“E na reira outou”
Oroa haamanaˈoraa i te 5 no Eperera
1. No te aha e haafaufaa ˈi i te Oroa haamanaˈoraa?
1 “E na reira outou ei manaˈoraa ia ˈu.” (Luka 22:19) Na roto i teie mau parau, ua faaue Iesu i ta ˈna mau pǐpǐ ia haamanaˈo i to ˈna pohe tusia. No te mau mea atoa ta te hoo i faatupu, aita ˈtu mahana hau aˈe i te faufaa no te mau Kerisetiano maoti te Oroa haamanaˈoraa tamatahiti. A piri noa mai ai te 5 no Eperera, e nafea tatou e faaite ai i te mauruuru ia Iehova?—Kol. 3:15.
2. E nafea e faaineine ai i to tatou aau no te Oroa haamanaˈoraa?
2 E faaineine anaˈe: E faaineine iho â tatou i te mau mea faufaa. E nehenehe tatou e to tatou utuafare e faaineine i to tatou aau no te Oroa haamanaˈoraa ma te hiˈopoa e te feruriruri i te mau tupuraa o te mau mahana hopea o te oraraa o Iesu i te fenua nei. (Ezr. 7:10) Ua tapaohia te tahi mau irava i roto i ta tatou tarena e te buka iti E hiˈopoa anaˈe i te mau Papai i te mahana hoê. Area Te Pare Tiairaa o te 1 no Mati 2011 i te mau api 31-32, e tapura roa ˈtu â ïa to roto o te horoa ra i te mau pene o te buka Te taata rahi roa ˈˈe.
3. E nafea e faaite ai i te mauruuru ma te poro atu â?
3 E poro anaˈe: E nehenehe atoa tatou e faaite i to tatou mauruuru ma te poro atu â. (Luka 6:45) E haamata te opereraa i te mau titau-manihini-raa no te Oroa haamanaˈoraa i te Mahana maa 17 no Mati. E nehenehe anei oe e faanaho no te poro atu â aore ra no te tavini ei pionie tauturu? No te aha e ore ai e tauaparau i ta outou arui haamoriraa utuafare i mua nei?
4. E nafea tatou e faufaahia ˈi i te taeraa ˈtu i te Oroa haamanaˈoraa?
4 Ua faufaahia tatou i te taeraa ˈtu i te Oroa haamanaˈoraa i te mau matahiti atoa! A feruri ai tatou i to Iehova maitai i to ˈna horoaraa mai i ta ˈna Tamaiti fanau tahi ei hoo, e rahi atu iho â to tatou oaoa e here no te Atua. (Ioa. 3:16; Ioa. 1, 4:9, 10) E faaaraara atoa te reira i to tatou hinaaro e arue ia Iehova i mua i te taata. (Sal. 102:19-21) Eita ïa tatou e ora faahou no tatou. (Kor. 2, 5:14, 15) Oia mau, te tiai ru nei te mau tavini mauruuru a Iehova i te Oroa haamanaˈoraa ‘no te faaite â i te pohe o te Fatu.’—Kor. 1, 11:26.