Te mau vairaa papai afaifai ati aˈe te fenua “ia ite te mau nunaa atoa”

Ua hau atu ahuru matahiti i teie nei to tatou faaohiparaa i te mau vairaa papai afaifai i roto i te taviniraa e mea anaanatae roa na te taata. Ati aˈe te ao nei, te itehia ra tera mau vairaa papai afaifai e e taa maitai i te taata e o te mau Ite no Iehova te faaohipa ra i te reira. Ua hamanihia te reira ia ohie te faaohiparaa. E tu atoa paha to outou manaˈo e to te tuahine Asenata no Poronia, te na ô ra o ˈna: “Mea au mau te vairaa papai afaifai, mea tura e mea ohie ia faaohipa.”

Hinaaro anei outou e ite mea nafea tera mau vairaa papai afaifai i te hamaniraahia?

Te hoê mauhaa tano maitai

I 2001, ua farii te Tino aratai ia tamata te mau taeae e tuahine i Farani e rave rau ravea pororaa i te vahi taata. Ua tamata atoa ïa ratou i te mau vairaa papai afaifai. Ua rau te huru hamaniraa. Ei hiˈoraa, ua uta ratou i te mau papai i nia i te mau pute matete turairai. Ua maiti te amaa no Farani i te hoê noa huru hamaniraa ta te feia poro i faaohipa e rave rahi matahiti.

Oaoa iti rahi to te mau taeae i Farani a ite ai e ua manuïa ta ratou pororaa i te vahi taata. No reira i 2011, ua farii te Tino aratai ia faanahohia te hoê porotarama no te poro i te vahi taata i New York, i Marite ma te faaohipa i te mau vairaa papai afaifai e te mau iri vairaa papai. Ua tapao te mau pionie tei apiti atu e e ravea maitai te reira e te ohie atoa ia faaohipa. Ua horoa atoa ratou i te tahi mau manaˈo tauturu no te haamaitai atu â i tera faanahoraa. No te teimaha o te mau vairaa papai afaifai na mua ˈtu, mea fifi ia puto na nia i te eˈa paumaraa. No reira, ua tauihia te huru hamaniraa ia mâmâ mai te reira, eiaha atoa râ ia pee i te mataˈi. Ua hamanihia te huira rahi aˈe e te papu aˈe ia ore ia pee haere ia faahaerehia na nia i te purumu otuetue. Hau atu, ua hamanihia te hoê vairaa no te haaputu i te mau papai.

Ua manuïa teie faanahoraa apî! No reira i 2012, ua farii te Tino aratai ia faaohipahia te mau vairaa papai afaifai na te ao nei. Ua itehia mai e te mau taeae te hoê taiete o te nehenehe e hamani faarahi mai i te mau vairaa papai afaifai. E faaohipahia te mauhaa mâmâ o te ore e pe oioi.

I te roaraa o te mau matahiti, ua haamaitaihia to ratou huru hamaniraa. Ei hiˈoraa, i 2015, ua hamanihia te hoê tapoˈi no te paruru i te ûa. Mea au na Dina, te hoê tuahine no Géorgie i teie mauhaa apî. Te na ô ra oia: “E ‘ahu faarari’ atoa to te vairaa papai afaifai.” I 2017, ua faaohipahia te mau api parau o te piri noa i nia i te auri. Te na ô ra Tomasz, te hoê taeae no Poronia: “Mea ohipa rahi na mua ˈˈe ra ia taui i te api parau o te vairaa papai afaifai. Teie nei râ, mea ohie roa.” I 2019, ua ravehia te tahi atu faanahoraa ia nehenehe te mau vairaa papai afaifai e vai maoro atu â.

Te hamaniraa o te mau vairaa papai afaifai

Na te hoê noa taiete e hamani i te mau vairaa papai afaifai a haponohia ˈtu ai i te mau amuiraa na te ao atoa nei. E 43 tara Marite te hoê vairaa papai afaifai, aita i taiohia te moni no te hapono e no te tahi atu mau haamâuˈaraa. Tae roa mai i teie mahana, e 16 mirioni tara Marite tei haamâuˈahia no te mau vairaa papai afaifai e e 420 000 tei haponohia na te ao nei.

No te faaohipa maitai i te mau ô, e poroi-faarahi-hia te mau vairaa papai afaifai. Hau atu, e nehenehe te mau amuiraa e poroi i te mau tuhaa tei ino a tataî atu ai i ta ratou mau vairaa papai afaifai.

Te faaohiparaa i te mau vairaa papai afaifai no te poro

Mea au roa na te feia poro na te ao nei i te faaohipa i te mau vairaa papai afaifai. Te na ô ra Martina, no Ghana: “I roto i te mau tuhaa atoa o te pororaa, na tatou e haere e farerei i te taata. Ta ˈu râ e au roa i te mau vairaa papai afaifai, na te taata e tapiri mai. Noa ˈtu e na pihai iho noa mai te taata ma te ore e tapea mai, e ite mai iho â ratou.”

I te tahi atu fenua Afirika, ua rave te hoê tane i te mau papai na roto i to ˈna reo. Ua hoˈi mai o ˈna i te hebedoma i muri mai e ua parau oia: “Ua taio pauroa vau i te mau papai ta ˈu i rave mai. Mea anaanatae mau. E faaite atoa vau i to ˈu mau fetii.” E ora to ˈna mau fetii e 500 kilometera te atea. E piti avaˈe i muri mai, ua hoˈi mai taua taata ra e ua na ô oia: “Ua oaoa roa te feia o to ˈu mataeinaa i te taioraa i ta outou mau papai. Hinaaro roa ratou e riro ei Ite no Iehova. Tera râ, e uiraa ta ratou na outou. Ei hiˈoraa, ua taa ia ratou e tia ia poˈi-roa-hia te taata bapetizo i te pape. Aita râ e anavai na pihai iho i te mataeinaa. Teie te uiraa: ‘E titauhia anei ia haere mai i ǒ nei no te bapetizo?’” Ua ani te mau taeae i te hoê pionie e paraparau ra i te reo o tera taata ia farerei ia ˈna. Tae roa mai i teie mahana, te aparau noa ra raua no nia i te Bibilia.

Mea oaoa mau ia faaohipa i te mau vairaa papai afaifai no te poro “ati aˈe te fenua ia ite te mau nunaa atoa.” (Mat. 24:14) E nafea teie mau haamâuˈaraa e aufauhia ˈi? Maoti ïa te mau ô pûpûhia no te taviniraa na te ao nei. Mea rahi o te hapono i ta ratou mau ô na roto i te ravea donate.jw.org. Mauruuru roa no ta outou mau ô horoa noa.