Tauturu no te mau vahine tei rave-ino-hia

E omuaraa parau teie o te tumu parau “Te parururaa i te mau vahine: Te manaˈo o te Bibilia” i nia i te jw.org. I raro roa i tera tumu parau, e nehenehe oe e taumi i nia “A rave mai e a nenei i teie tumu parau” ei PDF, a opi atu ai. Te na ô ra te hoê tuahine no Marite o Stacy te iˈoa: “Ua nenei au e rave rahi api parau ta mâua e te tahi atu tuahine i afai i te hoê fare no te mau vahine i roto i te tuhaa fenua o ta matou amuiraa.”

Ua ani mai â te hoê rave ohipa no reira i tera tumu parau. E 40 ïa api parau e 30 tareta jw.org tei afaihia ˈtu. I muri mai, ua ani te vahine haapao o tera vahi i te mau Ite no Iehova ia faaite i te tereraa o te hoê haapiiraa Bibilia i te mau vahine no reira.

Ua na reira atoa Stacy e e piti tuahine i te tahi atu fare no te mau vahine. E pae api parau tei ravehia e mea rahi atu â tei anihia. “E tauturu teie api parau i te mau vahine i ǒ nei,” ta te hoê rave ohipa ïa i parau. Ua na ô atoa o ˈna: “E hinaaro hoi matou i te tauturu.” I te hoˈiraa ˈtu na tuahine, ua amui mai te tahi mau vahine no te ite e nafea te haapiiraa Bibilia e faaterehia ˈi. Ua hinaaro e piti o ratou e haere i te putuputuraa i to muri iho hopea hebedoma i te Piha a te Basileia.

Te parau ra Stacy: “Oaoa roa matou i te farii-maitai-raahia teie api parau faahiahia mau. Tano maitai ia nenei e ia opi i tera api parau no te faaite i te poroi o te Faatereraa arii a te Atua i te mau vahine tei rave-ino-hia. Putapû atoa matou i to ratou farii maitai, e te oaoa nei matou e te haamaitai ra Iehova i ta tatou mau tutavaraa e faaite i te parau apî oaoa i tera mau vahine.”