E taime tano te Oroa haamanaˈoraa i mua nei no te faaite i to tatou mauruuru

1. Eaha te ravea taa ê ta te Oroa haamanaˈoraa e horoa mai?

¹ E ravea taa ê te Oroa haamanaˈoraa no te 14 no Eperera no te faatupu e faaite i te mauruuru no to Iehova maitai. Te faaite ra te faatiaraa i roto i te Luka 17:11-18 eaha to Iehova e Iesu manaˈo no nia i te mauruuru. I roto i na lepera hoê ahuru i faaorahia, hoê anaˈe tei faaite i to ˈna mauruuru. A muri aˈe, maoti te hoo, e faaora-atoa-hia te maˈi e e fanaˈo tatou i te ora mure ore! E haamauruuru ïa tatou ia Iehova i te mau mahana atoa no tera mau haamaitairaa. E nafea râ tatou e faaite ai i to tatou mauruuru i te mau hebedoma i mua nei?

2. Eaha te rave no te faatupu i te mauruuru no te hoo?

² E faatupu i te mauruuru: E tupu te mauruuru ia feruri maite tatou. No te tauturu ia tatou ia faatupu i te mauruuru no te hoo, ua faaineinehia hoê porotarama no te taioraa Bibilia taa ê no te Oroa haamanaˈoraa. E itehia te reira i e rave rahi vahi, mai i roto i te tuhaa B12 o te New World Translation faaapîhia, te tarena e te buka iti E hiˈopoa anaˈe i te mau Papai i te mahana hoê. No te aha e ore ai e hiˈopoa i te reira e to oe utuafare? E puai roa ˈtu â to tatou mauruuru no te hoo. E haerea maitai atoa ïa ta tatou.—Kor. 2, 5:14, 15; Ioa. 1, 4:11.

3. E nafea ia faaite i to tatou mauruuru i te tau o te Oroa haamanaˈoraa?

³ E faaite i te mauruuru: E itehia to tatou mauruuru maoti ta tatou mau ohipa. (Kol. 3:15) Ua tutava te lepera mauruuru i te farerei ia Iesu no te haamauruuru atu. Ma te oaoa, ua faaite atoa taua lepera i to ˈna faaoraraa maˈi semeio ia vetahi ê. (Luka 6:45) E turai anei to tatou mauruuru no te hoo ia apiti ma te itoito i te opereraa no te Oroa haamanaˈoraa? E nehenehe atoa e faaite i to tatou mauruuru ma te riro ei pionie tauturu aore ra ma te poro atu â. I te ahiahi o te Oroa haamanaˈoraa, e turai to tatou aau î i te here ia farii maitai i te taata e ia ineine i te pahono i ta ratou mau uiraa.

4. E nafea tatou e haafaufaa roa ˈi i te Oroa haamanaˈoraa?

⁴ Tera anei te Oroa haamanaˈoraa hopea? (Kor. 1, 11:26) Aita tatou e ite. Te mea papu râ, ia mairi tera tupuraa, ua oti atura te ravea taa ê no te faaite i to tatou mauruuru. Eaha ïa te rave? E faaite anaˈe i te mauruuru ma ta tatou mau parau e manaˈo o to tatou aau no te faaoaoa ia Iehova, tei horoa i te hoo.—Sal. 19:14.