Pahonoraa i ta outou mau uiraa

◼ Na vai e faaî i te mau parau aniraa?

Mea pinepine e itehia i nia i ta tatou mau papai te mau parau aniraa o te nehenehe e faaîhia e e haponohia ˈtu i te amaa no te ani i te mau buka aore ra i te hoê farereiraa e te mau Ite no Iehova. I nia atoa i ta tatou afata poroi Web www.watchtower.org, e nehenehe e ani i te hoê haapiiraa Bibilia. E tauturu teie mau ravea i te taata e rave rahi ia haapii i te parau mau. Ua tupu râ te fifi a faaohipa ˈi te feia poro i te reira ia farereihia to ratou mau fetii aore ra ia tauturuhia vetahi ê i te pae varua.

Aita vetahi i mauruuru a haponohia ˈtu ai te mau papai ta ratou i ore i ani. Ua manaˈo ratou e te faahepo ra ta tatou faanahonahoraa i te taata e ua tapaohia to ratou iˈoa i nia i te hoê tapura e faaohipa-tamau-hia nei no te hapono i te mau buka aore ra i te mau parau faatianiani. Ua huru ê te taata poro i faauehia ˈtu ia haere e farerei i te taata i ore i faaî i teie parau aniraa a ririhia ˈi oia. No reira, na te feia iho â e anaanatae e faaî i teie mau api parau, eiaha râ na te taata poro. Eita te amaa e haapao i te aniraa mai tera.

E nafea ïa ia tauturu i te pae varua i te hoê fetii aore ra hoa? Ia hinaaro oe ia fanaˈo o ˈna i te hoê papai, no te aha e ore ai e hapono atu i te reira mai te hoê taoˈa horoa? Ia hinaaro oia ia farerei te mau Ite ia ˈna, e aita oe i ite i te mau matahiapo o te amuiraa o to ˈna vahi, a faaî i te api parau Veuillez suivre l’intérêt (S-43) e a horoa ˈtu i te papai parau o ta oe amuiraa e na ˈna e hapono i te reira i te amaa. Eiaha râ e na reira tei roto anaˈe te taata e anaanatae ra i te fare tapearaa, i te hoê pu tautururaa i te feia rave i te raau taero, aore ra i roto i te hoê fare maˈi a te Hau. A faaitoito râ ia ˈna ia farerei i te mau taeae e haapao ra i tera mau pu aore ra ia papai i te amaa.