Afea e farerei faahou ai i te feia tei anaanatae?
1. E titauhia ia aha no te faariro i te taata ei pǐpǐ?
1 No te faariro i te taata atoa e hinaaro ra e haapii no nia i te Basileia o Iehova ei pǐpǐ, e titauhia ia farerei faahou ia ratou. (Mat. 28:19, 20) E pinepine te taime maitai roa ˈˈe no te reira, tei te tanoraa ïa o ta tatou porotarama e ta te taata. No te aha e hoˈi ai i muri iti noa ˈˈe i te farereiraa matamua?
2, 3. No te aha e tutava ˈi i te hoˈi oioi atu?
2 No te aha e hoˈi oioi atu ai? Ua fatata te hopea o te pororaa i “te evanelia o te basileia” e o teie nei ao. (Mat. 24:14; Pet. 1, 4:7) No reira, i te roaraa o teie “mahana faaoraraa,” e titauhia ia pee tatou i te faaueraa e ‘faaite onoono i te parau’ i te taata, oia atoa e hoˈi oioi e atuatu i to ratou anaanatae.—Kor. 2, 6:1, 2; Tim. 2, 4:2.
3 Ua ineine Satani i te hopoi ê i te huero atoa o te Basileia ta tatou i ueue i roto i te aau o te taata. (Mar. 4:14, 15) E faaooo pinepine te mau melo utuafare, hoa ohipa, e te tahi atu i te feia tei anaanatae. Ia hoˈi oioi atu tatou, e patu ïa tatou i nia i te aparauraa matamua hou te anaanatae a ore ai ia vetahi ê.
4. E nafea ia faaineine i te farerei-faahou-raa i te taime matamua?
4 A faanaho i te taime: E mea maitai aˈe ia faanaho maitai i te farerei faahou i te taata hou a vaiiho ai ia ˈna. A faahiti i te hoê uiraa ta oe e pahono i mua nei. Mea faufaa ia tapao maitai oe. Ia au i ta oe porotarama, e nehenehe oe e ani e hoˈi atu i te mahana i muri iho aore ra i muri iti noa ˈˈe. Mai te peu e ua farerei orua i te hopea hebedoma e e ohipa ta ˈna i te hebedoma, e farii paha oia ia hoˈi atu oe i to muri iho hopea hebedoma. Ia faanaho oe i te taime, a tapea i ta oe parau.—Mat. 5:37.
5. E nafea te hoˈi-oioi-raa ˈtu e tauturu ai ia tatou ia rave i ta Iesu faaueraa e faariro i te taata ei pǐpǐ?
5 E tumu maitai ta tatou no te farerei oioi faahou i te feia tei anaanatae. A faanaho ïa i te taime e a hoˈi oioi atu, no te mea “te poto nei te taime.” (Kor. 1, 7:29) Ia farerei oioi faahou tatou i te feia tei anaanatae i te poroi o te Basileia, e manuïa ˈtu â ïa ta tatou tutavaraa.