A faatano maitai i ta oe mau tutavaraa
1. E nafea te Korinetia 1, 9:26 e tano ai i te pororaa?
1 Ua papai te aposetolo Paulo: “Te horo nei au, eiaha mai te mea e aore i itea; te moto nei au eiaha mai te mea e, e moto i te mataˈi.” (Kor. 1, 9:26) Te faahiti nei oia i ta ˈna faaotiraa e tapi i te mau fa no te tavini maitai aˈe ia Iehova. E tano atoa râ teie irava no te pororaa. E faatano maitai tatou i ta tatou ‘motoraa,’ aore ra tutavaraa, ia noaa mai te maitai rahi i roto i te pororaa. E nafea?
2. Eaha te taime e ihea e poro ai, mai te mau Kerisetiano o te senekele matamua?
2 A haere i te mau vahi e taata to reira: I te senekele matamua, i poro na Paulo e te tahi atu feia poro evanelia na te mau vahi e taata to reira. (Ohi. 5:42; 16:13; 17:17) Peneiaˈe i te ahiahi tei te fare te rahiraa o te taata o ta tatou tuhaa fenua. Tera ïa te taime tano no te poro i tera e tera fare. I te tapearaa pereoo mataeinaa, mea rahi atoa paha te taata i te aahiata o te haere i te ohipa aore ra na te ohipa mai i te ahiahi roa. Eaha te mau taime e î ai te mau fare toa i te taata? E tano ïa ia poro na te pae purumu.
3. E nafea ia faatano i ta tatou mau tutavaraa no te rave maitai i ta tatou tuhaa fenua?
3 A rave maitai i te tuhaa fenua: E faatano atoa tatou i ta tatou mau tutavaraa no te rave maitai i ta tatou tuhaa fenua. Eiaha ia rahi roa te taata e poro i te hoê â vahi. E pau hoi te taime i te faanahoraa i te pǔpǔ e te ohipa. Mea maitai aˈe ia vahi i te pǔpǔ. Ia poro atoa tatou i te mataeinaa, e oti oioi ia tatou te tuhaa fenua e e paraparau rahi atu â tatou ia ore ia rahi roa te taata i roto i te pereoo. E nehenehe e ani i te hoê tuhaa fenua i pihai iho mai i ǒ tatou, a ore atu ai e pau te taime i te tereraa na nia i te pereoo.
4. Maoti te aha e riro ai tatou ei “ravaai taata” aravihi?
4 Ua faaau Iesu i te feia poro evanelia i te mau “ravaai taata.” (Mar. 1:17) Te fa a te hoê taata ravaai, e ere noa ia taiˈa, ia noaa râ te iˈa. No reira te feia ravaai aravihi e haere ai ma te haamarirau ore i te mau vahi e i te mau taime te vai ra te iˈa. E faatano maitai ratou i ta ratou mau tutavaraa. Ia itoito atoa ïa tatou i roto i ta tatou taviniraa.—Heb. 6:11.