E mauruuru anaˈe
Oroa haamanaˈoraa i te 17 no Eperera
1. Mai te fatu salamo, eaha to tatou huru aau i te tau o te Oroa haamanaˈoraa?
1 No ta Iehova mau hamani maitai e faaoraraa e rave rahi, ua ui te fatu salamo: “Eaha ra ta ˈu ia hopoi atu na Iehova, i te mau hamani maitai no ˈna ia ˈu nei?” (Sal. 116:12) I teie mahana, e tumu rahi atu â ta te mau tavini a te Atua no te mauruuru. Tau senekele i muri aˈe i te papairaahia teie mau parau faaurua, ua ho mai Iehova i te ô rahi roa ˈˈe i te taata: te hoo. A faaineine ai tatou i te haamanaˈo i te pohe o Iesu i te 17 no Eperera, e tumu maitai to tatou ia mauruuru roa i te Atua.—Kol. 3:15.
2. Eaha te tahi mau tumu e mauruuru ai tatou no te hoo?
2 Haamaitairaa maoti te hoo: Maoti te hoo e ‘faaorehia ˈi ta tatou mau hara.’ (Kol. 1:13, 14) E nehenehe tatou e haamori ia Iehova ma te manaˈo haava mâ. (Heb. 9:13, 14) Mea ohie ia paraparau ia Iehova ia haafatata ˈtu tatou ia ˈna na roto i te pure. (Heb. 4:14-16) E tiaturiraa faahiahia to te feia e faatupu i te faaroo i te hoo e ora e a muri noa ˈtu.—Ioa. 3:16.
3. E nafea e faaite ai i to tatou mauruuru ia Iehova no te hoo?
3 A faaite i te mauruuru: Teie te tahi ravea no te faaite i to tatou mauruuru rahi: e taio i te mau irava Bibilia no te Oroa haamanaˈoraa i te mahana hoê a feruriruri atu ai. E tauturu mai te tumu parau “Ua ineine anei oe no te mahana faufaa roa ˈˈe o te matahiti?” o Te Pare Tiairaa o te 1 no Mati 2011 ia na reira. E faaite atoa anaˈe ia Iehova i te faufaaraa o te hoo no tatou na roto i te pure haavare ore. (Tes. 1, 5:17, 18) Ia tae tatou i te Oroa haamanaˈoraa, ei auraroraa i te faaueraa a Iesu, e faaite ai tatou i to tatou mauruuru. (Kor. 1, 11:24, 25) Hau atu â, e pee tatou i to Iehova here rahi ma te titau manihini i te taata rahi roa.—Isa. 55:1-3.
4. Ia aha tatou?
4 No te mau tavini mauruuru a Iehova, e ere te Oroa haamanaˈoraa mai te tahi atu putuputuraa. Teie te putuputuraa faufaa roa ˈˈe o te matahiti! A piri mai ai te Oroa haamanaˈoraa, ia au to tatou itoito mai to te fatu salamo tei papai: “E haamaitai [au] ia Iehova . . . e eiaha te hoê maitai a ˈna i horoa maira e haamoehia.”—Sal. 103:2.