E faatano anaˈe i ta tatou huru pororaa
1. Eaha te haapii mai i te huru pororaa a te mau Kerisetiano matamua?
1 I poro na te mau Kerisetiano matamua i te parau apî maitai i te mau taata no te mau taˈere e haapaoraa rau. (Kol. 1:23) Noa ˈtu e hoê â poroi ta ratou, te Basileia o te Atua, ua faatano ratou i ta ratou pororaa i nia i te taata. Ei hiˈoraa, i to Petero paraparauraa i te mau ati Iuda mea faatura roa i te mau peropheta, ua faahiti oia ia Ioela. (Ohi. 2:14-17) Area Paulo, ua haaferuri ïa i te mau Heleni ia au i te Ohipa 17:22-31. I teie mahana, mea faatura te taata o te tahi mau tuhaa fenua i te mau Papai, mea ohie ïa ia faahiti i te Bibilia ia poro tatou na te mau fare. E haapao maitai anaˈe râ i ta tatou huru paraparau i te feia aita e anaanatae ra i te Bibilia aore ra i te haapaoraa e te feia e ere i te Kerisetiano.
2. E nafea ia faaohipa i ta tatou mau papai no te tauturu i te feia aita e tiaturi ra i te Bibilia e te feia mea faatura i te Bibilia?
2 E faaohipa maitai anaˈe i te mau papai e pûpû: I teie matahiti taviniraa, e taui te mau papai e pûpû i te mau piti avaˈe atoa. E faaite tatou i te mau vea, api parau e buka rairai. Noa ˈtu e aita te feia ta tatou e poro ra e tiaturi ra i te Bibilia, e nehenehe e faaite atu i te hoê tumu parau o ta tatou mau papai e anaanatae ratou. Eita paha tatou e taio aore ra e faahiti i te hoê irava Bibilia i te farereiraa matamua. Ia anaanatae râ te taata, e hoˈi atu tatou e tauturu ia ˈna ia tiaturi i te Atua Poiete e i ta ˈna Parau faaurua. Ia poro râ tatou i te feia mea faatura i te Bibilia, e faaohipa ïa tatou i te papai e tano. E nehenehe e pûpû i te buka Bibilia haapii aore ra na buka rairai Faaroo i te Atua aore ra Faaroo i te Atua no te ora e a muri noa ˈtu i te mau taime atoa, noa ˈtu e e ere tera te papai o te avaˈe. Te mea faufaa, ia faatano i ta tatou huru pororaa.
3. E nafea te aau o te taata e au ai i te repo?
3 E faaineine anaˈe i te repo: E au te aau o te hoê taata i te repo. (Luka 8:15) E titauhia ia faaineine atu â i te tahi mau repo e nehenehe ai te mau huero o te parau mau Bibilia tei ueuehia e aˈa e e tupu mai. I tanu na te feia poro evanelia o te senekele matamua i te mau huero o te parau mau i roto i te mau huru repo atoa. E faahopearaa maitai tei noaa mai. Ua oaoa ratou i te reira. (Ohi. 13:48, 52) Mai tera atoa no tatou ia faatano tatou i ta tatou huru pororaa.