Faahopearaa o te tamaˈi e te faahuehueraa i nia ia tatou pauroa

E nehenehe te tamaˈi e tupu na te mau fenua eita oe e manaˈo e tupu. Te feia atoa e ora ra i te tahi atu mau fenua, e mauiui atoa ratou ia faaroo ratou e tamaˈi to tera e tera fenua. E noa ˈtu e mau te reira, e vai noa mai râ te mau faahopearaa. Mai te aha?

• 

  Te oˈe. Ia au i te Faanahoraa no nia i te opereraa maa na te ao nei, “o te tamaˈi te tumu rahi e pohe ai te taata i te poia, inaha e 70 i nia i te hanere o te taata e ere ra i te maa, te ora ra ïa i te mau fenua e tamaˈi to reira.”

• 

  Te maˈi i te pae tino e te pae feruriraa. E hepohepo roa te taata ia faaroo ratou e tupu te tamaˈi i ǒ ratou. E nehenehe te feia e ora ra i tera mau fenua e pepe, e roo-atoa-hia i te maˈi manava. Tera noa râ, pinepine eita ratou e fanaˈo i te rapaauraa.

• 

  Te faarueraa i te nohoraa. Mai Tetepa 2023 mai, ua hau atu 114 mirioni taata na te ao nei tei faarue i to ratou nohoraa, ia au i te tuhaa o te Hau amui e haapao ra i te feia horo ê. No te aha? No te tamaˈi e te faahuehueraa.

• 

  Te fifi i te pae faanavairaa. E ino roa ˈtu te oraraa i te pae moni no te tamaˈi, inaha e maraa te moni o te mau mea atoa. Ua pau aˈe te moni i te hau faatere i roto i te faaineineraa i ta ratou mau nuu, eiaha râ i roto i te ravea rapaauraa aore ra te haapiiraa. E i muri aˈe i te tamaˈi, mea rahi te haamâuˈaraa no te tataî aore ra no te patu faahou.

• 

  Ua ino roa te natura. E fifi roa te taata ia tuinohia te natura. Ua viivii roa te pape, te reva, e te repo a roohia ˈtu ai te taata i te maˈi e rave rau. I muri mai atoa i te tamaˈi, e nehenehe te taata e pepe aore ra e pohe roa i te mau ofai paaina hunahia i roto i te repo.