Ia pîpîhia iho â e tupu ai te huero
1. Ia pîpîhia te aha e tupu ai te reira?
1 Ia pîpîhia iho â te mau huero i tanuhia i roto i te hoê aua e tupu ai te reira. Hoê â huru atoa no te mau huero o te parau mau e ueuehia ra i roto i te aau o te taata i roto i te tapura fenua. (Kor. 1, 3:6) Ia hinaaro tatou ia aˈa, ia tupu, e ia hotu mai te reira, e hoˈi ïa tatou e farerei e e faarari i teie mau huero taipe ma te faaohipa i te Parau a te Atua.
2. E nafea ia faaineine no te farerei-faahou-raa?
2 A faahiti i te hoê uiraa: A faaineine ai oe ia oe, a maiti i te hoê uiraa o te faaara i te anaanatae ta oe e tuu atu hou a hope ai te aparauraa matamua. A faanaho no te hoˈi atu e farerei ia ˈna no te pahono i tera uiraa. Ua faufaahia e rave rahi i to ratou maitiraa i te hoê tumu parau o te buka Bibilia Haapii e faaiteraa i te tereraa o te hoê haapiiraa Bibilia.
3. Eaha te tapao a itehia ˈi te anaanatae?
3 A tapao: I muri noa iho i te aparauraa matamua, a rave i te taime no te tapao i to ˈna iˈoa e to ˈna vahi nohoraa, te taio mahana e te hora i paraparau ai orua, te tumu parau, e te papai ta oe i vaiiho atu. Ua faahiti anei o ˈna i ta ˈna haapaoraa? To ˈna utuafare? Ta ˈna e anaanatae e e tapitapi ra? E tauturu te mau mea ta oe i papai ia faaineine i to muri iho aparauraa. A tapao atoa i te mahana ta orua i faaau e hoˈi atu ai oe e pahono i te uiraa.
4. No te aha e tutava iho â ˈi i te atuatu i te anaanatae o te taata?
4 A tutava: Eita Satani e faaea i te ‘hopoi ê atu i te parau’ i ueuehia i roto i te aau o te taata. (Mar. 4:14, 15) No reira, eiaha e taora i te tauera mai te peu e e fifi oe i te farerei ia ˈna i to ˈna fare. E nehenehe anei oe e hapono i te hoê rata aore ra e vaiiho i te tahi poroi i nia i te opani? Ua haamata te hoê pionie i te hoê haapiiraa Bibilia i te uputa e te hoê vahine e mea fifi roa ia farerei. Ua papai oia i te hoê rata. A farerei faahou ai raua, ua parau atu teie vahine e ua putapû roa o ˈna no te anaanatae i faaitehia ˈtu. A pîpî ai tatou i te mau huero o te parau mau, e oaoa tatou ia oteo, ia tupu e ia “hotu maira te huero, taitoru ahuru i te huero hoê, taiono ahuru i te tahi, taihoê hanere i te tahi.”—Mar. 4:20.