A faaohipa i te mau tuhaa o te buka Bibilia haapii ma te aravihi
A haapii ai e a faaohipa ˈi te hoê piahi Bibilia i ta te Bibilia e haapii mau ra, e haere o ˈna i mua i te pae varua e e faatupu o ˈna i te mau huru maitatai. (Sal. 1:1-3) E nehenehe tatou e tauturu i te piahi ia haere i mua i te pae varua ma te faaohipa maitai i te tahi mau tuhaa o te buka Bibilia haapii.
Te mau uiraa i te omuaraa: E haamata te pene taitahi e te mau uiraa e pahonohia i te roaraa o te haapiiraa. E nehenehe oe e taio i tera mau uiraa no te faaara i te hinaaro o te piahi no te aparauraa i muri mai. E nehenehe atoa oe e ani ia ˈna ia faaite poto noa mai i to ˈna manaˈo no nia i te uiraa taitahi. Ia faaite râ o ˈna i te tahi manaˈo hape, aita e faufaa ia faatano i te reira i taua taime ra. Maoti ta ˈna mau pahonoraa e ite ai oe eaha te mau tuhaa e mea tia ia haapao aore ra ia haafaufaa.—Mas. 16:23; 18:13.
Te tuhaa hau: Mai te peu e ua taa i te piahi te haapiiraa e te farii ra oia i te reira, e nehenehe oe e faaitoito ia ˈna ia taio o ˈna anaˈe i te tuhaa hau e tuati ra i te haapiiraa ta orua i hiˈopoa. I te haapiiraa Bibilia i muri iho, e faataa paha oe tau minuti no te haapapu e ua taa maitai anei ia ˈna tera tuhaa hau. Mai te peu râ e e tano, e mea maitai ia faataa i te taime no te tauaparau e o ˈna i nia i te tuhaa hau aore ra i te tahi tuhaa iti. E nehenehe oe e na reira ma te taio i te mau paratarafa e ma te tuu i te mau uiraa ta oe i faaineine ê na.
Te haamanaˈoraa tarenihia: I roto i te haamanaˈoraa tarenihia i te hopea o te pene taitahi, e itehia te tahi mau manaˈo o te pahono ra i te mau uiraa i te omuaraa. E nehenehe oe e faaohipa i teie tuhaa no te haapapu e ua taa maitai anei i te piahi te mau manaˈo faufaa e e nehenehe anei o ˈna e faataa i te reira. A taio i te manaˈo taitahi ma te reo puai, oia atoa i te mau irava Bibilia. I muri iho, a ani i te piahi ia faaohipa i te (mau) irava no te faataa no te aha mea tano ai te manaˈo taitahi.—Ohi. 17:2, 3.