuiraa?

¹⁴ Ua faaea te tahi mau taeae e tuahine, mea itoito roa hoi na mua ˈˈe, i te haere i te mau putuputuraa ahia ˈtura avaˈe aore ra matahiti. Eaha te tumu? Ua teimaha vetahi no “te haapeapearaa o te oraraa.” (Luka 21:34) Ua maemae roa te tahi atu no ta te hoê Kerisetiano i parau aore ra i rave. (Iak. 3:2) E hara rahi ta te tahi atu i rave, te haama nei râ ratou i te ani i te tauturu. Noa ˈtu eaha te tumu, e nehenehe oe e tapiri faahou mai i te amuiraa. E nehenehe hoi te hoo, ta Iehova raua Iesu i horoa mai no to raua here ia oe, e tauturu ia oe. E nafea ïa?

15. Eaha ta Iehova e rave nei no ta ˈna mau tavini tei atea ê? (Ezekiela 34:11, 12, 16)

¹⁵ A feruri na i to Iehova manaˈo i te mau mero tei atea ê. Aita o ˈna e riri ra ia ratou. Te imi nei râ o ˈna i ta ˈna mau mamoe tei moˈe. Te aupuru nei e te tauturu nei o ˈna ia ratou ia hoˈi mai ia ˈna ra. (A taio i te Ezekiela 34:11, 12, 16.) E na reira atoa anei Iehova no oe? Papu roa ïa e! Inaha, te taio nei oe i teie tumu parau, tapao faaite ïa te hinaaro noa ra oe e faaoaoa ia ˈna. I te mea ua ite Iehova eaha to roto i to oe aau e na ˈna i aratai mai ia oe i roto i te parau mau, e hinaaro iho â ïa o ˈna ia hoˈi mai oe i roto i te amuiraa.

16. Eaha te tauturu i te hoê mamoe tei moˈe ia hoˈi mai ia Iehova ra? (A hiˈo atoa i te hohoˈa.)

¹⁶ Teie te tahi mau parau faaitoito i roto i te buka rairai A hoˈi mai ia Iehova ra: “A tiaturi, tei pihai iho Iehova ia oe ia hoˈi mai oe ia ˈna ra. E tauturu oia ia oe ia faaruru i te ahoaho, ia ore e inoino faahou, e ia ite i te hau o te feruriraa e o te aau maoti te hoê manaˈo haava mâ. I muri iho, e itoito faahou mai oe no te tavini ia Iehova e te mau hoa haamori.” A haamanaˈo atoa te hinaaro ru nei te mau matahiapo e tauturu ia oe. Inaha, ei “tapuniraa [ratou] i te mataˈi, ei haapuraa i te vero ûa.” (Isa. 32:2) No te faaite ia Iehova i to oe mauruuru no te hoo, a ui ia oe iho: ‘Eaha ta ˈu e nehenehe e rave i teie nei no te hoˈi mai ia Iehova ra?’ (Isa. 1:18; Pet. 1, 2:25) E nehenehe anei oe e haere i te hoê putuputuraa i te Piha a te Basileia? E nehenehe anei oe e farerei i te hoê matahiapo no te ani i te tauturu no te hoˈi mai? E ani paha o ˈna i te hoê taeae aore ra tuahine ia haapii i te Bibilia na muri ia oe no te hoê area taime. E haamaitai iho â Iehova i ta oe mau tutavaraa atoa no te hoˈi mai e no te faaite i to oe mauruuru no te hoo.

EAHA ÏA TA OE E RAVE?

17-18. E nafea ia faaohipa maitai i to tatou taime hou te Oroa haamanaˈoraa?

¹⁷ Ua parau Iesu e ua horoa mai Iehova i te hoo “ia ore ia mou te taata atoa o te faatupu i te faaroo ia ˈna, ia roaa râ ia ratou te ora mure ore.” (Ioa. 3:16) Auaˈe te hoo e nehenehe ai Iehova e faaora ia tatou i te hara e te pohe. Eiaha roa ˈtu ïa tatou e haafaufaa ore i te reira. (Roma 3:23, 24; Kor. 2, 6:1) I te mau mahana hou te Oroa haamanaˈoraa, a faataa i te taime no te feruriruri i to Iehova e to Iesu here ia tatou. E faahepo ïa te reira ia tatou ia faaite i to tatou mauruuru.

¹⁸ E nafea ˈtura ïa oe e faaite ai i to oe mauruuru no te hoo? E ere ïa hoê â pahonoraa ta oe e ta mea ma. Te mea papu, e haamaitai Iehova i ta oe mau tutavaraa e apiti i to oe mau mirioni taeae e tuahine, aita hoi e “ora faahou [ra] no ratou iho,” no Iesu râ “tei pohe no ratou.”—Kor. 2, 5:15.