O vai te anaanatae i teie vea?
1. A taio ai i te tumu parau taitahi o Te Pare Tiairaa aore ra A ara mai na!, ia aha tatou e no te aha?
1 Ua faaineinehia Te Pare Tiairaa e A ara mai na! ma te feruri i te tupu ra na te ao nei. No reira, e rave rau tumu parau to roto. A taio ai tatou i te tumu parau taitahi, e mea tia ia uiui o vai te anaanatae i te reira. I muri iho, a tapao ia vai e pûpû ai i te vea.
2. E anaanatae paha vetahi i teihea tumu parau o ta tatou mau vea?
2 I roto i Te Pare Tiairaa i matara noa ˈtura, te vai ra anei te tahi tumu parau ta oe i paraparau ê na i to hoa rave ohipa? E tauturu anei te tumu parau no nia i te utuafare i te hoê fetii? Te opua ra anei te tahi taata ta oe i matau e reva i te fenua i faaitehia i roto i te A ara mai na!? E anaanatae anei vetahi taata tapihoo aore ra pu a te hau i te tahi o ta tatou mau vea? Ei hiˈoraa, e tano ia pûpû i roto i te mau fare ruau i te vea e faaite ra i te mau fifi e faaruruhia ra e te ruhiruhia. I roto i te mau pu a te ture, te paraparau ra no nia i te taparahiraa taata.
3. A faatia na i te tahi tupuraa e faaite ra i te faufaaraa ia feruri o vai te anaanatae i te mau vea.
3 Faahopearaa maitai: A tae mai ai te vea A ara mai na! no Atopa 2011 (Farani) “A tauturu i te tamarii ia riro ei taata paari maitai,” ua taniuniu te tahi hoa faaipoipo no Afirika Apatoa i na fare haapiiraa e 25 i roto i te tuhaa fenua a ta raua amuiraa. E 22 tei farii i te reira e ua opere atu i te mau piahi. Ua na reira atoa te tahi atu hoa faaipoipo no tera iho â fenua i roto i ta ratou tuhaa fenua. Ua faaohipa te mau orometua o te hoê fare haapiiraa i te vea ei porotarama tahebedoma oia atoa no te taioraa. Ua faatia na hoa i tei tupu i te tiaau haaati, faaitoito atura oia i te mau amuiraa ta ˈna i haere atu ia na reira atoa. I te mea e ua ani e rave rahi i te amaa ia haponohia ˈtu â tera mau vea, ua titauhia ïa ia nenei-faahou-hia te reira!
4. No te aha tatou e hinaaro ai e pûpû i te mau vea i te taata e rave rahi?
4 I roto i ta tatou mau vea e itehia ˈi te auraa o te mau tupuraa i teie mahana, te manaˈo o te Bibilia e ta te Basileia o te Atua e rave. I te fenua nei, tera anaˈe te vea e faaite ra i “te ora.” (Isa 52:7) E hinaaro iho â ïa tatou e pûpû i te reira i te taata e rave rahi. Te tahi ravea o te uiuiraa ïa, ‘O vai te anaanatae i teie vea?’