Ia aravihi atu â i roto i te taviniraa—A faaineine i te taata no te hoˈi faahou e farerei ia ˈna

NO TE AHA E MEA FAUFAA ˈI?

Te hinaaro nei tatou e faarari i te pape i te mau huero o te parau mau ta tatou i tanu. (Ko1 3:6) Ia farerei tatou i te hoê taata tei anaanatae, mea maitai ia tuu i te hoê uiraa ta tatou e pahono atu i te hoˈi-faahou-raa e farerei. E faatupu atu â te reira i to ˈna anaanatae e e faaohiehia ta tatou faaineineraa no te hoˈi faahou e farerei ia ˈna. E parau ïa tatou e ua haere mai tatou no te pahono i te uiraa tei tuuhia i te farereiraa i mairi aˈenei.

NAFEA ÏA?

• A faaineine ai oe i ta oe e parau no te pororaa i tera e tera fare, a faaoti eaha te uiraa ta oe e tuu no te hoˈi faahou e farerei i te taata. E uiraa paha no nia i te hoê tumu parau faahitihia i roto i te papai ta oe e pûpû ra ia ˈna aore ra i roto i te tahi atu papai haapiiraa ta oe e vaiiho i te hoˈi-faahou-raa e farerei.

• Ia hope te aparauraa e te taata e faatupu ra i te anaanatae, a faaite e te hinaaro mau nei oe e tauaparau faahou ia ˈna e a tuu i te uiraa ta oe i faaineine. Ia nehenehe, a ani atu e nafea ia farerei faahou ia ˈna.

• Ia parau oe afea oe e hoˈi faahou e farerei ia ˈna, a tapea i ta oe parau.—Mt 5:37.