E nafea ia faaohipa i te buka rairai O vai te rave nei i to Iehova hinaaro i teie mahana?
Buka rairai apî no te aratai i te piahi i te faanahonahoraa
1. Eaha na tumu e toru i faaineinehia ˈi te buka rairai To Iehova hinaaro?
1 Ua faaohipa ê na anei oe i te buka rairai apî O vai te rave nei i to Iehova hinaaro i teie mahana? Ua faaineinehia te reira ia (1) ite te piahi o vai mau tatou ei nunaa, (2) ia taa ia ˈna ta tatou ohipa, e (3) te tereraa o ta tatou faanahonahoraa. I roto i te buka rairai To Iehova hinaaro, hoê api hoê ïa haapiiraa. E nehenehe ïa e hiˈopoa i roto noa e pae e tae atu ahuru minuti i muri aˈe i te haapiiraa Bibilia taitahi.
2. A faaite mea nafea te mau tuhaa o te buka rairai i te faaineineraahia.
2 Mea nafea te faaineineraahia? E toru tuhaa to teie buka rairai. Mai ta oe e ite i nia ˈtu, e faataa te tuhaa taitahi i te hoê tumu parau taa ê no nia i ta Iehova faanahonahoraa. E uiraa te tumu parau o na haapiiraa e 28. Ua papai-meumeu-hia te mau tumu parau iti e pahono i tera uiraa. Ua tuu-atoa-hia ˈtu te mau hohoˈa patahia i roto e 50 tiahapa fenua no te faaite i ta tatou ohipa na te ao nei. No te faaitoito i ta oe piahi, a faaohipa i te mau manaˈo tauturu o te tumu parau tarenihia “Hau atu â” e vai ra i roto i te rahiraa o te mau haapiiraa.
3. E nafea ia faaohipa i te buka rairai To Iehova hinaaro?
3 E nafea ia faaohipa? A faaite na mua roa i te uiraa o te haapiiraa. I muri iho, a taio i te mau paratarafa ma te haamahitihiti i te mau tumu parau iti papai-meumeu-hia. Ei haamanaˈoraa, a ui faahou atu i te mau uiraa i raro i te api. E nehenehe e taio i te taatoaraa o te haapiiraa aore ra te tuhaa taitahi a tauaparau atu ai. A feruri maitai no te ite eaha te mau irava e taio. Eiaha atoa e haamoe ia hiˈopoa i te mau hohoˈa e tumu parau tarenihia “Hau atu â.” I te rahiraa taime, mea maitai ia aparau ia au i te mau numera haapiiraa. No te mau hinaaro râ o te piahi, e maiti paha oe i te tahi atu haapiiraa. Ei hiˈoraa, mai te peu e e tairururaa te fatata maira, e hiˈopoa paha oe i te haapiiraa 11.
4. No te aha e oaoa ai no teie mauhaa apî?
4 Ia haapii tatou i te Bibilia i te hoê taata, e tauturuhia ïa o ˈna ia ite o vai to tatou Metua i te raˈi. Ia matau atoa râ oia i ta Iehova faanahonahoraa e tia ˈi. (Mas. 6:20) Auê tatou i te oaoa a faaohie mai ai teie mauhaa apî ia na reira!