Ia aravihi atu â i roto i te taviniraa—A tapao i tei anaanatae mai

“E ara ia oe, e ta oe e haapii ra.” (Tim. 1, 4:16) Tera te aˈoraa faaurua ta te aposetolo Paulo i horoa ia Timoteo. Ua faaite te reira i te faufaaraa ia riro ei taata poro aravihi, noa ˈtu e e mea apî tatou i roto i te taviniraa aore ra aita. E tauturu te tumu parau apî “Ia aravihi atu â i roto i te taviniraa” o Ta tatou taviniraa i te Basileia ia na reira. I roto i te mau tumu parau taitahi e hiˈopoahia hoê ravea faufaa e e tauturuhia tatou ia faaohipa i te reira. I te roaraa o te avaˈe, e faaitoitohia te taatoaraa ia faaohipa i tera ravea. Ia hope te avaˈe, i roto i te hoê tuhaa o te Putuputuraa no te taviniraa, e nehenehe tatou e faataa nafea tatou i faufaahia ˈi i te faaohiparaa i tera ravea. I teie avaˈe, e faaitoitohia tatou ia tapao i tei anaanatae mai.

No te aha e mea faufaa ˈi? No te rave hope roa i ta tatou ohipa, aita tatou e poro noa. E mea faufaa ia hoˈi faahou e farerei i te feia e anaanatae ra no te faararirari i te huero i tanuhia. (Mat. 28:19, 20; Kor. 1, 3:6-9) E titauhia ia hoˈi e farerei i te taata, paraparau i nia i ta ˈna e haapeapea ra e faaohipa atoa i te mau manaˈo o te aparauraa matamua. Teie râ, ia ite tatou i te anaanatae o te tahi taata, e mea faufaa ia tapao i te reira.