Te parururaa i te mau vahine: Te manaˈo o te Bibilia

“I to ˈu tamariiraa, ua rave ino to ˈu taeae ia ˈu i te mau mahana atoa. I muri aˈe i to ˈu faaipoiporaahia, ua na reira to ˈu nau metua hoovai. E ua faariro raua ia ˈu ei tîtî. Ua aro noa vau i te manaˈo e haapohe ia ˈu.”—Madhu,a Initia.

Ua haapapu te Taatiraa no te ea na te ao nei: “Ua riro te rave-ino-raa i te mau vahine ei peu matau na te ao nei.” Ua taiohia fatata hoê i nia e toru o te mau vahine tei rave-ino-hia i roto i to ratou oraraa.

Ahani ua ora oe i te reira, nehenehe oe e manaˈo e rave-ino-hia oe i te mau vahi e haere ai oe. E no te mea te vai ra teie mau peu ino, e nehenehe paha oe e manaˈo no te rahiraa o te mau taata: ‘Mea faufaa ore te mau vahine.’ Mea faufaa mau anei râ te mau vahine no te Atua?

Eaha te manaˈo o te Atua no te mau vahine?

Irava: ‘Ua poiete te Atua i te tane e te vahine.’—Genese 1:27.

Te auraa: Ua poiete te Atua i te tane e te vahine. No te Atua mea faufaa ia faatura te tane e te vahine. Hau atu â, te tiai ra oia ia ‘here te tane faaipoipo i ta ˈna vahine mai ta ˈna e here ia ˈna iho,’ eiaha râ ia tamata i te haavî i ta ˈna vahine, ma te mau parau ino aore ra ma te taparahi ia ˈna. (Ephesia 5:33; Kolosa 3:19) Mea papu, mea faufaa no te Atua te parururaa o te mau vahine.

“I to ˈu tamariiraa, ua rave-ino-hia vau na to ˈu fetii. I te 17raa o to ˈu matahiti, ua haamǎtaˈu ta ˈu paoti ohipa e ere au i ta ˈu ohipa ia ore au e taoto ia ˈna. I to ˈu paariiraa mai, ua faatura ore ta ˈu tane, to ˈu mau metua, e te feia tapiri ia ˈu. Ua haapii râ vau no nia ia Iehova, b te Atua poiete. Te faatura ra oia i te mau vahine. Ua haapapu te reira ia ˈu te here ra te Atua ia ˈ u e mea faufaa vau no ˈna.”—Maria, Raparata.

Eaha te tauturu ia oe ia maitai mai?

Irava: ‘Te vai ra te tahi hoa mea piri aˈe i te hoê taeae.’—Maseli 18:24.

Te auraa: E turu te hoê hoa mau ia oe. Ia manaˈo oe e tauturu te reira ia oe, a faaite i to oe mau huru aau i te hoê taata ta oe e tiaturi.

“E 20 matahiti to ˈu hunaraa e ua rave-ino-hia vau. A paari ai au, aita vau i oaoa e ua hepohepo rahi au. I to ˈu râ faaiteraa i ta ˈu i ora i te hoê taata tei ineine i te faaroo mai, ua mâmâ roa vau.”—Elif, Turekia.

Irava: “A huri ai i to outou mau ahoaho atoa i nia [i te Atua], no te mea te haapeapea mai ra oia no outou.”—Petero 1, 5:7.

Te auraa: Ia pure oe, e faaroo iho â te Atua. (Salamo 55:22; 65:2) No te mea te tâuˈa ra oia ia oe, e tauturu oia ia oe ia taa e mea faufaa mau â oe.

“Ua tauturu mai te haapiiraa no nia Iehova ia maitai mai to ˈu mau mauiui. I teie nei, e nehenehe au e tiaturi i te Atua na roto i te pure. E hoa mau oia o tei taa maitai i to ˈu huru aau.”—Ana, Bélize.

E faaore anei te Atua i te ohipa ino e ravehia i nia i te mau vahine?

Irava: “E horoa [Iehova] i te faaotiraa haavaraa i te feia aita e metua e i te feia o tei haavîhia, eiaha te taata o te fenua nei ia haamǎtaˈu faahou ia ratou.”—Salamo 10:17, 18.

Te auraa: Fatata te Atua i te faaore i te parau-tia ore atoa, oia atoa te ohipa ino e ravehia i nia i te mau vahine.

“Te iteraa fatata Iehova i te faaore i te ohipa ino e ravehia i nia i te mau vahine e te mau tamahine apî, mea mahanahana roa no ˈu. Ua horoa atoa mai te reira i te hau o te feruriraa.”—Roberta, Mehiko.

No te ite hau atu â no nia i te tiaturiraa ta te Bibilia e horoa ra, no te aha oe e nehenehe ai e tiaturi i te mau parau fafau e nafea te mau Ite no Iehova e tauturu ai maoti te Bibilia i teie mahana, a ani i te hoê farereiraa.