Pahonoraa i ta outou mau uiraa

◼ E nehenehe anei te feia poro e faaohipa hanoa i te Internet no te poro aore ra no te faatere i te haapiiraa o te tahi taata tei te fenua ê?

Ua faaohipa vetahi taata poro i te Internet no te haamata i te haapiiraa Bibilia e te taata tei te fenua ê. E fenua paha i reira ua haafifihia ta tatou ohipa pororaa aore ra mea iti te taata poro. I te tahi taime, e faahopearaa maitai tei itehia. Tera râ, e mea atâta atoa ia tauaparau e te taata-matau-ore-hia maoti te Internet. (A hiˈo i Ta tatou taviniraa i te Basileia no Tiurai 2007 i te api 3.) Parau mau, ta tatou fa, oia hoi ia faaite i te poroi o te Basileia i te taata aau haavare ore. Tera râ, a faaohipa ˈi i te Internet, e nehenehe te mau taeae e tuahine e faahoa e te mau amuimuiraa iino, oia atoa te mau apotata. (Kor. 1, 1:19-25; Kol. 2:8) Hau atu â, i te fenua i reira ta tatou ohipa pororaa e haafifihia aore ra opanihia, e hiˈopoa te mau tia faatere i te mau papairaa atoa ta tatou e afai atu. E nehenehe ïa te reira e haafifi i te mau taeae e tuahine o tera fenua. No reira, eiaha roa ˈtu te feia poro e faaohipa i te Internet no te imi i te taata o te fenua ê no te faaite atu i te parau apî oaoa.

E nehenehe tatou e poro ma te faanaho-ore-hia i te hoê ratere tei tae mai i to tatou fenua. Tera râ, mai te peu e aita te amaa i faaue mai, eiaha e rave i te mau faanahoraa no te tamau i te poro ia ˈna i muri iho oia e hoˈi ai i to ˈna fenua. Mea au aˈe râ ia faaite atu e nafea ia faaohipa i te jw.org no te ite hau atu â aore ra teihea te amaa i to ˈna fenua. A faaitoito atoa ˈtu ia haere i te tahi Piha a te Basileia piri i to ˈna nohoraa. Parau mau, i te tahi fenua ê aita paha e Piha a te Basileia. Te hinaaro ra anei oia ia farerei te tahi Ite no Iehova ia ˈna? A faaî ïa i te api parau Veuillez suivre l’intérêt (S-43) e a horoa ˈtu i te papai parau o te amuiraa. Na ˈna e hapono i te aniraa ma te faaohipa i te jw.org. Ua ite maitai te amaa eaha te tupuraa o te fenua i reira te taata tei anaanatae e noho ai. O taua amaa ra ïa te ite maitai aˈe e nafea ia tauturu i tera taata i te pae varua.—A hiˈo i Ta tatou taviniraa i te Basileia no Tiunu 2014 i te api 7 e no Novema 2011 i te api 2.

Eaha te ravehia ia taui te nohoraa o te taata ta tatou e hoˈi faahou nei e farerei e ia reva oia i te fenua ê? Ua matau paha tatou i te tahi taata tei te fenua ê maoti noa te Internet e te faaohipa nei tatou i tera ravea no te faatere i ta ˈna haapiiraa. Eaha ïa te tia ia rave? A pee i te mau aratairaa faataahia i nia ˈtu. E nehenehe tatou e tauaparau ia ˈna tae roa ˈtu i te taime e farerei ai oia i te tahi taata poro o to ˈna fenua. Ia ora râ te hoê taata i te fenua i reira ta tatou ohipa pororaa e haafifihia aore ra opanihia, a haapao maitai a tauaparau ai orua i nia i te mau tumu parau Bibilia maoti te papairaa i te rata aore ra te faaohiparaa i te niuniu paraparau e te Internet.—Mat. 10:16.