A faaohipa maitai i te mau vea tahito
Aita e faufaa ia haaputuputu aore ra ia faarue i te mau vea tahito. Mea maitai aˈe ia pûpû i te reira. E nehenehe te tahi taata e anaanatae i te parau mau maoti hoê noa vea. E turaihia ïa o ˈna ia haamata i te tiaoro i te iˈoa o Iehova. (Roma 10:13, 14) Teie te tahi mau manaˈo tauturu no te faaohipa maitai i te mau vea tahito.
I te mau tuhaa fenua aita e poro-pinepine-hia, e nehenehe tatou e vaiiho i te tahi vea i te fare aore e taata. A tuu râ i te hoê vahi o te taata fare anaˈe te ite.
Ia poro tatou i te mau vahi e tiai ra te mau taata i te pereoo mataeinaa, e nehenehe e ani i te taata e hinaaro anei ratou e taio i te tahi vea. Mai te peu e e, a faaite atu i te tahi mau vea tahito e a vaiiho ia ratou ia maiti.
I roto i te tuhaa fenua a ta oe amuiraa, te vai ra anei te mau fare puaraa ahu, fare ruau aore ra fare maˈi? Ia haere oe i tera mau vahi, e nehenehe oe e vaiiho i te tahi mau vea tahito i roto i te piha tiairaa. Mea faufaa ia ani i te parau faatia i te taata faatere mai te peu e tei reira o ˈna. Ia ite râ oe e te vai ra te tahi mau vea i ǒ, eiaha e vaiiho i te tahi atu.
Ia faaineine oe i te mau farerei-faahou-raa, a haapao i ta te taata taitahi e anaanatae ra. E utuafare anei to ˈna? E mea au anei na ˈna e reva aore ra te ohipa faaapu? A hiˈo na i roto i te mau vea tahito i te tahi tumu parau ta teie taata e anaanatae i te taio. A faaite atu i te reira ia hoˈi oe e farerei ia ˈna.
E mea fifi paha no oe ia farerei faahou i te hoê taata tei anaanatae. Ia ite oe ia ˈna, a faaite atu i te tahi mau vea tahito ta ˈna i ore i taio atura.