Maa faraoa iti no ta ˈu na urî

Mea maitai te mau Ite no Iehova i nia i te taata, i nia atoa râ i ta ˈu na urî. I te hoê mahana, ua ite au ia Elaine i pihai iho i ta ˈna vairaa papai afaifai e ua horoa o ˈna maa faraoa iti no ta ˈu na urî. I muri iho, i te mau taime atoa e piri ai au i tera vairaa papai afaifai, pinepine ta ˈu na urî i te haere atu ia noaa mai ta raua ‘faraoa iti.’

A mairi ai te avaˈe, ua matau ta ˈu na urî i te na reira e ua tauaparau poto vau e te mau Ite no Iehova. Aita râ vau i hinaaro e faahoa ia ratou. Ua hau hoi 70 matahiti to ˈu e aita i papu ia ˈu te mau tiaturiraa a te mau Ite no Iehova. Aita vau i mauruuru i ta ˈu i ite i roto i te tahi atu mau haapaoraa. Manaˈo atura vau mea maitai aˈe ia haapii i te Bibilia o vau anaˈe.

I taua taime ra, e ite na vau i te mau Ite no Iehova na te mau oire e ta ratou vairaa papai afaifai. Mea oaoa roa ratou. Ua tamau ratou i te pahono i ta ˈu mau uiraa maoti te Bibilia e haamata ˈtura vau i te tiaturi ia ratou.

I te hoê mahana, ua ani mai Elaine: ‘No oe, e ô anei te mau animara no ǒ mai i te Atua?’ Pahono atura vau: ‘E, parau mau roa.’ Taio atura Elaine i te Isaia 11:6-9. Hinaaro atura vau e ite hau atu â no nia i te Bibilia, aita râ vau i hinaaro e rave i ta ratou mau papai.

I te mau mahana i muri iho, ua tauaparau poto vau e o Elaine e ta ˈna tane Brent. Ua au roa vau i te reira. Ua ani mai raua ia taio vau i te buka Mataio tae atu i te buka Ohipa, no te taa eaha mau na te hoê Kerisetiano. O ta ˈu ïa i rave. E i 2016, ua farii au i te haapii i te Bibilia na muri ia Brent e Elaine.

Ua au roa vau i ta ˈu haapiiraa Bibilia i te mau hebedoma atoa, tae noa ˈtu i te mau putuputuraa i te Piha a te Basileia. Ua oaoa roa vau i te haapii i te parau mau Bibilia. Hoê matahiti i muri iho, ua bapetizohia vau ei Ite no Iehova. I teie nei, e 79 matahiti to ˈu. Oaoa roa vau i te iteraa i te haapaoraa mau. Ua haamaitai Iehova ia ˈu ma te farii ia ˈu ei mero o to ˈna utuafare na te ao nei.”