E titauhia te faaineineraa no te haapii ia vetahi ê ma te aravihi

E piti taime to Iesu aniraahia hoê â uiraa no nia i te ora mure ore. I te taime taitahi râ, ua faatano Iesu i ta ˈna pahonoraa ia au i te mau hinaaro o te taata i ui atu. (Luka 10:25-28; 18:18-20) No reira, noa ˈtu e ua matau tatou i te buka haapiiraa Bibilia, e mea titauhia ia faaineine na mua i te reira ma te haamanaˈo i te tupuraa o te piahi. Eaha te mau manaˈo e mea fifi no ˈna ia taa aore ra ia farii? Eaha te mau irava faahitihia ta tatou e maiti i te taio e o ˈna? Ehia rahiraa paratarafa ta tatou e hiˈopoa? E titauhia paha ia faaineine tatou i te tahi hiˈoraa, faataaraa aore ra te tahi mau uiraa no te tauturu i te piahi ia taa i te mau haapiiraa. Hau atu â, na Iehova e faatupu ra i te huero o te parau mau i roto i te aau. E mea titauhia ïa ia ani ia Iehova ia haamaitai i ta tatou faaineineraa no te haapiiraa, ia haamaitai atoa i te piahi e i ta tatou mau tutavaraa no te tauturu ia ˈna i te pae varua.—Kor. 1, 3:6; Iak. 1:5.