Hoê ravea apî no te haamata i te aparauraa
1. Eaha te ravea apî ta tatou i fanaˈo no te pororaa?
1 I roto i te neneiraa faaapîhia o te Huriraa o te ao apî (Beretane), te vai ra te tahi tuhaa i te omuaraa. No tatou, e itehia teie tuhaa i roto i te buka iti Introduction à la Parole de Dieu, tei matara mai na roto noa i te reo Farani i te tairururaa e toru mahana “E mata na i te imi i te Basileia o te Atua!” E nafea ia faaohipa i teie ravea apî no te faaineine i te mau faaiteraa no te pororaa? Mea maitai iho â teie buka iti no te haamata i te aparauraa. E amui hoi te reira i te tahi mau irava i raro aˈe e rave rau tumu parau Bibilia, mai te buka Haaferuriraa.
2. E nafea ia faaohipa i te buka iti i roto i te pororaa?
2 E faaohipa paha oe i te uiraa 8 a parau atu ai: “Te farerei poto nei matou i te mau taata no te mea e rave rahi te ui nei: ‘O te Atua anei te tumu o te mauiui?’ [I roto i te tahi mau tuhaa fenua, mea maitai aˈe ia faaite roa i te uiraa i te taata.] Eaha to oe manaˈo? [A vaiiho ia ˈna ia pahono.] Mea anaanatae roa te pahonoraa a te Bibilia.” A taio i te hoê irava faahitihia aore ra hau atu ma te faaohipa i te Bibilia e a tauaparau i nia i te reira. Ia anaanatae te taata, a faaite atu i na uiraa e 20 e vai ra i te omuaraa o te buka iti e a ani ia ˈna ia maiti i te hoê uiraa no te tauaparauraa i mua. Aore ra a vaiiho ia ˈna i te tahi papai haapiiraa o te horoa i te mau haamaramaramaraa hau no nia i te tumu parau tei hiˈopoahia.
3. E nafea ia faaohipa i te buka iti no te haamata i te aparauraa i te vahi e ere te taata i te Kerisetiano?
3 Mea maitai te mau uiraa 4 e 13 tae atu i te 17 ia poro oe i te vahi e ere te taata i roto i te haapaoraa Kerisetiano. Ei hiˈoraa, e nehenehe oe e faaohipa i te uiraa 17 ma te parau: “Te farerei poto noa nei matou i te mau utuafare no te mea e rave rahi fifi ta ratou e faaruru nei i teie mahana, e ere anei? [A vaiiho ia ˈna ia pahono.] Teie te tahi manaˈo î i te paari tei tauturu e rave rahi hoa faaipoipo: ‘E te vahine ra ia auraro oia i ta ˈna tane.’ [Aita e faufaa ia parau atu e no roto mai te reira i te Ephesia 5:33. Mai te peu e te tauaparau ra oe i te hoê vahine, e nehenehe oe e faahiti aau i te Ephesia 5:28.] No oe, e maitaihia anei te hoê faaipoiporaa a faaohipa ˈi i teie aˈoraa?”
4. I te hopea o te aparauraa, eaha ta oe e rave e te taata e ere i te Kerisetiano?
4 I te hopea o te aparauraa, a faanaho i te hoˈi faahou mai e farerei i tera taata. Peneiaˈe e opua oe i te tauaparau i nia i te tahi atu mau irava e vai ra i raro aˈe i te uiraa tei hiˈopoahia. I te taime tano, a parau ia ˈna e ua papaihia teie mau manaˈo î i te paari i roto i te Bibilia. Ia au i te mau tauaparauraa i mairi aˈenei e i ta te taata e manaˈo ra no nia i te Bibilia, a pûpû atu i te tahi papai o te tano no ˈna.—A hiˈo i te api hau o Ta tatou taviniraa i te Basileia no Titema 2013.