Ia haapao tatou i te hora!
1. Eaha te hiˈoraa ta Iehova e horoa maira i nia i te hora?
1 E mea haapao noa Iehova i te hora. Ei hiˈoraa, e ‘turu mai oia i ta ˈna mau tavini i te tau e au ai ra.’ (Heb. 4:16) E hopoi atoa mai oia i te ‘maa i te hora mau.’ (Mat. 24:45) E nehenehe ïa tatou e tiaturi e e ore te mahana o to ˈna riri e “haamaoro hua.” (Hab. 2:3) Auaa e ere Iehova i te mea taere! (Sal. 70:5) No tatou râ, ei taata hara o te ohipa noa, e mea fifi ia haapao i te hora. No te aha e mea faufaa ˈi ia matau tatou i te haapao i te hora?
2. No te aha e faahanahanahia ˈi Iehova ia haapao tatou i te hora?
2 I teie mau mahana hopea nei, e mea varavara te haapao nei i te hora. E mea miimii e haapao ore te rahiraa. (Tim. 2, 3:1-3) Ia haapao te mau Kerisetiano i te hora i te ohipa, no te mau farereiraa e te mau putuputuraa, e ite mai te mau taata i te reira e e faahanahana ïa ratou ia Iehova. (Pet. 2, 2:12) E haamata anei tatou i ta tatou ohipa i te hora tia aita râ e tae i na mua aˈe i te hora i te mau tupuraa Kerisetiano? Ia tae tatou na mua aˈe i te himene e pure haamataraa i te mau putuputuraa Kerisetiano, e itehia to tatou hinaaro e pee i to tatou Metua i te raˈi. Ua faanaho maitai hoi oia i te mau mea atoa.—Kor. 1, 14:33, 40.
3. No te aha e faatura ai tatou ia vetahi ê ia haapao tatou i te hora?
3 Ma te haapao i te hora, e itehia to tatou faatura ia vetahi ê. (Phil. 2:3, 4) Ei hiˈoraa, ia tae tatou i te mau putuputuraa na mua aˈe i te hora, aita ïa to tatou mau hoa Kerisetiano e haapeapeahia. Oia atoa no te mau putuputuraa no te pororaa. Mai te peu râ e e pinepine tatou i te tae na muri aˈe i te hora, e manaˈo vetahi ê e e haapao noa tatou ia tatou. Ma te tae na mua aˈe i te hora e itehia ˈi e e nehenehe tatou e tiaturihia e e mea haapao maitai tatou. Mea au hoi na te taata taua mau huru maitatai.
4. Ia pinepine tatou i te tae na muri aˈe i te hora, eaha te rave?
4 E pinepine anei oe i te tae na muri aˈe i te hora? A feruri ïa eaha te tumu. A faataa i te tahi porotarama e tauturu ia oe ia faaoti i ta oe ohipa i te taime faataahia. (Koh. 3:1; Phil. 1:10) A ani i ta Iehova tauturu. (Ioa. 1, 5:14) Ma te haapao i te hora e faaite ai tatou i to tatou mauruuru no na faaueraa rahi roa ˈˈe o te ture a Mose: ia here i te Atua e to tatou taata-tupu.—Mat. 22:37-39.