E NAFEA IA HAAPAE ROA I TE RIRI?

2 | Eiaha e tahoo

Te parau ra te Bibilia:

“Eiaha te ino ia tahoohia ˈtu i te ino i te taata atoa. . . . A tutava i te rave i te mea e tia ia outou tataitahi no te parahi hau noa e te taata atoa. . . . Eiaha outou e tahoo atu . . . Ua papaihia hoi: ‘ “Na ˈu te tahoo. Na ˈu e faautua,” te na reira mai ra Iehova.’”—ROMA 12:17-19.

Te auraa:

E riri iho â tatou ia haamauiuihia tatou. Aita râ te Atua e farii ia tahoo tatou i te ino ia vetahi ê. Te faaitoito nei o ˈna ia tatou ia faaoromai no te mea fatata roa o ˈna i te faaore i te mau tupuraa parau-tia ore atoa.—Salamo 37:7, 10.

Te faaohiparaa:

Ia tahoo te hoê taata tia ore, e uˈana te riri. No reira, ia haamauiui te tahi ia outou, eiaha e tahoo atu. A tutava râ i te haavî i to outou mau manaˈo tano ore e i te faatupu i te hau. I roto i te tahi mau tupuraa, mea au aˈe ia ore e manaˈo faahou i tei tupu. (Maseli 19:11) I te tahi râ mau taime, mea faufaa ia faaite eaha tei tupu. Ei hiˈoraa, ia ravehia te tahi ohipa ino mau i nia ia outou, e faaoti paha outou i te faaite i te reira i te mau mutoi aore ra te tahi atu taata mana.

Aita e faufaa ia tahoo atu

Eaha râ te rave mai te peu no oe, aita e ravea no te faaafaro i te fifi ma te hau? E mai te peu ua rave oe i te mau mea atoa no te faaafaro i te fifi na roto i te hau, eaha te rave? Eiaha e tahoo atu. E ino roa ˈtu â hoi te tupuraa. Ma te ore e tahoo, e upootia oe i nia i te riri. E nehenehe oe e tiaturi e faaafaro te Atua i te fifi. “A turui i nia ia ˈna e na ˈna e tauturu ia oe.”—Salamo 37:3-5.

Faatiaraa—ADRIÁN

Ua upootia o ˈna i nia i te hinaaro ia tahoo

I to ˈna taurearearaa, mea ino mau o Adrián, e riri rahi to ˈna a hinaaro atu ai e haamauiui i te feia i haamauiui ia ˈna. Te faatia ra o ˈna: “Pinepine au i te itehia i roto i te mau aroraa e te pupuhi. E rave rahi taime, ua î roa vau i te toto e ua faaruehia vau i roto i te aroâ fatata i te pohe!”

Ua haamata Adrián i te haapii i te Bibilia i te 16raa o to ˈna matahiti. Te na ô ra o ˈna: “A haere noa ˈi ta ˈu haapiiraa Bibilia i mua, ua taa ia ˈu e tia ia taui i to ˈu huru.” Ua titauhia ia ˈna ia faaea i te riri e i te taputô. Ua au roa o ˈna i te Roma 12:17-19 o te haapii ra eiaha e tahoo. Te parau ra o ˈna: “Ua farii au, e faaafaro iho â Iehova i te mau ohipa tia ore i te taime ta ˈna i faaoti e na roto i te ravea ta ˈna i maiti. Ore mǎrû noa ˈtura tera huru ino to ˈu.”

I te hoê mahana, ua hamani ino te hoê pǔpǔ taata ia Adrián. I matau na hoi ratou i te taputô e o ˈna. Ua tuô te taata aratai: “Haere, a taputô!” Ua farii Adrián: “E hinaaro rahi to ˈu e tahoo!” Aita râ o ˈna i na reira. Ua pure oioi o ˈna ia Iehova e ua haere ê atu o ˈna.

Te haamanaˈo ra Adrián: “I te mahana i muri iho, ua farerei au i te aratai o tera pǔpǔ. Hoˈi mai nei te riri e te hinaaro e tahoo i roto ia ˈu, ua taparu faahou râ vau ia Iehova ia tauturu mai ia haavî i to ˈu huru. Ua maere roa vau a haere mai ai tera taurearea e farerei ia ˈu e a parau ai: ‘Farii mai na te tatarahapa no inapo ra. Hinaaro vau e riro atoa mai ia oe. A haapii mai na i te Bibilia ia ˈu.’ Auê au i te oaoa i te haavîraa ia ˈu! Haamata aˈera vau i te faatere i ta ˈna haapiiraa Bibilia.”