‘E faatiahia te paari e ta ˈna ra mau ohipa’
1. E nafea vetahi e hiˈo ai i ta tatou ohipa?
1 I te tahi mau taime, eita te taata e farii mai. E manaˈo hape paha to ratou aore ra ua faaroo ratou i te mau mea tano ore no nia i te mau Ite no Iehova. Peneiaˈe ua ohipa atoa te mau manaˈo oti noa haapurorohia. I te tahi mau fenua, “e pǔpǔ iti faaroo atâta” tatou. Eaha to tatou huru i mua i teie huru faahaparaa?
2. Eaha te tauturu mai ia ore tatou ia paruparu i mua i te faahaparaa?
2 A tapea noa i te feruriraa maitai: E pinepine te taata i te manaˈo hape e te faaino ia Iesu e i te tahi atu mau tavini a te Atua o te senekele matamua. (Ohi. 28:22) Noa ˈtu te faahaparaa, aita ratou i haama i ta ratou taviniraa. Ua parau Iesu: “E faatiahia . . . te paari e ta ˈna ra mau tamarii,” aore ra ohipa. (Mat. 11:18, 19) Ma te tiaturi e e ite iho â te mau taata e imi ra i te parau mau i te faufaaraa o te evanelia, ua tamau noa oia i te rave i te hinaaro o to ˈna Metua ma te itoito rahi. Eita tatou e paruparu ia haamanaˈo tatou e ua faaruru atoa te Tamaiti iho a te Atua i te reira.
3. No te aha eita ˈi tatou e maere i te mau faainoraa e patoiraa?
3 Ua faaite Iesu e e riri te ao i ta ˈna mau pǐpǐ mai ia ˈna atoa. (Ioa. 15:18-20) Eita ïa tatou e maere i te mau faainoraa e patoiraa i teie mahana. Inaha, ua ite tatou e e rahi roa ˈtu te reira a piri ai te hopea o teie nei ao e a rahi roa ˈi to Satani riri. (Apo. 12:12) E nehenehe tatou e oaoa i te mea e te faaite ra te reira e ua fatata te ao a Satani i te haamouhia.
4. Ia ore te taata e farii i te evanelia, ia aha tatou?
4 A pahono ma te hamani maitai: Ia ore te taata e farii mai, ia pahono noa tatou ma te hamani maitai e te mǎrû. (Mas. 15:1; Kol. 4:5, 6) I te hoê taata aau haavare ore, e faataa ˈtu paha tatou e mea rahi te manaˈo hape no nia i te mau Ite no Iehova aore ra e ani atu tatou no te aha oia e manaˈo ai mai tera. E faaitoito paha ta tatou pahonoraa mǎrû ia ˈna ia uiui no nia i ta ˈna i faaroo e ia farii â i te paraparau e te mau Ite no Iehova. I te hoê râ taata tei riri, e mea maitai aˈe ia vaiiho ia ˈna ma te peu maitai. Noa ˈtu ta vetahi ê huru hiˈoraa ia tatou, ua papu ia tatou e te haafaufaa ra Iehova i ta tatou taviniraa.—Isa. 52:7.