E haamaitai te Atua i te feia e faaroo ra ia ˈna

Ua parau te peropheta Mose e mai te peu e auraro tatou i te mau aratairaa a te Atua, e haamaitai mai o ˈNa. (Deuteronomi 10:13; 11:27) Eita tatou e faaroo i te Atua no te mea te riaria ra tatou ia faautua mai o ˈna. Na to ˈna râ mau huru maitatai e turai ia tatou ia faaroo ia ˈna no te mea te here ra tatou ia ˈna e te haapae ra tatou i te rave i te hoê ohipa o te haamauiui ia ˈna. “Teie hoi te here i te Atua, ia haapao tatou i ta ˈna mau faaueraa.”—Ioane 1, 5:3.

E haamaitai te Atua i te feia e faaroo ra ia ˈna. Nafea? Ta tatou ïa e hiˈo mai.

1. E FANAˈO TATOU I TE PAARI IA FAAROO TATOU I TE ATUA

“O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te eˈatia maitai ia haere oe ra.”—ISAIA 48:17.

Te ite maitai ra o Iehova, te Atua poiete, to tatou huru e te horoa mai ra i te aratairaa e hinaarohia. Mai te peu e hinaaro tatou ia tauturu mai ta ˈna mau haapiiraa ia rave tatou i te mau faaotiraa î i te paari, e mea tia ia haapii maoti te Bibilia, eaha ta te Atua e titau mai ra e ia faaohipa i taua mau haapiiraa ra.

2. E OAOA TATOU IA FAAROO TATOU I TE ATUA

“Mea oaoa aˈe te feia e faaroo e e haapao i te parau a te Atua!”—LUKA 11:28.

I teie mahana, te oaoa mau nei tau mirioni taata no to ratou peeraa i te mau faaueraa Bibilia. Ei hiˈoraa, i te fenua Paniora, ua matauhia te hoê taata no to ˈna huru iria hanoa e no to ˈna rave-ino-raa i te taata e i ta ˈna vahine atoa. I te hoê mahana, ua taio oia i ta te peropheta Mose i papai no nia i te mǎrû o Iosepha, te tamaiti a Iakoba. Ua hoohia Iosepha ei tîtî e ua tuuhia ˈtu i roto i te fare tapearaa no te hoê ohipa ta ˈna i ore i rave. Tera râ, ua faaite noa o ˈna i te mǎrû, ua faatupu i te hau e ua faaore i te hapa. (Genese, pene 37-45) Te faˈi ra teie taata Paniora: “Ua feruri au i te hiˈoraa o Iosepha e ua turai te reira ia ˈu ia faatupu i te mǎrû e te haavîraa ia ˈu iho. Ei faahopearaa, mea oaoa roa to ˈu oraraa i teie nei.”

Te horoa mai nei te Bibilia i te tahi atu mau aratairaa no te ite e nafea ia haa i nia ia vetahi ê. Ta oe ïa e hiˈo mai i roto i to muri nei tumu parau.